Matayi 7 - Tesitamenti Umupwa 1965

Ukulongʼavanji

¹ Mutalongaje, ukuti namwe mutahalongwaje.

² She mumwo mwe mukuvalongʼavanji mwe namwe mulilongwa mumwo. Ishifinjilo shisho she mukuvalinjilʼavanji, she mulilinjilwa shisho namwenemwe.

³ Ukwenya hashʼahambaza he hali mwilyinso lya wamwinyu, shʼigambo mwilyinso lyaho utakulyenya?

⁴ Havili pe watinji uyanje vuli kuwamwinyu ukuti: Twiṿwe nkefwʼahambaza he hali mwilyinso lyaho, she nawʼigambo lili mwilyinso lyaho wenewe?

⁵ We mulumilengʼiwe, uyefwe sutʼigambo lye lili mwilyinso lyaho wenewe, inga pʼulingaje lelo ukwefwa wope nuwamwinyu ahambaza he hali mwilyinso lyakwe.

⁶ Shʼimfinjile mutazipanjʼimbwa. Uvwando vwinyu mutazitajilaje inguluve. Shʼizyene zikuvuhanyanjila niṿinama ṿwavo, havili zikugalunkana ukuvanyonkolanya mwenemwe.

Ukusimpa muluputo

⁷ Simulavaje, pe mulipelwa; simulondaje, pe muliyaga; simuhonyonsyaje kulwiji, pe muliyigulilwa.

⁸ She vonti ava venga vakulava, ve vakuposhela; vonti nava venga vakulondola, ve vakuṿwaga; vonti nava venga vakuhonyonsya kulwiji ve vakwigulilwa.

⁹ Imwe mwe muvaliye amwʼalipʼumuntu wʼakumupʼivwʼumwana wakwe, lwʼalaṿilʼumukati?

¹⁰ Wʼaku-mupʼinjoha lwʼalaṿilʼinswi?

¹¹ Apene lelo ngʼimwe, mwe vanyala vwelele, ingʼavana vinyu mukuvapʼiṿwinza namwe, pʼuSo wa kumwanya asitʼukupitilizya ukuvapʼiṿwinza vuvo ve vakulava kukwakwe?

Ululajizyo ulwinza nkani

¹² Ilelo zyonti zyenga mukasimʼukuti avantu vavavombelʼimwe, zye muvavombele zizyo namwe, she zye nkomelezyo navakuvwi.

Amadala gavili

¹³ Simutushʼukwinjila mushikwilo ishifinyanu, she shibabaye nishikwilo, libabaye nidala lye likuvala kwe kuvutupulwa, vinji ve vakujenda pupo.

¹⁴ Shifinyanu nishikwilo, lifinyanu nidala lye likuvala kuvulanzi, vansi vene ve vakulyaga.

Uvwanalyoli nuvulumilenga

¹⁵ Mwandajʼavakuvwi avilenga ve vali fwe ngati ngʼonzi munzi lwe vakwinza kumwinyu, muhati nyene impumpi inkali.

¹⁶ Mulivamanyila pansanga zyavo zye vakuhoma. Amwʼumuntu akuyavilʼamampensya pamachese? Amwʼumuntʼakutungulʼamakunyu pamansonya?

¹⁷ She gahonzizye vovulo gontʼamakwʼaminza, gakuhomʼinsangʼinyinza. Agenʼamakwʼamavivi nyene ge gakuhomʼinsangʼimbivi.

¹⁸ Ikwʼilyinza litakuhomʼinsangʼimbivi, lyope nikwʼivivi litakuhomʼinsangʼinyinza.

¹⁹ Gontʼamakwi ge gatakuhomʼinsangʼinyinza gakutemangwa, gakutajilwa mumwoto,

²⁰ mwe mumwo nkuti mulivamanyila munsanga zyavo.

Amazwi nimbombo

²¹ Te vonti ve vakuntahʼine vakuti: Mwene Mwene valiyinjila mushinamwene sha kumwanya, nkandi vonti ve vakuvomba zizyo zyʼakasimʼuTata wa kumwanya.

²² Pisiku lilʼavinji valimbuzya valiti: Mwene Mwene, amwe tutahakuvwaga mwizina lyaho? Amwe impepʼimbivi tutahazifumwaga mwizina lyaho? Amwe amamfindango ge minji tutahapelaga mwizina lyaho?

²³ Pe ndivavuzyʼapazelu nditi: Ntavamanyile nalumʼimwe, simwepe papane mwe mukuvomba zye zite munkomelezyo.

Inyalo zivili

²⁴ Ilelʼuno wengʼakwiṿwʼamazwi gane ganaga, uno wengʼakugalandata, we nkumuholanya nkuti ali fwe muntu wa njele wʼinyumba yakwe azenzile piyalavwe.

²⁵ Pʼihomoha nimṿula, gahizula namahava, yihaṿugula ninkungu, ṿwe ṿihabunchilʼinyumba yiyo, iyene nyene yihasita nukumongonkana, she yalizilwe piyalavwe.

²⁶ Nkandʼuno wengʼakwiṿwʼamazwi gane ganaga, havili atakugalandata, we nkumuholanya numupukupuku wʼinyumba yakwe azenzile palusenga.

²⁷ Pʼihomoha nimṿula, gahizula namahava, yihaṿugula ninkungu, ṿwe ṿihayibunchilʼinyumba yinino ilelo pʼiyene yihakumpuha yihamongonkana nkani.

²⁸ Vazile lelo lwʼamazilʼuYesu ukuyangʼamazwi ganaga, pʼavantu vonti mwe vavaliye mumpuga vahasukumila vahati: Kwe kuyanga vulʼinongwa!

²⁹ Shʼuwene lwʼakuyanga, alolesile ukuva we muhatamaha wuyo, atahayanga inza shʼavamanyakalata vavo.