Matayi 2 - Tesitamenti Umupwa 1965

Avasimisi vakumusogolelʼuYesu

¹ IlelʼuYesu lwʼapafilwe mu-Betelehemu ya mu-Yudayi pamwahʼuwa kuva wʼumwenʼuHelodi, pe vahaloleha mu-Yelusalemu avasimisi ve vafumile kuvutukulo vwʼizuva.

² Ve vahavuzilizya vahati: Ali kwi umwene wa vaYuda wʼapafilwe shinishi? She tuwenyʼuluzota lwakwe kuvutukulo vwʼizuva, ilelo pe twinzilʼukumusugamilila.

³ UmwenʼuHelodi lwʼayiṿuye zinizi, pʼahaganduha nkani ahatentwa muhati, vope nava mu-Yelusalemu inkaya yonti vahaganduha poka nawo.

⁴ Pʼahavavunganiha vonti navashiputʼavapiti navamanyakalata va vana-Yisilayili ahavavuzilizya ahati: Amwe mwi mwe vatili alipapwʼuChilisiti?

⁵ Avene vahamuvuzya vahati: Mwe mu-Betelehemu ya mu-Yudayi, she lyʼasimṿilʼumukuvwi wʼatili:

⁶ Nawe we Betelehemu iwe, we nsi ya mwa Yuda, utatinji ne munsʼine kuvalongozi va mwa Yuda. Shʼalifuma mumwaho wenewe uwenʼuMulongozi wʼalivadimʼavaYisilayili avantu vane.

⁷ PʼuHelodi ahavita kukwilu avasimisi, ahavavuzilizyʼuvusiku vwe lwalolesilʼuluzota.

⁸ Ilelo ahavasontelezya mu-Betelehemu ahati: Muvale mwanze nkanʼumwanʼuno. Ilelʼinga muvazilʼukumwaga, pe mwinzʼukumbuzyʼine, nanʼukuti imbalʼukumusugamilila.

⁹ Avene lelo lwe viṿuye zizyo zyʼavavuzizyʼumwene, pe vahavala. Vahaganduhʼuluzota lwe valuwenyi nakuvutukulo vwʼizuva luvalongoleye kwilongolela vahaga lukwimilila pamwanya pe palʼumwana.

¹⁰ Ilelo lwe vawenyʼuluzota pe vahaseshela nkani.

¹¹ Pe vahinjila munyumba, mwe vahagʼumwana nuMaliya unyina, vahasugamila pansi, vahamushindiha vahafungululʼiṿwuma ṿwavo, vahamupʼiṿwa sahabu niṿwa kusushizya numulembʼumuhali we vakuti wʼumila.

¹² Uwe-nʼuMulungu ahavavuzya munjozi ahati: Mutavuyilaje kwa Helodi. Pe vahajendʼidala ilyamwavo ukusogola kuhaya.

Ukushimbilila mw-Egipiti

¹³ Lwe vasogoye lelʼavene, pʼuYosefu ahaganduhʼuhavizya wa Mwene akumwitushizya munjozi akumuvuzya akuti: Vuhaga usendʼumwana nunyina, ushimbilile navo mw-Egipiti, mwʼuhavanje mumwo, uhafishe pisiku lilyo lye ndikuvuzya nene. ShʼuHelodi akwinzʼukwanzʼumwana, ukuti amugoje.

¹⁴ Pʼuwenʼahavuha, ahasendʼumwana nunyina shavusiku, ahashimbilila navo mw-Egipiti.

¹⁵ Ahava mumwo ukufiha pala pʼafuyʼuHelodi, ukuti zilunjihaje zizyo zyʼuMwene ayanzile mumukuvwi wʼatili: Imwisite mw-Egipiti umwana wane.

UHelodi akubudʼavana va mu-Betelehemu

¹⁶ IlelʼuHelodi lwʼayazile vamuhofilʼavasimisi, pʼahaṿitwa nkani. Ahatuma avakuvagoga vontʼavacheche navamuhaya mu-Betelehemu navamunsi yonti mwʼizyunguluye, vahafuma navo pamaha gavili vahinzʼukupelela patuzelu, pamaha gugo ge vamusimishizizyʼuHelodi avasimisi.

¹⁷ Pala zihalunjiha zizyo zyʼayanzilʼuYelemiya umukuvwi lwʼatili:

¹⁸ Inkutʼikusitwe mu-Lama, kwe kukuta kutupu, kwe kulosya kutupu, uLaheli akukutilʼavana vakwe, akusita nukupumilizilwa, she vatezile nzila.

Ukugaluha ukufuma mw-Egipiti

¹⁹ Ilelo lwʼafuyʼuHelodi pʼuhavizya wa Mwene ahamwitushizya munjozʼuYosefu mw-Egipiti ahamuvuzya ahati:

²⁰ Vuhaga numwana nunyina, uvasende uvale navo munsi ya vana-Yisilayili. She vafuye vuvo ve vanzagʼukumugogʼumwana.

²¹ Uwene pʼahavuha ahavasenda numwana nunyina, ahavala navo munsi ya vana-Yisilayili.

²² Ilelo lwʼayiṿuyʼukuti uAlikilavusi apwaniye palʼuyise uHelodi ukuva wʼumwene mu-Yudayi, pʼahogopa ukuvala mumwo. Ilelo lwʼayanzile nawʼuMulungu munjozi, pʼahapitilizanya ahafiha munsi ya mu-Galilayi.

²³ Ilelo lwʼavazilʼukufiha mumwo, pʼahazenga munkaya yimo ye vakuti mwe mu-Nazaleti. Mwe mumwo zihalunjiha zye vayanzilʼavakuvwi ve vatili: Akutashilwʼukuva we wa mu-Nazaleti.