uLuuka 9 - Tesitamenti Umupwa 1965

Avapositili ishumi navavili nukukumusyʼintumi kwavo

¹ Pʼahavavunganihʼavishumi navavili, ahavapa amaha nuvumwene uvwa kuvinjilʼimpepʼimbivi zyonti nuvwa kukantulʼimpungo.

² Ahavatuma muntala ukukumusyʼuvumwene vwa Mulungu nukuvazuzuvushizyʼavavinu.

³ Ahavavuzya ahati: Mutasende naṿimo mwidala. Ye ndali indisa, ye ndali nimbugulu, ṿwe ndali iṿwa kulya, zye ndali nimpiya, nazyʼinkanzu zye ndali ukuva zivili.

⁴ Ninyumba yenga mukwinjila mumwo, mwe muhavanje mumwo, mwe muhafume lwe mukusogola.

⁵ Vonti venga mwazile vatakuvaposhela, muhafume munkayʼino, ve muhavakunyuntile nulusuto lwa kuṿinama ṿwinyu, zye zivanje zya kumanyila mumwʼavene.

⁶ Pe vahasogola ukuvala, vahazyungula munkaya, vahayangʼinongwʼinyinza, vahazuzuvushizyʼavavinu mwonti mwonti.

Amaganigani ga Helodi

⁷ Pe wope nuHelodi umwene ahiṿwa zyonti zye zipezilwe. Pʼahasiva nkani, shʼayazile vamo vakuti: WʼuYohani azyusile kuvafwe.

⁸ Avamwavo vakuti: WʼuEliya alolesile. Avamwavo ahaga vakuti: Mukuvwi wumo wa lulwo azyusile.

⁹ UwenʼuHelodi ahati: UwenʼuYohani we namuvoyʼitwʼine. Uwene wununo wʼunanu, we nkwiṿwa ukuti akupela zinizi? Ahanzʼukumwenya.

Ukulisya avantu 5,000

¹⁰ Pʼavapositili vahavwela kwʼavatumile, vahamuvuzya zyonti zye vavomṿile. Pʼuwene ahepa navo ahayeleleha navo munkaya yoka ye vakuti Betisayida.

¹¹ Avene nyenʼavantu lwe vamuwenyi, pe vahajenda nukumulandatʼimpuga. Uwenʼahavaposhela, ahavavuzyʼizya vumwene vwa Mulungu. Vope nava kuzuzuvushizya ahavazuzuvushizya.

¹² Vahalinga lwe vwakwila shamazuva, pe vahapalamila kukwakwe avishumi navavili, vahati: Uvavwezyʼavantu vavale mwonti munkaya namutusasa, mwe vahakate, mwe vahalyanje niṿwa kulya. She tuli mulwugwa munumu.

¹³ Uwenʼahamula ahati: Simuvapanjʼiṿwa kulya mwenemwe. Avene vahati: Tute naṿwʼiṿwinji naswe. Ge makati gasano nazye nswi zivili, zye tuli nazyo mpela, inga tutakuvalʼukuvakalilʼiṿwa kulya vontʼavantu vanava.

¹⁴ She vali 5,000 avanaṿuli. Uwenʼahavavuzyʼavasundikwa vakwe ahati: Simuvavuzye vatendame muvulilo muvulilo, uvulilo vwoka amashumi gasano, uvwamwavo amashumi gasano.

¹⁵ Pe vahahonzya vovulo, vahavatendamisya vonti.

¹⁶ Ilelo pʼuwene ahasenda nage makati gasano ganaga nazye nswi zivili, ahenya kumwanya, ahaṿilota, pʼahaṿimensulanya, ahavaninchilizyʼavasundikwa vakwe, ve vahavapʼavantu.

¹⁷ Pe vahalya, vahikuta vonti. Vahavunganiha nutwalila twe twasyaye iṿiseje ishumi naṿivili.

UPeteli akwitihʼukuti uYesu wu Chilisiti

¹⁸ Afinzile lelo lwʼayelelesile navasundikwa vakwe lwʼapusite, pʼahavavuzilizya ahati: Avantu lwe vakunjangʼine pe vakuti ne nanu?

¹⁹ Avene vahamuvuzya vahati: Vamo vakuti we Yohani umwozyi, vamo vakuti we Eliya, vamo vakuti we mukuvwi wa lulwo wʼazyusile.

²⁰ Uwenʼahati: Imwe lelo, imwe mukuti ne nanu? PʼahamulʼuPeteli ahati: We Chilisiti wa Mulungu lwe.

