Matayi 18 - Tesitamenti Umupwa 1965

Insambilizyo muvwahayisye

¹ Pahavalilizyo huho pe vahapalamila kwa Yesu avasundikwa vakwe vahati: Umupiti mushinamwene sha kumwanya amwʼunanu?

² Pʼuwenʼahitʼumwana ahamuviha pahati,

³ ahavavuzya ahati: Nalyoli nkuvavuzyʼine nkuti: Inga mutakuyandula, inga mutakuyipelʼukuva fwe vana, pe mutaliyinjila mushinamwene sha kumwanya.

⁴ Nkandʼuno wengʼakuyisya weka, akuyipelʼukuva fwe mwana wununo, wʼakuva mupiti mushinamwene sha kumwanya.

⁵ Uno wʼakuposhela wokʼumwana wʼali fwe wununo, ingʼakumuposhela mwe mwizina lyanʼine, wʼamposheleye nenene.

Insoshe kuli ve vakupunuzyʼavanji

⁶ Nkandʼuno wengʼakupunuzya wokʼuwa vansʼiva ve vakunitihʼine, wʼahondeyʼukukunjilwʼulwala kunsingo ulwa kuvalʼukumudwiṿwa mwa sumbi mwe mwiviye.

⁷ Ye mwe we nsi, impunuzyo zya kuvapunuzyʼavantu! shʼimpunuzyo zye zitakudumuha ndali, zikuva. Nkandi ye mwe we muntu wʼukuletʼulupunuzyo!

⁸ Mwe mumwo lelo ingʼumuhono waho woka, ingʼishinama shaho shoka shikukupunuzya, pe dumulaga ushitaje! She nukuvalʼukwinjila muvulanzi shʼuyidumuye nukuva nago gonti amahono, ṿwonti niṿinama lwʼuvusilʼukutajilwa mumwoto wa shima—kwinza kwe kuyilemazya.

⁹ Popʼingʼuyazile lyokʼilyinso lyaho likukupunuzyʼiwe, pe yipaga ulitaje, she nukuva wʼilyinso lyoka vwelele lwʼuvazile ukwinjila muvulanzi nukuva nago ge gavilʼaminso lwʼukuvalʼukutajilwa mwa gehena mwʼakwahʼumwoto — kwinza ukuva wʼilyinso lyoka.

¹⁰ Mwandaje mutamupupusyaje numo uwa vansʼiva; she nkuvavuzyʼine nkuti: Avahavizya vavo kumwanya vakulolana nawo shima kuminsʼuTata wa kumwanya.

¹¹ [ShʼuMwanamuntu ayinzilʼukupoha she shitezile.]

Ishiholanyo sha ngʼonzi ye yatezile

¹² Vulʼimwe? Ingʼumuntʼalonsilʼingʼonzi amashumʼishumi, ilelo pe yokʼijende nukutega, pʼizyamwavʼamashumi gasanu nagane nazisanu nazine amwʼatangazileha mumagamba, atangavalʼukwanza yiyo yʼitezile?

¹³ Ilelʼingʼavazilʼukuyaga, nalyoli nkuvavuzyʼine nkuti: Pʼaliseshela nkani pangʼonzi yiyo, alipitilizya nakuzyamwavo zyonti zye zitatezile mwe zivaliye zyontʼamashumi gasanu nagane nazisanu nazine.

¹⁴ Shʼaho-nzizye vovulo wope nuSo wa kumwanya, atakasimʼukuti ategaje wokʼuwa vansʼiva.

Ṿwe pakuti tuvavombelaje avavombambivi

¹⁵ Ilelʼingʼuwamwinyu atazilʼumulandu, pe valaga uhamusoshe lwe muyelelesile mwe vavili nawe nawuyo. Ingʼakwitisile pʼumulonsilʼuwamwinyu.

¹⁶ Ingʼatakwitiha pʼuvasendʼavamwavo nga woka nga vavili, gontʼamazwi ukuti gavanje mumalomu ga vahome nga vavili nga vatatu.

