uLuuka 4 - Tesitamenti Umupwa 1965

Ukulingwa kwa Yesu

¹ UwenʼuYesu lwʼayizuyʼuMupepʼuMufinjile, pʼahafuma mu-Yolidani, uMupepo ahamulongola mulwugwa.

² Mwʼahalindʼamandʼamashumi gane. Pʼumukwalanzi ahamulinga. Shʼataliye naṿimo amanda gonti ganaga. Ilelo lwe gashilinkine pʼihamulumʼinzala.

³ Pʼahalinga pupʼumukwalanzi ahayanga nawo ahati: Inga nalyoli we Mwana wa Mulungu, pʼuyanje kwivwʼili liyipelajʼukuvʼuvugali.

⁴ PʼuYesu ahamula ahati: Lisimṿilwe lye likuti: Umuntu vutakumupʼuvulanzi vwe vugali vweka.

⁵ Pʼumukwalanzi ahazuva nawo pigambʼitali, ahamusontela pashezi insi zyonti zya vamwene vonti munsʼumu.

⁶ Umukwalanzi ahamuvuzya ahati: Nkukupa ukuva we muhatasho insi zyonti zinizi, nuvumwamu vwakwe vwonti, she vwane nenene, nkumupa wuyo wenga nkasime nene neka.

⁷ Ingʼukuputa kukwane lelʼiwe, pe zikuva zyaho wenewe zyonti.

⁸ PʼahamulʼuYesu ahati: Lisimṿilwe lye likuti: Putaga kwa Mwene uMulungu waho, wʼumuvombele wuyo weka.

⁹ Pʼahavala nawo ku-Yelusalemu. Mwʼahavalʼukumuviha patempeli pamwanya, ahayanga nawo ahati: Inga nalyoli we Mwana wa Mulungu, pʼufume panapa udomoshe pansi pala.

¹⁰ She lisimṿilwe lye likuti: Alikuhomelezezyagʼavahavizya vakwe, ava kuti vakusunje,

¹¹ havili lye likuti: vahanyatula munyove, ukutʼutapunule pivwʼishinama shaho.

¹² PʼahamulʼuYesu ahati: Havili lyope liyanzilwe nilya kuti: UtamulingajʼuMwenʼuMulungu waho.

¹³ Uwenʼumukwalanzi lwʼamazile lwontʼululingo lunulwo, pʼahamuleha, ahati: Inga lumo.

UYesu mu-Nazaleti

¹⁴ PʼuYesu ahavwela mumaha ga MupepʼuMufinjile ukuvala mu-Galilayi nohavili. Pʼahakumuha munsi yonti mwʼizyunguluye.

¹⁵ Pʼuwenʼahavasambilizya mumasinagogi gavo, vonti vahamutiniha.

¹⁶ Ahavalʼukufiha namu-Nazaleti, mwʼakuliye. Ahinjila musinagogi, inza shʼahonzyaga shima pisabati, ahavuhʼukuvazya pakalata.

¹⁷ Vahamupʼukalata wa Yesaya mukuvwi. Ilelo lwʼazunguluyʼukalata, pʼahaga pe lisimṿilwe lye likuti:

¹⁸ UMupepo wa Mwene ali papane, shʼampasile pakuti mbavuzyeʼinongwʼinyinzʼavapina; antumile nakuvakungwa ukuti mbavuzyʼukuti vasatulilwe, nakuvantonko ukuti vakwenya, nave valemenchelilwe ukuti mbasatule;

¹⁹ antumilʼatili uhapanjʼumwahʼumwinza wa Mwene.

²⁰ Ilelo pʼahazingʼukalata ahamuninchilizyʼumwimilizi ahatendama. Pʼaminso ga vonti musinagogi gahamutontomela wuyo.

²¹ Ilelo pʼuwenʼahanda ahati: Zye zisimṿilwe panapa zilunjisile lwe mukwiṿwa shinishi.

²² Pe vonti vahamuhomeshezya, vahasukumilʼamazwʼamatehamu ge gakufuma mwilomu lyakwe, vahati: Te mwana wa Yosefu uno?

²³ Ahavavuzya ahati: Imwe mulimbuzyʼumwivʼuno wʼakuti: We muganga, uyikantule wewe weka. Inza she gugo twiṿuyʼukuti upezile namu-Kapelinahumu ungatupelela gamo naswe swe va munumu mwʼukuliye.

