Matayi 6 - Tesitamenti Umupwa 1965

Kufumiuʼipwa shikunzi kukwilu

¹ Mwandaje lelo izya vugolosu vwinyu mutazivombelaje mwe vakwenyʼavantu, lwe mukuti vasukumilaje vuvo, shenga lwe mukuhonzya vovulo, pe mutali niṿwa kuvalipila uSo kumwanya.

² Ilelo ingʼuvusilʼukuvapʼiṿwa shikunzʼavantu, utayihomelajʼamasaji inza she shima vakuhonzya avalumilenga mumasinagogi namumasolo, ve vakuti vatwenyelezyajʼavantu vatutimaje. Nalyoli lyoli nkuvavuzya nkuti: Vayinyatuliye nzila iṿwa kuvalipila.

³ Nkandʼiwe ingʼuvusilʼukuvapʼavantu iṿwa shikunzi, pʼumuhono waho wa kumumongo atalolaje huho hʼakuvombʼuwamwavo wa kumulilo,

⁴ iṿwa shikuku ṿwaho ṿivanje ṿwa kukwilu. PʼuwenʼuSo wʼakwenya nakukwilu alikulipila.

Uluputo lwa kukwilu

⁵ Pope lwe mukuputa mutahaputaje inza she vakuputʼavalumilenga. Avene vakuyisevelʼukwimilila mumasinagogi namunkomano zya madala ga munkaya, she vakuti vatulolajʼavantu. Nalyoli lyoli nkuvavuzya nkuti: Vayinyatuliye nzila iṿwa kuvalipila.

⁶ Nkandʼiwe ingʼuvusilʼukuputa, pʼuyinjile muhayumba haho aha kuziho, uyigalile nakushilyango, kwʼuputaje kwa So wʼali kukwilu, pʼuSo wʼakwenya nakwe kukwilu alikupanga.

⁷ Inga mukuputa mutahazumajʼahalanga inza shʼavakunzi vakuzumʼahalanga shʼavene vakuti pʼakutejelezya inga tukwatʼamazwi aminji.

⁸ Mutaholanaje navo. ShʼuSo aṿimanyile nzila ṿiṿwo ṿwe mukwanza lwe mushilʼukulava.

“Uluputo lwa Mwene”

⁹ Ilelʼimwe inga mukuputa pe mutinji: Tata witu wa kumwanya; izina lyaho lifinjilwaje,

¹⁰ uvumwene vwaho vwinzaje, zyʼukasimʼiwe zye zivombelwaje napansʼipa fwe kwe kumwanya.

¹¹ Niṿwa musanyʼunʼiṿintʼutupanje, tuyanane naṿwo.

¹² Uswile namalandu gitu, inza she naswe tukuswilʼamalandu ga vamwitu.

¹³ Utahatuvishe mulutazyo, nkandʼutuposhe nakumbivi. [She vwahʼuvumwene, namaha gaho, nuvupiti vwaho wenewe shimashima. Amen.]

¹⁴ Shengʼavantu mukuswilʼamalandu gavo, pe namwʼuSo wa kumwanya wope akuswilʼaginyu.

¹⁵ Nkandʼinga mutakuswilʼimwʼavantʼagavo, pe wope nuSo atakuswila ginyu.

Ukusitakulyʼiṿintu

¹⁶ Shenga mukufungʼiṿwa kulya, mutayiholanyaje navalumilenga ve vakuyiswimilizya kuminso shʼavene vakuyigalula kuṿweni she vakuti, mwe vatumanyilajʼavantu ukuti vafunzilʼiṿwa kulya shinishi. Nalyoli lyoli nkuvavuzya nkuti: Vayinyatuliye nzila iṿwa kuvalipila.

¹⁷ Nkandʼiwe ingʼukufungʼiṿwa kulya, pʼupahalaje kwitwe, ugezaje nakuminso,

¹⁸ ukuti avantu vatamanyaje ukuti ukufungʼiṿintu, akumanyaje weka we So wʼali kukwilu. PʼuSo wʼakwenya nakukwilu alikulipila.

