Matayi 5 - Tesitamenti Umupwa 1965

“Ukukumusya kwʼizwi pigamba”

¹ Uwene lelo lwʼavawenyʼavantʼimpuga, pʼahazuva pigamba ilelo lwʼatendime pupo, pe vahapalamilʼavasundikwa vakwe.

² Pʼahavusyʼilomu ahavasambilizya ahati: Intimo zya vasangalusu

³ Vasangalusu vuvo ve vapina mumupepo wa muhati, she vʼishinamwene sha kumwanya shavo.

⁴ Vasangalusu vuvo ve vakusungama, she valipumilizilwa.

⁵ Vasangalusʼavatelefu, shʼinsi yonti vupwano vwavo.

⁶ Vasangalusu ve ninzala nishinyoto sha vugolosu shikuvaluma, she valiyikuta.

⁷ Vasangalusu vuvo vʼulupepelezyo lukuvalema muhati, she valiyagʼulupepelezyo vope.

⁸ Vasangalusʼavamoyʼamazelu, she valimwenyʼuMulungu.

⁹ Vasangalusʼavapelavwihalo, she ve valiyitwa vana va Mulungu.

¹⁰ Vasangalusu vuvo ve vakuṿwimilwa she vagolosu, she vʼishinamwene sha kumwanya shavo.

¹¹ Mwe vasangalusʼimwe ingʼavantu vakuvaliga, inga vaku-vaṿwima, inga vakuvayanjila havivi izyʼilenga she mwe vantu vanʼine.

¹² Simuseshele mudovele she iṿwa kuvalipila ṿwinji kumwanya. Nkwe she vahonzizye vovulo ukuvaṿwima navakuvwi vonti, lwe mushili namwenemwe.

Insambilizyo kushiholanyo shʼiveya nisha nyale

¹³ Mwe liveya lya nsʼimwe. Apene lelʼingʼiveya lisufile, amwe pe ṿilipo lelo iṿwa kulihozya? Pe lite nimbombo nimo, pe pakuti litagwaje kunzi, valisyusyutanye niṿinamʼavantu.

¹⁴ Mwe luhozyo lwa nsʼimwe. Inkaya yʼili pamwanya pigamba yitakuvwama.

¹⁵ Yope ninyale ingʼumuntu ayiholelezizye, pe vatakuyikupishila nishivo ndali, vakuyiviha pamwanya pashilemo sha nyale, ilelo pʼikuvahozezya vonti ve vali munyumba.

¹⁶ She lwahaje vovulo lelo uluhozyo lwinyu lwe vakwenyʼavantu, pe valimutimʼuSo wʼali kumwanya, lwe vawenyʼimbombo zyinyʼinyinza zye mukuvomba.

Inkomelezyʼlukali ninkomelezyo zya Yesu

¹⁷ Mutasivajʼukuti: Ingavangʼayinzilʼukuvindula ninkomelezyo navakuvwi ine. Ntinzilʼukuvindulʼine ndali, ninzilʼu-kulunjisya.

¹⁸ Nalyoli lyoli nkuvavuzyʼine nkuti: Ukufiha pupo pe zilimongolwa niya kumwanya niya pansʼinsi hatakumongoha nahamo naha-i nahagwanule ahansi aha munkomelezyo. Zikwinza suti zyonti.

¹⁹ Uno wengʼakuvindula hoka vwelele ahahomelezyo nukuvasambilizyʼavantu vovulo, wʼalitashilwa munsi kuli vonti mushinamwene sha kumwanya. Nkandʼuno wengʼakuzilandatʼinkomelezyo nukusambilizyʼavantu, wʼalitashilwa ukuva mupiti mushinamwene sha kumwanya.

²⁰ She nkuvavuzyʼine nkuti: Uvugolosu vwinyu inga vutalusizyʼuvugolosu vwa vamanyakalata nuvwa vaFalisayi pe mutaliyinjila mushinamwene sha kumwanya.

Uvupitwe nuvugozi

²¹ Mwiṿuyʼukuti vavuzilwʼavalulwo ukuti: Utahagoje. Uno wengʼakugogʼumuntu we wa kulongwa.

²² Nkandʼine nkuvavuzya nkuti: Uno wengʼakumuṿitililwʼuwamwavo, we wa kulongwa, uno wengʼakumusufwʼuwamwavo akuti we njunjʼiwe, wʼatazilʼumulandu wa kulongwa mubalaza, uno wengʼakuligʼuwamwavo akuti we lipukupuku, we wakutajilwa mugehena lya mwoto.

²³ Iwe lelo ingʼuvusilʼukufinjila vimo pashifinjilo pupo lwʼukukumbuha ukuti uwamwinyu ali nahafwishi kukwaho,

²⁴ pʼuṿileshe suti pupo kunsi kushifinjilo viṿwo ṿwʼulesitʼiṿwa kufinjila, uvale sutʼiwe ukukundana nuwamwinyu, inga pʼuyinzʼukufinjila ṿiṿwo ṿwʼulesitʼukufinjila.

