uLuuka 2 - Tesitamenti Umupwa 1965

Ukupapwa kwa Yesu

¹ Ilelo pe pamwaha wuyo pʼuKesali wʼali wʼuAvugusiti izina, ahahomelezya uluhomelezyo ulwa kuti vavazilwajʼavantu munsi yakwe yonti vasimbwaje pakalata.

² Ukuvazilwa ukutanzʼuku vahavazilwa pala pʼuKileni ahava musungansi wa mu-Sili.

³ Pe vahavala vonti ukusimbwa uno kunkaya yakwe, uno kunkaya yakwe.

⁴ Pe wope nu Yosefu ahafuma munsi ya mu-Galilayi munkaya ya mu-Nazaleti, ahavala munsi ya mu-Yudayi, munkaya ya Davidi ye vakuti mu-Betelehemu izina, shʼafumile munyumba namuluho lwa Davidi;

⁵ ukuti asimbwaje poka nuMaliya umuzinjilwa wakwe, wʼamwamile.

⁶ Ilelo lwe vali pupo, pe lihinzʼisiku lya kupapʼumwana.

⁷ Pʼahapapʼumwana uhatote umwanaṿuli. Ahamugwinchila namenda, ahamuviha mwisuva mwʼingʼombe zikulila, she patali napamʼapa kumuviha mwivanza.

⁸ Ilelo valipo vope navadimangʼonzi munsi yiyo. Ve vadiliye mwilisyo, vahasungʼamadimo gavo pavusiku.

⁹ Ve vahitushilʼuhavizya wa Mwene avimiliye, vahaga nuvumwamu vwa Mwene vukuvahozezya mwonti namwonti. Pe vahatetemʼishitetemwʼishipiti.

¹⁰ Uwenʼuhavizya ahayanga navo ahati: Mutatetemaje, she mbaleteyʼinongwʼinyinza iya kuseshela nkanʼavantu vonti.

¹¹ Shʼapafilwʼumusanyʼuno uMuposhi winyu, uChilisiti uMwene, munkaya ya Davidi.

¹² Ishi she shimanyilo kulʼimwe: Muliyagʼumwana agwinchililwe namenda, alambalaye mwisuva mwʼingʼombe zikulila.

¹³ Pe vahitushilʼapashezi, zili nawʼuhavizya impuga zya kumwanya inyinji, zye zikumutimʼuMulungu zikuti:

¹⁴ Ulushindiho luvanje kwa Mulungu kumwanya, nuvwihalo vuvanje munsi kuvantu vʼakuvashyela wuyo.

¹⁵ Pe lelʼavahavizya lwe vazuva kumwanya, pʼavadimangʼonzi vahavuzanya vahati: Shushi tuvale lelo ku-Betelehemu, twenyʼinongwa zye zilolesile, zyʼatuvuzizyʼuMwene.

¹⁶ Pe vahajendelezya luvilo luvilo ukuvala, vahaga nuMaliya nu-Yosefu numwana shʼalambalaye mwisuva mwʼingʼombe zikulila.

¹⁷ Ilelo lwe vamuwenyi, pe vahajenda nukulikumusya mwontʼizwi lye viṿuye ilya pamwanʼuno.

¹⁸ Pe vonti ve viṿuye vahasukumilʼamazwi ge vavavuzizyʼavadimangʼonzi.

¹⁹ UwenʼuMaliya nyene wʼahaviha gontʼamazwʼiga, ahagasiva mumwoyo wakwe.

²⁰ Pe vahavalʼavadimangʼonzi vahamutinihʼuMulungu, vahamutima pali zyonti nazye vawenyi nazye viṿuye zizyo zye vavuzilwe.

²¹ Ilelo lwe gashilinkinʼamanda umunana, lwe lyinzilʼilya kumuvola uvuvolwa, pe vahamupʼizina lya Yesu, lyʼalitasilʼuhavizya lwʼashilʼukuva muhati mwa nyina.

Ukumulolesyʼu Yesu mwa tempeli

²² Ilelo lwe gasilʼamanda gavo ge galʼumwiho, gʼahomelezizyʼuMose, pe vahavala nawo mu-Yelusalemu umwana vahamulolesya kwa Mulungu,

²³ inza she lilyo lisimṿilwe munkomelezyo zya Mwene lye likuti: Twontʼutwanʼutwanaṿuli tutwo twe vakutotehʼavanyina, twe tutashilwaje mfinjile kwa Mulungu,

²⁴ ukuti valetaje niṿwa kufinjila inza she lilyo lyope lisimṿilwe munkomelezyo zya Mwene lye likuti: Nga ngugu zivili, ngʼimbondo zivili.

USimeyoni nulwimbo lwakwe lwe lukuti: “Ukumbwezya nulusankano”

²⁵ Ilelo mu-Yelusalemu mumwo mwʼali wokʼumuntu wʼali wʼuSimeyoni izina; umuntʼuno alʼumugolosu ahamunyilagʼuMulungu; shima ahagulilila ulusuvizyo lwa Yisilayili, wope nuMupepʼuMufinjile ahava papakwe.

