Matayi 4 - Tesitamenti Umupwa 1965

Ukulingwa kwa Yesu mulugwa

¹ IlelʼuMupepo ahamusogozyʼuYesu mulwugwa ukuti alingwaje numukwalanzi.

² Ilelo lwʼadiliyʼamandʼamashumi gane vusitakulya naṿimo nashamusanya nashavusiku, pʼihamulumʼinzala.

³ Pʼuwa kumulinga ahapalamila kukwakwe ahayanga nawo ahati: Inga nalyoli we Mwana wa Mulungu iwe, pʼuyanje kumavwʼiga gayipelajʼukuvʼuvugali.

⁴ Uwenʼahamula ahati: Lisimṿilwe lye likuti: Umuntu vutakumupʼuvulanzi vwe vugali vweka, nkandi amazwi ge gakufuma mwilomu lya Mulungu, gugo ge gakumupʼuvulanzʼumuntu.

⁵ Pʼumukwalanzi ahasogola nawo munkayʼimfinjile, mwʼahamuviha pamwanya patempeli,

⁶ ahamuvuzya ahati: Inga nalyoli we Mwana wa Mulungu, pʼudomoshe pansi pala, she lisimṿilwe lye likuti: Alikuhomelezezyagʼavahavizya vakwe, ve vahanyatula mumahono gavo, ukutʼutapunule pivwʼishinama shaho.

⁷ UwenʼuYesu ahamuvuzya ahati: Havili lyope lisimṿilwe lye likuti: UtalingajʼuMwene uMulungu waho.

⁸ Havilʼumukwalanzi ahasogola nawo pigambʼitali nkani, pʼahamulanganizyʼinsi zya vamwene vonti munsʼumu nuvwinza vwakwe,

⁹ ahamuvuzya ahati: Ṿwe nkukupa ṿwonti ṿiniṿi ingʼukusugamila pansi, nukuputa kukwane.

¹⁰ PʼuYesu ahamuvuzya ahati: Yepaga panapa we Setano iwe, she lisimṿilwe lye likuti: Putaga kwa Mwene uMulungu waho, wʼumuvombele wuyo weka.

¹¹ Pʼumukwalanzi ahamuleha, navahavizya vahaloleha vakwinza ukumuvombela.

UYesu akutendama mu-Kapelinahumu ya mu-Galilayi

¹² IlelʼuYesu lwʼayiṿuyʼukuti uYohani vamulemile, pʼahashimbila mu-Galilayi.

¹³ Ahepa mu-Nazaleti ahavalʼukudila mu-Kapelinahumu kushipuma sha sumbi munsi ya Zabuloni niya Nafutali;

¹⁴ mwe mumwo zilunjisile zizyo zyʼayanzilʼuYesaya umukuvwi wʼatili:

¹⁵ Ninsi ya Zabuloni ninsi ya Nafutali, zye zipalamine nusumbi, niya mwisyila lila lya Yolidani, Galilayi ya vakunzi,

¹⁶ avantu ve vatendime mushisi vawenyʼuluhozyʼulupiti, vope nave vatendime namunsi namwizyungululu lya vufwe luvatukuliyʼuluhozyo.

UYesu akwandʼukukumusya

¹⁷ Pʼahanda pupʼuYesu ukukumusya ukuti: Simupindushe, she vwinzilʼuvumwene vwa kumwanya, vuli papipi.

Akwita avasundikwa vakwʼavalanzi

¹⁸ IlelʼuYesu lwʼakujenda kushipuma sha sumbi wa muGalilayi pʼahagʼavanamuntu vavili, nuSimoni we vakumutaha ilya Peteli, numuzuna wakwe uAndeleya, ahaga vakutajilʼulwelo lwavo mwa sumbi she vali vaṿuṿi.

¹⁹ Pʼahavavuzya ahati: Simundandate mwisinda, shinishi nkuvapela ukuva mwe vaṿuṿi va vantu.

²⁰ Avene pe vahaleha pupʼinyelo zyavo luvilo luvilo, vahamulandata.

²¹ Ilelo lwafumile pupo lwʼakujenda, pʼahagʼavamwavo avanamuntu vavili, nuYakobu umwana-Zebedayi nuYohani umuzuna wakwe, ahaga vakusopʼinyelo zyavo mwivoti nuyise uZebedayi. Vope ahavita.

²² Avene luvilo luvilo vahaleha pupʼivoti lyavo nuyise, vahamulandata wuyo.

Akuzyungula mu-Galilayi nukuvombʼimbombo

²³ UwenʼuYesu ahajenda ahamalilizya iGalilayi yonti, ahasambilizya mumasinagogi gavo, ahakumusyʼintumʼinyinza ya vumwene, nimpungo zyonti ahazikantula nuvupotwe vwonti.

²⁴ Ahakumuha mwonti mu-Sili. Vahamutwalila vonti ve vavinilʼimpungo, nave vapositwʼuvupotwe, nave vahavavwaga amavili, nave vali nimpepʼimbivi, nave vali nishinzilisi navashulu, vontʼahavazuzuvushizya.

²⁵ Vahamulandatʼavantʼimpugʼimpiti ve vafumile mu-Galilayi namu-Dekapoli namu-Yelusalemu namu-Yudayi namwisyila lila ilya Yolidani.