Maliko 9 - Tesitamenti Umupwa 1965

¹ Ahavavuzya ahati: Nalyoli, nkuvavuzyʼine nkuti: Vimiliye panapa vamo ve vatalimanyʼukufwa lwe vatawenyi suti uvumwene vwa Mulungu ukwinza mumaha.

Ukwanduha kwa Yesu

² Ilelo lwe gashilinkinʼamandʼumutanda, pʼuYesu ahavasenda avaPeteli nuYakobu nuYohani, ahazuva navo pigambʼitali, ahayeleleha navo vanava veka. Pʼahanduha lwe vakwenya.

³ Pʼamenda gakwe gahanyengʼenyela, gahava mpe fwe nganda yʼiguyʼamajela. Navalutogo avazelufwamenda ava munsi yonti mwʼivaliye—agavo vatakugafisya pupʼuvuzelu.

⁴ Pe vahitushila vakuloleha UEliya nuMose, vakuyanga nawʼuYesu.

⁵ PʼuPeteli ahapinga mumwo ahati: Labi, pinza ukuva panapʼiswe. Tuzengajʼinkambi zitatu panapa, yokʼive yaho wenewe, yokʼive ya Mose, yokʼive ya Eliya.

⁶ Shʼahalavayaga shaha, she shavagwiliyʼishitetemwi.

⁷ Pe vahitushilʼivingo livakupishiye, vahagʼizwi likufuma mwivingo mumwo, likuti: Uno we Mwana wane, unkundwa kukwane, we mumutejelezyaje wuyo.

⁸ Ilelo pʼapashezi lwe vahatalanganya, pe vahagʼatalipo numʼuwunji, nkandi we Yesu weka we vali nawo.

⁹ Ilelo lwe vakwiha pigamba, pʼahavindʼuYesu ahati: Mutamuvuzyaje numʼumuntu suti zye muwenyi; muhafishe pupo lwenga mwazilʼuMwanamuntu azyusile kuvafwe,

¹⁰ Pe vahasyelemetela mwizwi linili, vahavuzilizanya vahati: Ukuzyuha kuvafwe amwe she shonu?

¹¹ Vahamuvuzilizya vahati: Amwe zye zili vuli zye vakuyangʼavamanyakalata lwe vakuti alitaliha UEliya ukwinza?

¹² Uwenʼahamula ahati: Kwe nalyoli, UEliya we wa kutalihʼukwinza, wʼaliyananya zyonti. Ilyene lye likumuyangʼuMwanamuntu mwa kalata lye mutalyazilʼimwe lye likuti wʼakuyimṿilwa, akusufilwa nkani?

¹³ Ine nyene nkuvavuzya nkuti: UkwinzʼuEliya kwʼayinzile wope, avene nyene vahamwizizya inza she vakasime, inza shʼamuyanjiye nzilʼukalata.

Ukuzuzuvuha kwa mulumendo uwa mpepʼimbivi

¹⁴ Pe vahafiha pupo pe valʼavasundikwa vakwe, vahaga vavazinganiye navantʼimpuga navamanyakalata vakudalinkana navo.

¹⁵ Ilelo lwe vamuwenyʼavantʼimpuga yonti, pe vahatentwa, vahamushimbilila, vahamulamuha.

¹⁶ Uwenʼahavavuzilizya ahati: Amadali ge mwadalinkana navo ga shonu?

¹⁷ Pe woka wa mumpuga mumwo ahamuvuzya ahati: We Musambilizi, namulesile kukwahʼumwana wanʼumwanaṿuli uno, uwa mpepo insitakuyanga.

¹⁸ Yikulinga yimusunkulinye, pʼakuzilihʼishizilisi, pʼuwenʼakufulizyʼitatafula, akuti nukusyekulanyʼamino, pʼakwuma vovulʼumuvili. Ilelo pʼine njanzile navasundikwa vaho ntili simuyifumwaje, nkandi vapositwe.

¹⁹ Pʼuwenʼahamula ahati: Ye mwe, kwe kusitakwitiha vuli avantu va shinishʼiva? Mpele poshi ukuva namwe, mpele poshi ukuti: Sangapa sangapa, shima? Simumuletʼipa.

²⁰ Vahamuleta kukwakwe. Ilelʼumulumendo lwʼamuwenyʼuYesu, pʼimpepʼihamusunkulanya, ihamuhanyizya pansi, ahagalagata pansi, ahafulizya nitatafula.

²¹ UwenʼuYesu ahamuvuzilizyʼuyise wa mwana ahati: Yamwanzite shali? Uwenʼahati: Yamwanzite muvunsi.

²² Apinji yikumutagaga mumwoto namuminzi lwe yikuti imugoje. Nkandʼingʼumanyilʼiwe, pʼutu-pepelezyaje, ututulaje.

²³ UwenʼuYesu ahati: Ukumanya kwe kwashi, lwe lwitiho ingʼumanyilʼukwitiha, pe zyonti zitakukupota nazimo.

²⁴ Naluvilo uyise wa mwana ahavilishila ahati: Nitisile. Umpohaje ukusitakwitiha kwane.

²⁵ Ayazile lelʼuYesu vakumushimbililʼavantu, pʼahayipililʼimpepʼinkandamanu ahati: We mpepo, we nsitakuyanga we kutwʼiwe, nene ne nkukuvuzya nkuti fumaga mumuntʼuno utavuyizyajʼukwinjila mumwakwe nohavili.