Insavo ya nalyoli

¹⁹ Mutayilonchelʼiṿwuma iṿwa kulundila munsi umu, mwe ninyenze zikudovola nuvusimu vukulya, mwe naviva vakuhana vakwiha.

²⁰ Simuyilonchelʼiṿwuma iṿwa kulundila kumwanya, kwe ninyenze zitakudovola nuvusimu vutakulya, kwe naviva vatakubana vatakwiva.

²¹ She kwe shilʼishuma shaho, kwʼali wopʼumwoyo waho.

Uvuzelu nishisi

²² Inyale ya muvili waho lye lyinso. Ilelo shengʼilyinso lyaho lizelu, pe wope numuvili waho akuva muzelu.

²³ Nkandʼingʼilyinso lyaho livivi, pe wope numuvili waho akuva nishisi. Nkandi inyale yʼili mumwaho inga ye shisi, pʼishisi shikulusyʼuvumwamu!

²⁴ Numʼatamanyile ukuvavombelʼavamwene vavili. Pamo angamupata wokʼuno, pʼangamukundʼuwamwavʼula; pamo angamwumishizya wokʼuno, pʼangamusyoshelʼuwamwavʼula. Mukupotwʼukuvavombela ve vavili nuMulungu nuvudumbwe.

Amaganigani nukumusuvilʼuMulungu

²⁵ Mwe mumwo nkuvavuzya nkuti: Mutakutanajʼuvulanzi vwinyu iṿwa kulya niṿwa kungʼwela, havili namavili ginyu aga kuzwala. Nuvulanzi niṿintu, amwe vute vupiti vwe vulanzi, numuvili naga kuzwala, amwe ate mupiti we muvili?

²⁶ Simwenyʼinyunyi zya kumwanya. Shʼizyene pope nashe zitakuvwala, nashe zitakuṿuna, nashe munkoma zitakusezezya, popʼuwenʼuSo wa kumwanya akuzizuvilʼiṿintu. Imwe lelo mutakuzilusyʼizyenʼuvugomu?

²⁷ Unanu mulʼimwe amanyilʼukuyonjezya inga hahono hoka vwelele kuvutali kuvulanzi vwakwe?

²⁸ Namenda ga kuzwala mukukutana shonu? Simunyatulʼinjele muvwezya vwa mwilala she vukumela. Shʼuvwene vutakuyimbʼimbombo, vutakupota.

²⁹ Nkandʼine nkuvavuzya nkuti: Wope nawe Solomoni muvupiti vwakwe vwonti atakwasite nalumo fwe vwokʼuvwezyʼuvu.

³⁰ Apene lelʼuMulungu ingʼazwisile vovulo isole lya mwilala lyʼumusanyʼuno lilipo lye indavi likupwʼulupwa, pʼatinji asitʼukupitilizyʼukuvazwihʼimwe lelo, mwe valwitihʼulupupusʼimwe?

³¹ Mwe mumwo nkuti mutakutanaje ukuti: Tuṿwaje kwi niṿwa kulya niṿwa kungʼwela, tugaje kwi naga kuzwala?

³² She ṿwonti ṿiniṿi ṿwe vakwanzʼavakunzi, shʼimwʼuSo wa kumwanya aṿimanyile nzila ṿwontʼiṿwa kuti muve naṿwo.

³³ Nzila mwanzajʼishinamwene shakwe Mulungu nuvugolosu vwakwe, vwe vutalile vuvwo, pe muliyaga ṿwonti naṿiniṿi akuvonjezya pamwanya.

³⁴ Mwe mumwo mutakutanaje nzila iṿwa ndavi, shʼilya ndavi likuyikutanilʼiṿwakwe. Amanda gonti gali nuvupotwe ilʼuvwakwe ilʼuvwakwe.