Matayi 9 - Tesitamenti Umupwa 1965

Ukuzuzuvuha kwa washulu

¹ Pʼuwenʼahazuva mwivoti, ahalambʼukuvala munkaya yakwe.

² Pe vahamuleta wokʼuwashulu, vahamunyatula pashitala. UwenʼuYesu lwʼawenyʼulwitiho lwavo, pʼahayanga nawʼuwashulu ahati: Jimbaga we mwana wanʼiwe, she nswiliyʼamalandu gaho.

³ Pe vamʼavamanyakalata vahasiva muhati zyavo vahati: UnʼakusamulʼuMulungu.

⁴ UwenʼuYesu lwʼaziwenyi zye vali nazyo muhati, pʼahati: Zye mukusiva zyashi imbivʼizi mumoyo ginyu?

⁵ Lye lipupusu lili kwi nilya kuti: Nswiliyʼamalandu gaho, nilya kuti: Vuhaga ujendaje?

⁶ Nkandi ukuti mumanyaje ukuti uMwanamuntu ali namaha ga kuswilʼamalandu munsʼumu,—ilelo ahamuvuzya uwashulu ahati: Vuhaga, sendagʼishitala shaho, uvale kuhaya.

⁷ Pʼuwenʼahavuha, ahavala kuhaya.

⁸ Lwe vaziwenyi zinizʼavantʼimpuga yonti, pe vahatetema vahatinihʼuMulungu, wʼavapiyʼavantu amaha ganaga.

Ukwitwa kwa Matayi

⁹ Ilelo pʼuYesu lwʼapitiliye pupo, lwʼakujenda, pʼahenyʼumuntu wʼatendime pavusonkolamusonko we vatili uMatayi, ahamuvuzya ahati: Undandatʼine. Pʼuwenʼahamulandata.

¹⁰ Ayazile lelo lwʼatendime ukulyʼiṿintu munyumba, pe vahavala mwʼali navasonkolamusonko navatalamalandu ve vinji, vahatendama nuYesu navasundikwa vakwe ukulyʼiṿintu.

¹¹ AvenʼavaFalisayi lwe vamuwenyi, pe vahavuzilizyʼavasundikwa vakwe vahati: Umusambilizi winyu akulya vulʼiṿintu navasonkolamusonko navatalamalandu?

¹² Wuyo lwʼahiṿwa pʼahati: Avapuma vatakwanzʼumuganga nkandʼavavinu.

¹³ Muhavale muhamanye lye likuti: Lwe lupepelezyo lwe nkwanzʼine, ntakwanzʼimputile. She ntinzilʼukuvitʼavagolosʼine, ninzilʼukuvita ve vatalamalandu.

Ukusitakulyʼiyintu

¹⁴ Pe vahamuvuzilizyʼavasundikwa va Yohani vahati: Naswe navaFalisayi tukufunga shonu shimʼiṿintu lwʼavasundikwa vaho vatakufunga?

¹⁵ UwenʼuYesu ahavavuzya ahati: Pe vangasungama vulʼavalyaṿintu ṿwa pavusendamwantanda? Nkandi gakwinzʼamanda lwʼanyatulilwe kuli vuvo umusendamwantanda. Pala nyene pe valifungʼiṿintu.

¹⁶ Numʼatakupatihʼahapatikwa ha mwendʼumupwa pamwendʼumukali. She hatakuyanana pamwendʼumukali ndali, hakuzepulanya vwelele, ilelo pʼuwenʼumwenda akwonjezya ukuzepuha.

¹⁷ Shope nishinyanya sha mampensya numʼatakusota mumafuko amakali ga mampensya. Shenga vakusota mumwo pe gakuzepulʼamafuko, ilelo pʼagenʼamampensya gajende nukwitiha, gope namafuko gajende nukunanjiha. Ishenʼishinyanya sha mampensya vakusota mumafukʼamapwa ga mampensya, pe ṿwonti ṿikupona.