²⁴ Uwenʼahati: Nalyoli nkuvavuzyʼine nkuti: Numʼumukuvwi atakuvahondelʼavantu mwʼakuliye.

²⁵ Nkuvavuzyʼizya nalyoli nkuti: Valʼavinji avantandʼavafwile mwa Yisilayili umu mumwahʼula wa Eliya, pala kumwanya kwah kwigalile amaha gatatu namezʼumutanda, pala panzala yaguyʼinyinji nkani munsi yonti.

²⁶ PʼuwenʼuMulungu atamutumile kuli woka wa munumu Eliya ndali, nkandʼahamutuma mu-Salepita munsi ya Sidoni kumwantandʼumufwile wa mumwo.

²⁷ Vope navamambombo valʼavinji mumwaha ula wʼalipʼElisa umukuvwi. Pʼatahamupozya numo wa mumwo, nkandi weka weNamani wa mu-Sili.

²⁸ Pe vahavinduha pupo ukuṿitwa vonti ve vali musinagogi lwe viṿuye zinizi.

²⁹ Pe vahavuha vahamushimbizya muhaya, vahavalʼukumuviha palungalagata lwʼigamba lye vazenzilʼinkaya yavo, vahati tumubunchilizyaje pansi.

³⁰ Uwene nyene ahatuha vwelele pahati pali vuvo, ahavala.

Ukushimbizyʼimpepʼinkandamanu

³¹ Pʼahihʼukuvala ku-Kapelinahumu, inkaya vimo ya mu-Galilayi, mwʼahavasambilizya shima pisabati.

³² Pe zihavahola muhati zyʼavavuzizye, shʼahaloleha lwʼakuyanga ukuva we Muhatamaha wuyo.

³³ Ilelo musinagogi mwʼalʼumuntu wa mpepʼimbivi inkandamanu. Wʼahapongomohʼizwʼipiti ahati:

³⁴ Ye! tuli vuli naswe nawe we Yesu wa mu-Nazaleti? Uyinzilʼukututupula? Nkumanyilʼine, she we Mufinjile wa Mulungu iwe.

³⁵ UwenʼuYesu ahayipilila ahati: Pumaga, ufume mumuntʼuno. Pʼimpepʼimbivi ihamupamizya pahati, ihafuma kukwakwe nakumuṿulazya napamo.

³⁶ Pʼishitetemwi shihavagwila vonti mwe vavaliye, vahavuzilizanya vahati: Lye lizwi vuli linili? Shʼimpepʼinkandamanu akuzipilila ilya vumwene ilya maha, izyene pe zikujenda nukufuma vwelele.

³⁷ Pʼuwenʼahakumuha munsi yonti iya mupipʼumu.

Ukuzuzuvuha kwa nyinaṿwala wa Simoni navanji

³⁸ Pʼahafuma musinagogi, ahavalʼukwinjila munyumba ya Simoni. Uwenʼunyinaṿwala wa Simoni avinile nkanʼinzegema. Pe vahamuvuzilizya vahati: Tutuvuli nawo?

³⁹ Pʼuwenʼahamwinamila, ahapililʼinzegema, pʼihamuleha. Pʼuwenʼumwantanda ahavuha nzila ahavavombela.

⁴⁰ Ilelo lwe likuswʼizuva, pe vonti ve vali navayeyevazu impungo zyonti, pe vahavaleta kukwakwe. Pʼuwenʼahavavihʼumuhono uno weka uno weka, ahavazuzuvushizya.

⁴¹ Zyope nimpepʼimbivi ahazyefwa kuvantʼavinji, zye zihavilishila lwe zikufuma zihati: Iwe we Mwana wa Mulungu. Uwenʼahazipilila ahati: Mutapangaje zinizi; she vamumanyile ukuva wʼuChilisiti wuyo.

⁴² Lwe kushiye kunzi shanzanche, pʼuYesu ahavuhʼukuvala mulwugwa. Pʼavantʼimpuga yonti vahamwaga, vahavalʼukufiha pupo pʼali, vahati tumugalusye atepaje mumwitʼumu.

⁴³ Uwene nyene ahavavuzya ahati: Munkaya mwonti nakunji nziyangajʼinongwʼinyinza zya vumwene vwa Mulungu, she zye zizyo ntumilwe.

⁴⁴ Pʼahavalʼukuzikumusya mwonti mumasinagogi munsi ya mu-Galilayi.