²⁶ UMupepʼuMufinjile amuṿumbuliye atili: Utalilolʼukufwʼiwe lwe suti utamuwenyʼuChilisiti wa Mwene.

²⁷ Wʼahavala mwa tempeli lwʼamusogozizyʼuMupepʼuMufinjile. Ilelʼavapafi va Yesu lwe vakwinjila nawʼumwana lwe vakuti tulandate nawʼumwiho wa munkomelezyo,

²⁸ pʼuwenʼahamusenda munyove, ahatinihʼuMulungu ahati:

²⁹ Shinishi we Muhataṿwonti ne muntu waho ukumbwezya nulusankano, inza she lilyo wayanzile.

³⁰ Shʼaminso gane gavuwenyʼuvuposhi vwaho,

³¹ vwʼuvuyaninye lwe vakwenyʼavantʼinkolo zyonti;

³² Uluhozyo lwa kuṿumbula kuvakunzi, ulutiniho lwa kulutinihʼuluho lwaho lwa Yisilayili.

³³ Nuyise nunyina vahasukumilʼamazwʼiga gʼahayanga kukwakwe.

³⁴ PʼuSimeyoni ahavalota ahamuvuzyʼuMaliya unyina ahati: Yenya, wununo we wa kuvagwisya nukuvimiha ve vinji mwa Yisilayili umu, we wa kuvʼumumfindango wa kudalinkanila,—

³⁵ iwe nyene ishipanga shilikulasa mwe muvulanzi shili fumizanya—ukuti insivo zya vinji zilolehajʼapazelu.

UHana

³⁶ Ali mumwo numukuvwi umwantanda, izina lyakwe ali uHana, umwana wa Fanweli, uwa luho lwa Aseli. Wʼagosifile nkanʼuvugosi. Pamulume wakwe pʼadiliyʼamaha gasano nagavili, lwafumile kuvulindu.

³⁷ Ilelʼumuzishe wununo wʼamazilʼamahʼamashumi umunana nagane, ahava mwa tempeli shima ahasita nukufuma mumwo, mukufunga namukuputa ahamuvombelʼuMulungu nashamusanya nashavusiku.

³⁸ Wope wununo ahapalamila musanya wununo, ahamusalifwʼuMulungu, ahavavuzya vonti ve vahagulililagʼukupokwa kwa Yelusalemu inongwa zyakwe.

Uvulumendo vwa Yesu

³⁹ Ilelo lwe vamazile zyonti zyʼuMwene alajizizye munkomelezyo zyakwe, pe vahavwela munsi ya mu-Galilayi munkaya yavo ya mu-Nazaleti.

⁴⁰ Uwenʼumwana ahakula, ahagoma, ahizulʼinjele, vwope nuvwila vwa Mulungu vuha va nawo.

⁴¹ Avene nyenʼavapafi vakwe vahajendaga shimʼamaha gonti ukuvala ku-Yelusalemu kwa chaka wa Pasa.

⁴² Ilelo pʼuwene lwʼamazilʼamahʼishumi nagavili, pe havili vahazuvʼukuvala inza she vahavalaga shima pachaka.

⁴³ Ilelo lwe gasilʼamanda ga chaka, lwe vavusilʼukuvala kuhaya havili, pʼuwenʼumwanʼuYesu ahasyala mwe mu-Yelusalemu, avenʼavapafi vakwe lwe vatamanyile.

⁴⁴ Avene vahasiva vahati ingavangʼali navamwitu ve vajenzite navo. Ilelo lwe vajenzitʼidala lyʼisiku lyoka, pe vahamwanza namuvajenzi namuvamwavo ve va vamanyile.

⁴⁵ Pe vahaga numo, pe vahagaluhʼukuvala ku-Yelusalemu, mwe vahamulondola.

⁴⁶ Ilelo lwe vamulondoyʼamanda gatatu, Pe vahamwaga mwa tempeli, mwʼatendime navasambilizi, vamuvishe pahati, ahavatejelezya nukuvavuzilizya.

⁴⁷ Nkandi vonti ve vahamwiṿwa, vahasukumila mukumanyinsanyʼinongwa namukuzyamula kwakwe.

⁴⁸ Avene lwe vamuwenyi, pe vahayengwa. Unyina ahamuvuzya ahati: She shonu vovulo we mwana wane we? Yenya, nuso nane tukulondoye nahavwe.

⁴⁹ Uwenʼahamula ahati: Mwananzaga shonu? Mutamanyilʼukuti mwe nkondeye ukuva muzya Tata umu?

⁵⁰ Avene nyene vatahalyaganyʼizwi lyʼahayanga.

⁵¹ Pʼahasogola navo vahihʼukuvala mu-Nazaleti. Uwenʼahasajilʼavapafi vakwe. Uwenʼunyina wʼahagaviha gontʼamazwi ganaga mumwoyo wakwe.

⁵² UwenʼuYesu ahaṿula nazye njele navwe vukuzi navwe vwankundwa kwa Mulungu nakuvantu.