Matayi 3 - Tesitamenti Umupwa 1965

UYohani umwozyi nukukumusya kwakwe

¹ Ilelo pe pamanda gala pʼahalolehʼuYohani umwozyi ahakumusya mulwugwa lwa mu-Yudayi

² ahati: Simupindushe, she vwinzilʼuvumwene vwa kumwanya, vuli papipi.

³ Uno lelo we wuyo wʼamuyanjiyʼuYesaya umukuvwi lwʼatili: Izwi lya muvilishizi mulwugwa likuti: Simuyananye nidala lya Mwene, mugolosye nutuswatuho twakwe.

⁴ UwenʼuYohani ahazwalagʼinkanzu ya vusepe vwa ngamila, ahayifungagʼilamba lya luhova mumusana. Iṿintu ahalyanga numakanta nuvwushi vwa nzushi.

⁵ Pe vahavala pʼali ava mu-Yelusalemu nava mu-Yudayi insi yonti, navamunsi yonti yʼipalamiye kwijenje lya Yolidani.

⁶ Vahaṿumbulʼamalandu gavo. Pʼuwenʼahavozya mwijenje mwa Yolidani.

⁷ Ayazile lelʼuwene navaFalisayi navaSadusayi ve vinji vakuvala kukwakwe ukwozelwa, pʼahavavuzya ahati: Mwe luho lwa njohʼimwe, unanʼavavuzizyʼimwe ukuti muliponʼuvuhalazu vwe vukwinza?

⁸ Muhomʼinsangʼinyinza zye zihondeline nulupinduho.

⁹ Mwandajʼukuyiyanjila mweka ukuti: Iswe tuli nutata uAbulahamu. Leshʼimbavuzyʼine shʼuMulungu amanyilʼukumuvusizyʼuAbulahamu avana mumavwe iga.

¹⁰ Yope nintemo yili kumazi kumakwi lwe lutanzi. Gontʼamakwi ge gatakuhomʼinsangʼinyinza galitemangwa galitajilwa mumwoto,

¹¹ Ine ne nkuvozezya ge minzi ga lupinduho, uwene nyene wʼakwinza mwisinda mumwane, wʼandusizye namaha, ntahondeyʼukunyatulʼindyato zyakwe. Wuyo nyene alivozezya muMupepʼuMufinjile namumwoto.

¹² Wʼulupe luli munyove zyakwe, aliyusʼishaniho shakwe, uvulezi vwakwe aliviha mumulaza, nkandʼilyelelo alipemba mumwoto wʼatakuzima nalumo.

Ukwozelwa kwa Yesu

¹³ PʼuYesu ahafuma mu-Galilayi ahavala kwa Yohani ku-Yolidani ahati wʼanozyaje.

¹⁴ UwenʼuYohani ahanzʼukumudindila ahati: Ntahondeye. Ine nkwanzʼunozye wewe, nkandʼiwe ukwinza kukwane?

¹⁵ UwenʼuYesu ahamula ahati: Yitihaga shinishi she tuhondeye nkumalilizya vovulo zyontʼizya muvugolosu. Pʼahitiha.

¹⁶ Ilelo lwʼayozilwʼuYesu pʼahafuma muminzi luvilo luvilo. Pʼahitushila kumwanya kwigusile, ahagʼuMupepo wa Mulungu akumwishila ngati nkunda.

¹⁷ Yenyi, nizwi likufuma kumwanya likuti: Wuyo we Mwana wane unkundwa we nkuseshela muli wuyo.