Matayi 12 - Tesitamenti Umupwa 1965

Ukwimishilwa kwʼisabati

¹ Pamwaha wuyo uYesu ahatuha mumagunda pisabati, avenʼavasundikwa vakwe nyene vahagʼinzalʼikuvaluma, pe vahaṿwanulʼamatwe ga ngana vahalya.

² Avene nyenʼava-Falisayi lwe vavawenyi, pe vahati: Yenya, avasundikwa vaho vakuvomba hamo he mwiho ukuvomba pisabati.

³ Uwene nyene ahavavuzya ahati: Mutazyazilʼimwe mwa kalata zila zyʼahavombʼuDavidi pala panzala yamulumile nawuyo nave vali nawo?

⁴ Pala pʼahinjila mwa tempeli ahalyʼamakati ga lulolesyo, ge gatali ga kulya nawuyo nava ve vali nawo, ge gali ga kulya ve vashiputo veka?

⁵ Amwe mutazyazile munkomelezyo ukuti pisabati avashiputo mwa tempeli vatakuva namalandu nashenga vakuvindulʼisabati?

⁶ Nkuvavuzyʼine lelo nkuti: Alipo panapa umupiti nakwa tempeli.

⁷ Nkandʼinga mupele mumanyile lye likuti: Ine nkwanza vwe vwila, ntakwanzʼimputile, pe nkandi mutavalonzilʼavasitamalandu vanava.

⁸ Lyope nisabati uMwanamuntu wʼuMwene wakwe.

Ukupola kwa muntu wʼinyove yakwe yumiye

⁹ Lwʼahepa pupo pʼahinjila musinagogi yavo.

¹⁰ Ahaga mumwʼumuntu wʼumuhono ayumiye. Pʼavene vahamuvuzilizya vahati: Amwe kwinzʼukukantulʼimpungo pisabati? She vatili mwe tumulonjelelaje.

¹¹ Uwene nyene ahavavuzya ahati: Imwe mwe muvaliye unanu ave ningʼonzi yakwe yoka vwelele, ilelo pʼigwile mushiliva pisabati wʼatangayilema nukuyifumwa?

¹² Umuntu lelo alusizye nkanʼuvugomu ingʼonzi! Mwe mumwo kuhondeyʼukuvomba zye nyinza pisabati.

¹³ Pʼahamuvuzyʼuwa muhono ahati: Golosyagʼumuhono waho. Pʼuwenʼahawugolosya. Pʼahanduhʼumuhono wakwe ahavʼumwinza fwe wamwavo.

¹⁴ AvenʼavaFalisayi nyene vahafuma kunzi, vahayangana vahalondolʼidala lya kumugoga.

Izya kumugogʼuYesu

¹⁵ UwenʼuYesu lelo lwʼawenyi zinizi, pʼahepa pʼali. Vahamulandatʼavantʼavinji. Uwenʼahavazuzuvushizya vonti.

¹⁶ Ahavahandanizya nkani ahati: Mutankumusyajʼine.

¹⁷ Mwe mumwo zilunjisile zizyo zyʼayanzilʼuYesaya umukuvwi lwʼatili:

¹⁸ Yenya, we munyamata wanʼuno, wʼimusavuye, unkundwa kulʼine, we numwoyo wane akuseshela muli wuyo; uMupepo wane nkumuviha papakwe, alikumusyʼizya vugolosu kuvakunzi.

¹⁹ Uwenʼataliyumana navamwavo, atalizumʼahalanga nizwi lyakwe numʼataliyiṿwa pamusolo.

²⁰ Nitete lye lihoyime ataliliṿunza nzila uwene, nahoto he halosite atalihazimanya nzila. Ukufiha pʼakufisya uvulonzi kuvupoti nzila.

²¹ Avakunzi valisuvila lye lizina lyakwe.

UYesu akwamula lwe vakuti akuvombʼimbombo kuvutuli vwa Setano

²² Pe vahaleta kukwakwʼumuntu uwa mpepʼimbivi wʼali wantonko wʼali wushinunu. Uwenʼahamukantula pupo uvwashinunu, ahayanga ahenya.

²³ Pe vontʼavantu mwe vavaliyʼimpuga yonti vahatentwa vahati: Mwana-Davidi uno ingavanga?

²⁴ Avene nyenʼavaFalisayi lwe viṿuye vahati: Umuntʼuno atakuzivinga vwelelʼimpepʼimbivi, ndali, akuzivinjila mwa Belizibuli, usongo wa mpepʼimbivi.

²⁵ Wuyo nyene lwʼaziwenyi zye vakusiva muhati, pʼahavavuzya ahati: Yontʼinsi yenga yikululinkana yiyo ntupu, pʼitakuva. Vwonti vwelele nashenga nkaya nashenga nyumba, ṿwenga yikululinkana ṿiṿwo ṿitupu, ṿwe ṿitakuvanga ndali.

²⁶ Wope nuSetano ingʼakumuvingʼuSetano pʼalulinkine wuyo mutupu. Pʼishinamwene shakwe shishindame lelo?

²⁷ Apene lelo ingʼimpepʼimbivi ine nkuzivinjila mwa Belizibuli, pʼavenʼavana vinyu vakuzivinjila mwa nanu? Zye zizyo valivalonga ve vana vinyu

²⁸ Apene nyene ingʼimpepʼimbivi nkuzivinjila mwa Mupepo wa Mulungu ine, pe fwane lelʼuvumwene vwa Mulungu vuvafishiyʼimwe.