²⁶ Pʼihakuta, yihamusunkulanya nkani, yihafuma. Uwenʼumulumendo ali fwe ngatʼafuye. Vamo vahati: Afuye nzila.

²⁷ UwenʼuYesu ahamulemʼumuhono, ahamuvusya. Pʼahimilila nzila.

²⁸ Ilelo lwʼavazilʼukufiha kuhaya, pe vahamuvuzilizyʼavasundikwa vakwe lwe vayelelesile nawo, vahati: Iswe yituposite shonu ukuyifumwa?

²⁹ Uwenʼahavavuzya ahati: Izyene zinizi nyene, zye zitakufuma vwelele, peka ingʼumuntu akuputa pʼali namaha aga kuzifumwa.

Ukukuvwa kwa Yesu kwa vuvili ukwa vufwe wakwe

³⁰ Pe vahepa pupo, vahatuha munsi ya mu-Galilayi. Ahati numʼatanenyaje.

³¹ Shʼahavavuzyʼavasundikwa vakwe ahati: UMwanamuntu valimuviha munyove zya vantu ve valimugoga. Ilelo lwe vamugoga, pʼalizyuha pisiku lya vutatu.

³² Avene nyene lihavapotʼukulyaganyʼizwi linili. Vahanyilʼukumuvuzilizya.

Insambilizyo zya vwahayisye

³³ Ahavalʼukufiha mu-Kapelinahumu. Ilelo lwe vatendime munyumba, pʼahavavuzilizya ahati: Mwadalinkanaga shonu mwidala?

³⁴ Avene vahapuma mwa. She vahadalinkanagʼilya vupiti mwidala, vatili umupiti amwʼunanu iswe?

³⁵ Pʼuwenʼahatendama ahavitʼavishumi navavili, ahavavuzya ahati: Inga wokʼakuti mbe ne mutanzi nene kuvamwitu, we pakuti ayipelajʼukuva wa mwisinda kuli vonti nukuva muvombezi wavo vonti.

³⁶ Pʼahasendʼumwana, ahamuviha pahati, ahamupahatila, ahavavuzya ahati:

³⁷ Uno wengʼakumuposhela wokʼumwana wʼali fwe wununo, ingʼakumuposhela mwizina lyanʼine, wʼakumposhela nene. Ilelo wʼakumposhelʼine, wʼakumuposhelʼuno wʼantumilʼine.

Uvutehamu kuvamwavo

³⁸ PʼuYohani ahamuvuzya ahati: We Musambilizi, twamwazile woka wʼimpepʼimbivi akuzifumwa mwizina lyaho, wʼatakutulandata. Pʼiswe tuhamuhana she twazile atatulandite.

³⁹ UwenʼuYesu ahamula ahati: Mwamulesyaga shonu lelo? She numʼatalipo wengʼakupelʼamamfindango mwizina lyane, wʼalinjangʼimbivi naluvilo.

⁴⁰ Shʼuno wenga tutagunjiline nawo, we tukujendelana nawo.

⁴¹ Shʼuno wengʼakuvangʼwesyʼimwe lwe lupindi lwoka lwa minzi, she mwe vantu va Chilisiti izina, nalyoli nkuvavuzyʼine nkuti: Atalipotwʼiṿwa kumulipila.

Insoshe kuli ve vakupunuzya avanji

⁴² Nkandʼuno wengʼakupunuzya woka wa vansʼiva, ve vali nulwitiho, zilʼimpupusu izya kumukungʼulwala kunsingo uku-mudwiṿwa mwa sumbi uwene.

⁴³ Inga lelo wokʼumuhono waho akukupunuzyʼiwe, pʼuwudumule. She nukwinjila muvulanzi lwʼuyilemazizye, nukuva nago gontʼamahono lwʼukuvala mugehena namumwoto wʼatakuzima nalumo—kwinza kwe kuyilemazya.

⁴⁴ She mwe nintofi zyavo zitakufwa nalumo numwoto wavo atakuzima nalumo.

⁴⁵ Pope inga shokʼishinama shaho shikukupunuzyʼiwe, pʼushidumule. She nukwinjila muvulanzi lwʼuyilemazizye, nukuva naṿwo ṿwontʼiṿinama lwʼukutajilwa mugehena—kwinza kwe kuyilemazya.

⁴⁶ She mwe nintofi zyavo zitakufwa nalumo numwoto wavo atakuzima nalumo.

⁴⁷ Pope inga lyokʼilyinso lyaho likukupunuzyʼiwe, pʼulitonkole ulitaje. She nukuva nilyinso lyoka vwelele lwʼukwinjila kushinamwene sha Mulungu, nukuva nago gavilʼaminso lwʼukutajilwa mugehena—kwinza kwe kuva nilyinso lyoka.

⁴⁸ She mwe nintofi zyavo zitakufwa nalumo numwoto wavo atakuzima nalumo.

⁴⁹ Avantu vonti, woka woka, pakuti valunjilwaje numwoto.

⁵⁰ Iveya lye lyinza. Apene nyene ingʼiveya lisufile, pe muṿwaje kwi iṿwa kulihalifwa? Muve niveya muhati zyinyu, mutenjelane muvwihalo.