UYesu akukuvwa Izya vufwe nukuzyuha kwakwe

²¹ Pʼuwenʼahavapilila ahavinda ahati: Mutamuvuzyaje numʼumuntu;

²² ahati: UMwanamuntu pakuti aliyimba nkani. Navasongo navashiputʼavapiti navamanyakalata valimusamula, valimugoga, nkandʼalizyuha pisiku lya vutatu.

Ulwito lwa kuyihana weka

²³ Pʼahavavuzya vonti ahati: Umuntʼingʼakwanzʼukundandatʼine mwisinda, wʼahayihanaje weka, nishihovenkanyo shakwe ayivegazyʼamanda gonti, pʼahandandatʼine.

²⁴ Shʼuno wʼakwanzʼukupulumusyʼuvulanzi vwakwe, wʼakuvutezya. Nkandʼuno wʼakuvutezyʼuvulanzi vwakwe pe pazyane, wʼakuvupulumusya.

²⁵ Nashengʼumuntu ayilonsile yontʼinsi, pe yamuvosya shonu ingʼayitezizye weka, ingʼayitazile weka?

²⁶ Shʼuno wengʼali ninsoni kukwane nakumazwi gane, we wope nu-Mwanamuntu aliva ninsoni kukwakwe, lwʼavusilʼukwinza muvumwamu vwakwe nuvwa Yise nuvwa vahavizyʼavafinjile.

²⁷ Nalyoli nkuvavuzyʼine nkuti: Imwe mwe mwimiliye panapa, vamo mutalimanyʼukufwa lwe mutawenyi suti uvumwene vwa Mulungu ukwinza.

Ukwanduha kwa Yesu

²⁸ Ilelo lwʼayanzilʼamazwi ganaga, lwe gashilinkinʼamandʼumunana, pʼahasendʼavaPeteli nuYohani nuYakobu, ahazuva navo pigamba ukuputa.

²⁹ Ilelo lwʼamakuputa, pisheni nakuminso ahanduha, ahava payo, namenda gakwe gahava mpe, gahalama.

³⁰ Vahagʼavantu vavili vakuyanga nawo, vali ve vaMose nuEliya.

³¹ Vahaloleha muvumwamu, vahayangʼizya kwepa munsʼumʼuwene, ṿwʼaliyinzʼukulunjisya mu-Yelusalemu.

³² Avene nyene avaPeteli navamwavo utulo twavaposite. Ilelo lwe vakudamuha, pe vahenyʼuvupiti vwakwʼuvumwamu, navantu vavili ve vimiliye nawo.

³³ Ilelo avaMose nuEliya lwe vakwandʼukusogola, pʼuPeteli ahayanga nuYesu ahati: Mwene, pinza ukuva panapʼiswe. Tuzengajʼinkambi zitatu panapa. Yokʼive yaho wenewe, yokʼive ya Mose, yokʼive ya Eliya. Shʼahasavata vwelele.

³⁴ Ilelo lwʼamakuyanga zinizi, pe vahagʼivingo likuvakupishila. Pe vahatetema lwe vahinjila mwivingo.

³⁵ Pʼizwi lihafuma mwivingo mumwo lihati: We Mwana wane, umusatulwa kukwane, we mumutejelezyaje wuyo.

³⁶ Ilelo lwe lyamakuyangʼizwi linili, pe vahagʼuYesu ali weka. Avene suti vali mwa, vahasita nukumuvuzya mumanda ganaga numʼumuntu zizyo zye vaziwenyi.

Ukuzuzuvuha kwa mulumendo wa mpepʼvahandamanu

³⁷ Ilelo pisiku lye likupwanila, lwe vakwiha pigamba; pʼuwenʼahahomana navantʼimpugʼimpiti.

³⁸ Pe vahaganduhʼumuntu wa mumpuga yiyo, ahakuta ahati: Musambilizi, nkulambilizya kukwaho nkuti umwenyelezyajʼumuṿuli wanʼumulumendo uno, she ndi nawo woka vwelele imozi.

³⁹ Yenya, impepo ikumusunkulanya, ilelo pʼuwenʼakujenda nukukuta, pʼakuzilihʼishizilisi nukufulizyʼitatafula. Ukufuma hansi hansi, lwʼili fwe ngati imuhominye.

⁴⁰ Ndambilizizye nakuvasundikwa vaho ukuti vayivingajʼimpepʼino, ilelo pʼivaposite.

⁴¹ PʼuwenʼuYesu ahamula ahati: Ye mwe, kwe kusitakwitiha vuli avantu vashinishʼiva, nipele poshi ukuva namwe, nipele poshi ukuti: Sangapa, sangapa? Muletʼipa umuṿuli waho.