Umwana wa Yayili umulindu numwantanda wʼali nisha mwiho

¹⁸ Ilelo lwʼamakuvavuzya zinizi, pe vahaga akupalamila wokʼumusambilizi wavo umupiti akumusugamilila akuti: Umwana wanʼumulindu afuye shinishi. Nzagaga tuvale lelo kukwane, uhamuvishʼumuhonʼiwe, pʼalilandila.

¹⁹ PʼuYesu ahavuha ahamulandata poka navasundikwa vakwe.

²⁰ Ilelo pʼumwantanda woka wʼalimbiliye nisha mwiho amahʼishumi nagavili ahapalamila mwisinda, ahapalamansyʼamenda gakwe kuvupinte.

²¹ Shʼuwene muhati atili inga nkupalamansya ge menda gakwe nye, pe nkupola.

²² UwenʼuYesu ahasyetuha ahamwenya ahati: Jimbaga we mwana wanʼiwe, lukuzuzuvushizizyʼulwitiho lwaho. Pʼumwantanda ahazuzuvuha pahavalilizyo hanaha.

²³ IlelʼuYesu lwʼavazilʼukufiha munyumba ya musambilizi wavo umupiti, pʼahavaga mumwo navahomamalonji navantʼimpuga avalosyʼilosyo.

²⁴ Vʼahavavuzya ahati: Mufupuhaje, shʼahalindu hatafuye ndali, hakasitʼutulo. Avene pe vahamuseha.

²⁵ Ilelo lwe vavafumizye kunzʼavantu mwe vavaliyʼimpuga yonti, pʼahinjila munyumba, ahalemʼumuhono wakwe ahalindu pe hahavuha.

²⁶ Panongwa zinizi zihakumuha munsʼila yonti.

Avantonko vavili

²⁷ IlelʼuYesu lwafumile pupo, lwʼakujenda pe vahamulandatʼavantonko vavili, ve vahavilishila vahati: Utupepelezyaje we Mwana-Davidi!

²⁸ Ilelo lwʼayinjiye munyumba, pe vahapalamila kukwakwe avantonko vanava. PʼuYesu ahavavuzilizya ahati: Muli nulwitiho ukuti ndi namaha ukuvomba zinizi? Avene vahamuvuzya ahati: Ena, Mwene.

²⁹ Pʼuwenʼahapalamansyʼaminso gavo ahati: Mukuposhela inza she zizyo mwitisile.

³⁰ Pʼaminso gavo gahiguha. UwenʼuYesu ahavapilila nkani ahati: Mwandaje lelo, zye numʼatazyiṿwaje zinizi.

³¹ Avene nyene vahafuma kunzi, vahamukumusya munsʼila yonti.

Ushinunu havilʼuwa mpepʼimbivi

³² Lwe vafumile vanava, pe vahaleta kukwakwe uwamwavʼumuntu wʼali wushinunu, shʼali nimpepʼimbivi.

³³ Ilelo pʼuwenʼahafumwʼimpepʼimbivi, pe wʼali wushinunu ahayanga. Pe vahasukumilʼavantu mwe vavaliyʼimpuga yonti vahati: Zinizi zyalolesile nalumo mwa Yisilayili.

³⁴ AvenʼavaFalisayi nyene vahati: Impepʼimbivi akuzivinjila nusongo wa mpepʼimbivi.

³⁵ PʼuYesu ahazyungula, ahamalʼinkaya zyonti nutuhaya twonti, ahasambilizya mumasinagogi gavo ahakumusyʼintumʼinyinza ya vumwene; ahakantulʼuvupotwe nuvuvinu vwonti vwa vantu.

Uvwila vwa Chilisiti kuvantu

³⁶ Lwʼawenyʼavantʼimpuga, pʼahavafwilʼuvwila, she vasamusu vanyampine fwe ngʼonzi zye zite numudimi.

³⁷ Pʼahavavuzyʼavasundikwa vakwe ahati: Imṿuno ye nyinji, nkandʼavaṿuni vansi.

³⁸ Mulambilizyaje lelo kumuhatamṿuno, atumajʼavaṿuni mumṿuno yakwe.