²⁹ Unanu wʼanginjila munyumba ya wa nguṿu ukusampʼiṿijela ṿwakwe, lwʼatamukunzile sutʼuwa nguṿu? Nkandʼingʼamukunzile suti, pʼapene pʼakusampʼiṿwa munyumba yakwe.

³⁰ Uno wengʼate nane wʼandulisile. Uno wengʼatakuntulʼukuvunganiha wʼakunyampanya.

³¹ Mwe mumwo mwe nkuvavuzya nkuti: Gontʼamalandu ge vakutalavantu naga kusamula ge ga kuswilwa, nkandʼaga kumusamulʼuMupepʼuMufinjile ge gatakuswilwa ndali.

³² Nazyenga wumo akumulinga zimʼuMwanamuntu, zye zikuswilwa, nkandi zizyo zyenga wumʼakumulingʼuMupepʼuMufinjile zye zitakuswilwa nakumo nakuya kunuku nakuya kula.

³³ Ikwi inga mukuti lyinza, pe Zyope ninsanga zyakwe nyinza vwelele. Inga mukuti ikwi livivi, pe Zyope ninsanga zyakwe mbivi vwelele. Shʼamakwi gonti umuntu akugamanyila pansanga zyavo.

³⁴ Mwe luho lwa njohʼimwe, mwe mwatinji muyanje vulʼinyinza, she mwe vanyala mwenemwe. She mwilomu umuntu akuyanga zizyo zye zikulafuha mumwoyo.

³⁵ Umuntʼumwinza akuṿumbula zye nyinza mwʼalunzite zye nyinza; uwenʼumuntʼumunyala wʼakuṿumbula zye nyala mwʼalunzite vwe vunyala.

³⁶ Nkuvavuzyʼine lelo nkuti gontʼamazwʼaga shaha ge vakuyangʼavantu valilanduzilwa lyoka lyoka pisiku lila ilya kulongwa.

³⁷ She mumazwi gaho ulitashilwa uvugolosu, mwope mwe mumazwi gaho ulitashilwa uvuvivi.

Akuhana lwe vakwanzʼishimanyilo

³⁸ Pe vamʼavamanyakalata navaFalisayi vahamula vahati: We musambilizi, tukwanza utupelele wokʼumumfindango uwa kukumanyila mumwo.

³⁹ Uwenʼahamula ahati: Avantu va shinishi avanyalʼiva avavembu vakulavʼishimanyilo. Vataliyaga nashimʼishimanyilo nkandʼishimanyilo sha Yona umukuvwi she valishaga sheka.

⁴⁰ Inza shʼuYona umukuvwi ahavanga mulwanda lwa nswʼimpitʼila amanda gatatu nashamusanya nashavusiku, she wope nuMwanamuntu aliva muhati munsi amanda gatatu nashamusanya nashavusiku.

⁴¹ Avantu va mu-Niniṿe valivuha poka navantu va shinishʼiva pisiku lya vulonzi, valivatahʼuvuvivi, shʼavene vapindusile pala pʼuYona ahavavuzyagʼinongwa. Nkwʼalipo panapa umupiti nakwa Yona.

⁴² Umwenʼumwantandʼula wʼafumile munsi ya kumulilo mula alivuha poka navantu va shinishʼiva pisiku lya vulonzi, alivatahʼuvuvivi, shʼuwenʼafumile kula kwʼipeleleyʼinsi, ahinzʼukwi-ṿwʼinjele zya Solomoni. Nkwʼalipo panapa umupiti nakwa Solomoni. Amahosi ge gakuloleha muvuyananyi uvusita kulunjiha

⁴³ Shenga lwʼimpepʼinkandamanu ifumile mumuntu, pʼikuyeluha ikumala mwonti munsi insitaminzi, ikwanza pavutuzyo nkandʼitakupaga napamo.

⁴⁴ Pʼikuti: Nkuvuyila munyumba yane mwe mfumile. Ilelo lwe yivuyiliye mumwo havili pʼikwaga inyumba yili yeka, yikwaga vusile mumwo vanonelezizye.

⁴⁵ Ilelo pʼijende nukuvuhʼukusendʼizyamwavo impepo zisanu nazivili indusyʼimbivi nakukwakwe. Ilelo lwe zyinjiye pe zikuva mumwo, ilelo pʼumuntʼuno ulwa pisinda shinishi, pʼahalambane apitilizyaje nakuzya zila. She valihonzya vovulo avantu avanyala va shinishʼiva.

Uvwanamuntu vwa nalyoli

⁴⁶ Ilelo lwʼamakuyanga navantu ve vavungine pupʼimpuga, pe vahaga nunyina navamwavo vimiliye mwisinda muvantu vahati tuyanje nawo.

⁴⁷ Wokʼumuntu ahamuvuzya ahati: Uvinyu navanino vimiliye mwisinda muvantu mula vakuti tuyanje nawo iwe.

⁴⁸ Uwenʼahamula ahati: Umayi navanavitu ve vonu?

⁴⁹ Pʼahasonta kuvasundikwa vakwe ahati: Yenyi, we wʼumayi, ve vanavitʼine vanava.

⁵⁰ Shʼuno wʼakuvomba zizyo zyʼakasimʼuTata wa kumwanya ukuti zivombwaje, we wamwitʼine, we mwanawitʼumulindʼine, we wʼumayi ine wuyo.