Matayi 16 - Tesitamenti Umupwa 1965

UYesu akuhana lwe valavilʼishimanyilo

¹ Pe vahapalamila kukwakwe navaFalisayi navaSadusayi ukumulinga, vahamuvuzilizya ukuti avaloleshezyajʼishimanyilo shoka she shikufuma kumwanya.

² Uwenʼahamula ahati: Shamazuva pe mukuti yasha she kushemime kumwanya.

³ Havili shanzanche pe mukuti njala ntupu umusanyʼuno she kumwanya kukushemama nukuvinduha. Mwe valumilenga mwe mumanyinsinye she kuli kumwanya, iṿwenʼiṿimanyilo iṿwa kumanyila mumwʼumwahʼumupiti, amwe ṿwe mutakuṿi-manyinsanya?

⁴ Avantu vashinishʼiva avanyala avavembu vakwanzʼishimanyilo. Vataliyaga nashimʼishimanyilo isha kusukumila nkandi isha Yona sheka. Pʼahavaleha pupo ahavala.

Akupilila uvwantonko vula vasundikwa

⁵ Ilelo avasundikwa lwe vavala kushipuma kwisyila pe valuṿilwʼukusendʼamakati.

⁶ UwenʼuYesu ahayanga navo ahati: Mwenye nkani, mwandajʼiṿiluzizyo ṿwa vaFalisayi niṿwa vaSadusayi.

⁷ Pʼavene muhati zyavo vahati: She tutapayilʼamakati.

⁸ UwenʼuYesu lelo lwʼaziwenyi, pʼahati: Zye muhasiva zyashi mwe va lwitihʼulupupusu, she mutapayilʼamakati?

⁹ Mushili nashinishi injele musyaye? Muluṿilwe namakati gasanu gala ge valiyʼavantu 5,000, niṿiseje ṿwe mwavunganisilʼutwalila ukuti ṿwali vulive?

¹⁰ Muluṿilwe namakati gasanu nagavili gala ge valiyʼavantu 4,000, niṿitundu ṿwe mwavunganisilʼutwalila ukuti ṿwali vulive?

¹¹ Mutakuzimanyinsanya vuli ukuti ntakutahʼamakati lwe nkuti mwandajʼiṿiluzizyo ṿwa vaFalisayi niṿwa vaSadusayi?

¹² Pe vahamanyinsanya ukuti atakutahʼiṿiluzizyo ṿwa makati, nkandi zye nsambilizyo zya vaFalisayi nizya vaSadusayi.

UPeteli akwitihʼukuti uYesu wu Chilisiti

¹³ UwenʼuYesu nyene lwʼavazilʼukufiha munsi ya mu-Kesaleya Filipi, pʼahavavuzilizyʼavasundikwa vakwe ahati: Avantu lwe vakumuyangʼuMwanamuntu, pe vakuti wʼunanu?

¹⁴ Avene vahati: Vamo vakuti we Yohani umwozyi, vamo vakuti we Eliya, vamo vakuti we Yelemiya, vamo vakuti mukuvwi uwamwavo.

¹⁵ Uwenʼahati: Imwe lelo, mukuti ne nanu?

¹⁶ PʼuSimoni Peteli ahamula ahati: We Chilisiti iwe, we Mwana wa Mulungu wʼalipo.

¹⁷ PʼuYesu ahamula ahati: We musangalusu we Simoni Bali-Yona, she zinizi zyʼatakuvuzizyʼumuvili namavanda ndali, nkandi zyʼakuvuzizyʼuTata wane wa kumwanya.

¹⁸ Nane nkukuvuzya lelo nkuti: Nawe we Peteli we liyalavwe, ilelʼine piyalavwe linili pe ndizengʼishivanza shane, ṿwope naṿwe ṿilyango ṿwa kuvuzimu ṿitalishipota.

¹⁹ Nkukupa niṿwigulilo ṿwa shinamwene sha kumwanya. Shonti shengʼukushikungʼiwe pansʼipa, she shikukungwa nakumwanya. Shope shengʼukushisatulʼiwe pansʼipa, she shikusatulwa nakumwanya.

²⁰ Pʼahavahandanizya nkanʼavasundikwa vakwe ahati: Mutamuvuzyaje numʼumuntu ukuti we wʼuChilisiti.

UYesu akukuvwa ukufwa nukuzyuha kwakwe

²¹ Pʼahanda pupʼuYesu ahavalanganizyʼavasundikwa vakwe ahati: Pakuti mbale mu-Yelusalemu mwe valinizizya nkani navasongo navashiputʼavapiti navamanyakalata, mwe valingoga, pisiku lya vutatu nyene pe ndizyuha havili.

²² PʼuPeteli ahasavuha nawo, ahajenda nukumuhandanizya ahati: Zijendelʼukutali Mwene, zye zitahakwagaje ndali!

²³ Uwene ahamusyetushilʼuPeteli ahati: Galushilaga mwisinda we Setano! Iwe we shipunulo kukwane. Shʼutakusivʼizya kwa Mulungu, ukusiva zye zya vantu vwelelʼiwe.

Ulwito lwa kuyihana weka

²⁴ PʼuYesu ahavavuzyʼavasundikwa vakwe ahati: Inga wokʼakuti imulandate mwisindʼine, wʼayihanaje, nishihovenkanyo shakwe ayivegazye, pʼandandatʼine.

²⁵ Shʼuno wʼakwanzʼukupulumusyʼuvulanzi vwakwe, wʼakuvutezya. Nkandʼuno wʼakuvutezyʼuvulanzi vwakwe pe pazyane wʼakuvupulumusya.

²⁶ Nashengʼumuntʼayilonsile yontʼinsi, pʼikumuvosya shonu, ingʼatezizyʼuvulanzi vwakwe? Niṿwa kuvuhombola, aṿwaje kwi iṿwa kuhombolʼuvulanzi vwakwe?

²⁷ ShʼuMwanamuntu pʼaliyinza navahavizya vakwe muvupiti vwa Yise, pʼalivalipilʼavantu vonti zye ziyanine nimbombo zyavo unʼiyakwe unʼiyakwe.

²⁸ Nalyoli nkuvavuzyʼine nkuti: Imwe mwe mwimiliye panapa, vamo vatalimanyʼukufwa lwe mutamuwenyi sutʼuMwanamuntu ukwinza muvumwene vwakwe.