²⁵ Utontaje luvilo luvilo numulonjelezi waho, lwe muli mwenti mwidala, uyo umulonjelezi atahakutwale kumulonzi, numulonzi atahakutwale kumusikali, utahatajilwe mujela.

²⁶ Nalyoli lyoli nkuvavuzyʼine nkuti: Utalifuma mumwo lwʼutalifile nahahela aha kumpelela.

Uvuhandamanu

²⁷ Mwiṿuyʼukuti liyanzilwe lye likuti: Utahavembuhaje.

²⁸ Nkandʼine nkuvavuzya nkuti: Uno wengʼakwenyelezyʼumwantanda nukumusungwa, wʼavembusile nawo mumwoyo wakwe.

²⁹ Ilelʼingʼilyinso lyaho lya kumulilo likukupuṿwʼiwe, pʼulyipe ulitagaje. She pʼukuva we mwinza, inga hakufwa ahantu hoka aha mumuvili waho, ukuti uwenʼumuvili waho wonti atahatajilwe mugehena.

³⁰ Havilʼumuhono waho wa kumulilo ingʼakukupuṿwʼiwe, pʼuwudumulaje uwutagaje. She pʼukuva we mwinza inga hakufwʼahantu hoka aha mumuvili waho, ukuti uwenʼumuvili waho wonti atahatajilwe mugehena.

³¹ Lyope liyanzilwe ilya kuti: Uno wengʼakutavulʼumushi wakwe, uyo amupanjʼukalata wʼitalaka.

³² Nkandʼine nkuvavuzya nkuti: Uno wengʼakumutavulʼumushi, nashengʼatatazilʼumulandu wa kuvembuha, pʼamupeleyʼukuva wa kuvembuha. Havili wengʼakumusenda we vamutavuyʼavamwavo, pʼavembusile.

Iyilapo nuvusuvilwa

³³ Havili mwiṿuye ukuti vavuzilwʼavalulwo ukuti: Utalapajʼizyʼilenga, nkandʼumutwalilʼuMwene ṿwengʼumulapiye, ṿwʼutili nkumutwalila.

³⁴ Nkandʼine nkuvavuzya nkuti: Utalapilaje muhamo, utatinji “inza she nakumwanya” she shitengo sha Mulungu,

³⁵ utatinji “inza she pansʼipa”, she hatengo ha ṿinama ṿwa wuyo, utatinji “inza she namu-Yelusalemu”, she ye nkaya ya mwene umupiti;

³⁶ utalapilajʼilya kuti “inza she ndi nitwe”, she nulusisi nalumo utamanyile nukuluzelufwa nukulwilufwa iwe.

³⁷ Muyanje lye likuti “ena” inga mukwitiha, nilya kuti “ndali” inga mukuhana. Aga kwonjezya pamwanya pali gugo gafumile mumuvivi.

Ukugalushizanya imbivi pambivi

³⁸ Mwiṿuye ukuti liyanzilwe ilya kuti: Ukulanduzanya nilyinso palyinso nilyino palyino.

³⁹ Nkandʼine nkuvavuzya nkuti: Mutalwanje nawʼumuntʼumuvivi. Uno wengʼakukuhomʼikofi kuvudili vwa kumulilo, wʼumugalulile nuvwamwavo vwope.

⁴⁰ Uno wengʼakuti imulanduzyʼishatʼiwe akuti lye ndinyatule, wʼumupanje ninkanzu.

⁴¹ Uno wengʼakukuṿijilizyʼidala ulutala lwoka, wʼujende nawo zivili.

⁴² Uno wengʼakulavʼiṿwa kulava kukwaho, wʼumupanje. Uno wengʼakwanzʼukupava yimo kukwaho, wʼutamugunjile.

Ishikunzi numwatʼumwinza

⁴³ Mwiṿuyʼukuti liyanzilwe ilya kuti: Mukundane nuwamwinyu, mupatane numulugu.

⁴⁴ Nkandʼine nkuvavuzya nkuti: Muvakundajʼavalugu vinyu, muvaputilaje nave vakuvaṿwima.

⁴⁵ Pe mukuva mwe vana va So wa kumwanya. Shʼuwenʼizuva lyakwe akuvatukuzizya navavivi navinza, imṿula yakwe akuvatonyelezya navagolosu navagombanu.

⁴⁶ Apene inga muvakunzite vuvo ve vavakunzite namwe, pe mulonsilʼamalipilo vuli? Avenʼavasonkolamusonko amwe vatakuhonzya vovulo?

⁴⁷ Havili inga mukulamunkana mwe vuvo vatupu mwe vanamuntu, pe mukuvomba zinizi hamo aha kulusya? Avenʼavakunzi vatakuhonzya vovulo vope?

⁴⁸ Mwe mumwo lelo muvanje mwe vila, inza she wope nuSo wa kumwanya mwila.