uLuuka 3 - Tesitamenti Umupwa 1965

UYohani umwozyi mukukumusya kwakwe

¹ Ilelo lwʼuTibeli ayinjiye mumwaha wa kuva wʼishumi nagasano amaha gakwe ga vukesali, lwʼuPonti Pilati ali musungansi ya Yudayi, lwʼuHelodi vamupiyʼuvumwene mu-Galilayi, lwʼuFilipu vamupiyʼuvumwene namw-Itulayi namu-Talakoniti, wope nuLusani lwe vamupiyʼuvumwene mw-Abilene,

² pala pʼavaHanasi nuKayifa vahavʼavashiputʼavapiti, pʼizwi lya Mulungu lihamwagʼuYohani, umwana wa Zahaliya mulwugwa.

³ Pʼuwenʼahavuhʼukuvala munsi yonti yʼipalamiye kwijenje lya Yolidani, ahakumusyʼulwozyo lwa lupinduho lwe lukuti mukuposhelʼuvuswila vwa malandu.

⁴ Inza she zizyo zisi-mṿilwe mwa kalata wa mazwi ga Yesaya umukuvwi ukuti: Izwi lya muvilishizi mulwugwa likuti: Simuyananye nidala lya Mwene, mugolosye nutuswatuho twakwe.

⁵ Inyema zyonti zifushilwaje, namagamba gonti gatelemulwaje, uvugombanu vugolohaje, amalandamazu gonti gayipelajʼukuvʼamadalʼamatambalusu.

⁶ Amavili gonti galiyenyʼuvuposhi vwa Mulungu.

⁷ Pʼahavavuzya vonti ve vavazilʼukwozelwa kukwakwe impuga yonti ahati: Mwe luho lwa njohʼimwe, unanʼavavuzizyʼimwe ukuti muliponʼuvuhalazu vwe vukwinza?

⁸ Muhomʼinsanga zye zihondeline nulupinduho. Mutandʼilya kuyiyanjila mweka ilya kuti: Iswe tuli nutata uAbulahamu. Muleshe mbavuzyʼine, shʼuMulungu ali namaha ga kumuvusizyʼuAbulahamu avana mumavwʼiga.

⁹ Yope nintemo yili kumazi kumakwi lwe lutanzi. Gontʼamakwi ge gatakuhomʼinsangʼinyinza galitemangwa, galitajilwa mumwoto,

¹⁰ Pe vahamuvuzilizyʼavantʼimpuga yonti vahati: Ilelo tutuvuli?

¹¹ Uwenʼahamula ahavavuzya ahati: Uno wengʼali namashati gavili, wʼamupanje lyoka wʼate nalyo nalimo. Wope nuno wengʼali niṿintu ṿwa kulya, wope ahonzyaje vovulo.

¹² Vahavala vope navasonkolamusonko ukwozelwa, vahamuvuzilizya vahati: We Musambilizi, ilelʼiswe tutuvuli?

¹³ Uwenʼahavavuzya ahati: Ukusanguzyʼumusonko kwe ndali ukupitilizyʼukusenda naṿwʼumuntu atavalajizizye.

¹⁴ Vahamuvuzilizya vope navasikali vahati: Ilelʼiswe tutuvuli? Uwenʼahavavuzya ahati: Iṿwa vantu kwe ndali ukusampa vusampa, kwe ndali ukumulonjelelʼumuntu izyʼilenga. Simuyanane nago ge malipilo ginyu.

¹⁵ Lwʼavantu vahagulililʼizya kwinza, lwe vahasivasiva mumoyo gavo izya Yohani, ukuti ingavanga uno wʼuChilisiti,

¹⁶ pʼuwenʼuYohani ahavavuzya vonti ahati: Ine nalyoli nkuvozezya ge minzi. Nkandʼakwinzʼuwene wʼandusizyʼamahʼine, uwene natwe tuhova twa mundyato zyakwe ntahondeyʼukusatulʼine. Wuyo nyene alivozezya muMupepʼuMufinjile namumwoto.

¹⁷ Wʼulupe luli munyove zyakwʼuwene, aliyusʼishaniho shakwe, ingana yʼaliviha mumulaza wakwe, ilyenʼilyelelo nyene lyʼalipemba mumwoto wʼatakuzima nalumo.

¹⁸ Vovulo nizinjʼinyinji zya kuvatontela ahavavuzya ninongwʼinyinza avantʼimpuga.

¹⁹ Wope nawe Helodi umwene uYohani ahamulongʼuwa pa-Helodiya umushi wa munine, ahalonga gonti nagʼatazile shimʼuHelodi aganji gonti ge gahamumena.

²⁰ Pʼuwene pali gonti ganaga pʼahonjezya nuwa kumwinjizya mujelʼuYohani.

Ukwozelwa kwa Yesu

²¹ Ilelo pe lwe vozilwe vontʼavantu, lwʼayozilwe nawe Yesu, lwʼuwenʼahaputa, pe kumwanya kuhiguha,

²² pʼuMupepʼuMufinjile ahamwishila ngati nkunda mumuvili. Lyope nizwi lihafuma kumwanya, likuti: We Mwana wane unkundwa, we nkuseshela kulʼiwe.

Uvulandatano vwa luho lwa Yesu

²³ UwenʼuYesu lwʼakutalihʼimbombo yakwe pʼamazilʼamahʼamashumi gatatu ukudila, vahamuyangʼukuvʼumwana wa Yosefu, umwana-Heli,

²⁴ umwana-Matati, umwana-Levi, umwana-Meliki, umwana-Yana, umwana-Yosefu,

²⁵ umwana-Matatiya, umwana-Amosi, umwana-Nahumu, umwana-Eseli, umwana-Nagayi,

²⁶ umwana-Mahati, umwana-Matatiya, umwana-Simeyi, umwana-Yoseku, umwana-Yoda,

²⁷ umwana-Yohanani, umwana-Lesa, umwana-Zelubabeli, umwana-Salatiyeli, umwana-Neli,

²⁸ umwana-Meliki, umwana-Adi, umwana-Kosamu, umwana-Elimatamu, umwana-Heli,

²⁹ umwana-Yoswa, umwana-Eliyezeli, umwana-Yolimu, umwana-Matati, umwana-Levi,

³⁰ umwana-Simeyoni, umwana-Yuda, umwana-Yosefu, umwana-Yonamu, umwana-Elyakimu,

³¹ umwana-Meleha, umwana-Mena, umwana-Matata, umwana-Natani, umwana-Davidi,

³² umwana-Yisayi, umwana-Obedi, umwana-Bohasi, umwana-Salima, umwana-Nahasoni,

³³ umwana-Aminadabu, umwana-Adimini, umwana-Alini, umwana-Hezeloni, umwana-Pelezi, umwana-Yuda,

³⁴ umwana-Yakobu, umwana-Yisikaka, umwana-Abulahamu, umwana-Tala, umwana-Naholi,

³⁵ umwana-Seluhi, umwana-Lagahu, umwana-Pelegi, umwana-Ebeli, umwana-Sala,

³⁶ umwana-Kenani, umwana-Alipakisati, umwana-Semu, umwana-Nwaka, umwana-Lameki,

³⁷ umwana-Metusala, umwana-Henoki, umwana-Yaleti, umwana-Mahalaleli, umwana-Kenani,

³⁸ umwana-Enosi, umwana-Seti, umwana-Adamu, umwana-Mulungu.