¹⁷ Inga vope navanava atakuvitiha, pʼuhaziyanje lwe shihominʼishivanza shonti. Inga shope nashe shivanza atakushitiha, pʼuhatinji kwe kuva wa kunzi lelo, nawe musonkolamusonko vwelele.

¹⁸ Nalyoli nkuvavuzyʼine nkuti: Zyonti zyenga mukuzikunga imwe pansʼipa, zye zikuva zye zikunzilwe nakumwanya. Zyonti zyenga mukuzisatula imwe pansʼipa zye zikuva nsatulwa nakumwanya.

Uluputo lwa vonti poka

¹⁹ Havili nkuvavuzyʼine nkuti: Inga muli vavili mwitinkine pansʼipa mutili nzagaga tulave hamʼahantu ahalive, nashenga honu, uTata wa kumwanya alivapa.

²⁰ Shenga vahomine mwizina lyane nga vavili nga vatatu, pe nane ndi navo mumwo.

Ṿwe zikuhondela ukuswilanʼimbivi nishiholanyo sha muvomṿʼumunyala

²¹ Pupʼahapalamila kukwakwʼuPeteli, ahati: Mwene, uwamwitu ingʼakutalʼamalandu kukwane pe pakuti ngaswile halinga? Ingavanga hasano nahavili?

²² UwenʼuYesu ahamula ahati: Ine ntakuti ugaswile uvuyizye hasano nahavili, ndali, nkandi uhafishe pamashumi gasano nagavili nahasano nahavili.

²³ Mwe mumwʼuvumwene vwa kumwanya vuholine numuntu umwene wʼatili avanyamata vane vambazizyʼiṿwane ṿwe navalesheye.

²⁴ Ilelo lwʼakwandʼukuvazya navo, pe vahamuleta kukwakwe woka wʼaliyʼamatalanta ge gali 10,000.

²⁵ Ayazile lelʼumwene ṿisoṿilʼiṿwa kumulipa, pʼumwene ahahomelezya ahati: Simukazye vonti nawuyo numushi wakwe navana vakwe naṿwonti ṿwengʼali naṿwo, mwe mṿwaje iṿwa kundipʼine.

²⁶ Pʼumunyamatʼuno ahamusugamilila ahalambilizya ahati: Unolovele suti kwe nkakulipe ṿwonti.

²⁷ Pʼumwene ahamupepelezyʼumunyamata wuyo ahamusatula, gope namalandu gakwe ahati ngalesile.

²⁸ Ilelo lwafumile pupʼumunyamata wuyo, pʼahahomana numunyamatʼuwamwavo wʼapaṿile kukwakwe amadinali amashumi ishumi, wʼahamulema ahamufina kunsingo ahati lipaga huho hʼupaṿile.

²⁹ Pʼumunyamatʼula uwamwavo ahasugamila pansi, ahalambilizya ahati: Unolovele kwe nkakulipe vwonti.

³⁰ Uwene nyene ahasita ahavala nawo ahanawigalila mujela ahati akufuma lwʼalifile ṿiṿwo ṿwʼapaṿile.

³¹ Avene nyenʼavanyamatʼavamwavo lwe vaziwenyi zinizi, pe vahaswimililwa nkani, vahavalʼukumuvuzyʼumwene wavo zyonti zye ziṿomṿilwe.

³² Pʼumwene wakwe ahamwita ahati: We munyamata we munyala iwe, ṿwonti ṿwe waliye iwe ndesile shʼundambilizizye.

³³ Amwe patahondeye lelʼukuti nawʼumupepelezyajʼumunyamata wamwinyu, inza she nkupepelezizye nane?

³⁴ Pʼumwene wakwe ahamutwala kuvahayimṿwa, shʼaṿisitwe nkani, ahati alifuma mumwo lwʼalifile ṿwonti ṿiṿwo ṿwʼaliye.

³⁵ Namwe uTata wa kumwanya shʼalihonzya vovulo, inga mutakuswila mumoyo ginyu amalandu ga vamwinyu.