⁴² Ilelo lwʼamakupalamila nawo, pʼimpepʼimbivi ihamuhanyizya pansi, ahajenda nukuzilihʼishizilisi. PʼuYesu ahayumanʼimpepʼinkandamanʼino, ahamuzuzuvushizyʼumwana, ahamupʼuyise.

⁴³ Pe vonti vahatentwa muhati uvupiti vwa Mulungu. Ilelo lwe vonti Vakusukumila zyonti zyʼahapelaga, pʼuwenʼahayanga kuvasundikwa vakwe ahati:

Ukukuvwa kwa Yesu kwa vuvili ukwa vufwe vwakwe

⁴⁴ Simutegajʼahinzʼamakutwi ginyu, mutejelezyajʼamazwi ganaga. ShʼuMwanamuntu aliyambililwa munyove zya vantu.

⁴⁵ Avene vahapotwa ukuzimanyinsanya zyʼahayanga. Zihava fwe ngati zikupishilwe ukuti vatazisimishizyaje. Vahanyila ukumuvuzilizya zyʼahayanga.

Izya vwahayisye nuvuzyihamulaha

⁴⁶ Vahadalinkanʼamadalʼavene vahati: Amwʼunanʼumupiti muli swenti mwe tuvaliye?

⁴⁷ IlelʼuYesu lwʼaziwenyi zye vahasivaga mumoyo gavo, pʼahasendʼumwana, ahamuviha kundwimo kukwakwe,

⁴⁸ ahavavuzya ahati: Uno wengʼakumuposhela umwanʼuno mwizina lyane, wʼamposheleye nene. Ilelʼuno wengʼakumposhelʼine, wʼamuposheleye wuyo wʼantumilʼine. Shʼuno wengʼavalusizye mwentʼuvunsi, wʼavalusizye nuvupiti.

⁴⁹ PʼuYohani ahamula ahati: Musambilizi, tumwazile woka wʼimpepʼinkandamanu akuzifumwa mwizina lyaho, pʼiswe tuhamuhandanizya, she twazile tute nawo ukukulandata.

⁵⁰ UwenʼuYesu ahamula ahati: Mutamulesyaje. Shʼuno wenga tutagunjiline nawo, we tukujendelana nawo.

UYesu akuvuha ukuvala mu-Yelusalemu: AvaSamaliya avasita lupepelezyo

⁵¹ Ilelo lwʼisiku lyakwe lya kumusenda kumwanya lwe lyamakupalamila, pe wope ahenyezyʼisheni ku-Yelusalemu, ahati kwe mbale.

⁵² Pʼahalongolezyʼava kuvala kwilongolela kukwakwe. Ve vahafiha munkaya yoka ya vaSamaliya ukumuyananizya apa kukata.

⁵³ Avene nyene vahasita nukumuposhela, she vazile isheni ayenyizye ku-Yelusalemu lwʼakujenda.

⁵⁴ Lwe vaziwenyi zinizi avasundikwa vakwe avaYakobu nuYohani, pe vahati: Mwene, inga witihaga iwe, pe tungayangʼukuti umwoto afume kumwanya ukuvaloṿwa [inza shʼavo-mṿilʼuEliya]?

⁵⁵ Pʼuwenʼahavashevela ahavapilila [ahati: Mutamanyile ukuti mwe vana va mpepo vuli?].

⁵⁶ ShʼuMwanamuntu atinzilʼukutupulʼuvulanzi vwa vantu ndali, nkandʼukuvapoha. Pe vahavala munkayʼiyamwavo.

57-60: Mat. 8,19-22.

⁵⁷ Ilelo lwe vakujenda mwidala, pe wokʼumuntu ahayanga nawo ahati: Mwene, nkukulandata mwonti mwengʼukujenda.

⁵⁸ UwenʼuYesu ahamula ahati: Shʼizyenʼinyimba zili namashembo, Zyope ninyunyi zili niṿisanzo, nkandʼuwenʼuMwanamuntu wʼate napamo apa kusagamihʼitwe.

⁵⁹ Uwenʼahamuvuzyʼuwamwavo ahati: Undandatʼiwe. Pʼuwene ahati: Mwene, undeshe suti imbale ukusyilʼutata.

⁶⁰ UwenʼuYesu ahati: Uvaleshʼavafwe vavasyilajʼavafwe vavo. Iwe nyene uvale uhakumusyʼuvumwene vwa Mulungu.

⁶¹ Wope nuwamwavo ahati: Mwene, nane nkukulandata, leha suti mbalʼukuvalagʼavamwitu kuhaya.

⁶² UwenʼuYesu ahamuvuzya ahati: Uno wengʼakuvihʼumuhono pijembe, ilelo pe havili ajende nukwenya mwisinda, wʼatahondeye kuvumwene vwa Mulungu.