Maliko 7 - Tesitamenti Umupwa 1965

UYesu akwamula lwe vukumuvuzilizya izya kushilanya amata

¹ Pe vahavala pʼali navaFalisayi navamanyakalata vamo ve vafumile mu-Yelusalemu.

² Ve vahaga vamʼavasundikwa vakwe uvugali vakulya ninyovʼinkandamanu, she vatasukusuye munyove.

³ ShʼavaFalisayi navaYuda vonti ve vatakulya naṿimʼiṿintu lwe vatasukusuye munyove. She vakuhonzya vovulo ukulandatʼamiho ge vavalesheyʼavalulwo vavo.

⁴ Na lwe vakufuma pavukalilʼiṿintu, pope vatakulya ndali, isuti vakugeza. Gope naganjʼamiho gavo minji nkani, ge vakuti umuntʼukuti alandate vovulo, aga kwozya niṿikombe namabeseni niṿililo ṿwa ṿipondo.

⁵ Pe vahamuvuzilizya navaFalisayi navamanyakalata vahati: Avasundikwa vahʼiwe vatakulandata shonʼamiho ge vatulesheyʼavasongo vitu, nkandi vakulya ninyovʼinkandamanu?

⁶ Uwenʼahamula ahati: Alovosizye nalyolʼuYesaya pala pʼahavayanjila nzila mwe valumilenga mwe, inza she lisimṿilwe lye likuti: Avantʼiva vakunchindiha lye lilomu lyeka, shʼamoyo gavo galʼukutali.

⁷ Vakunyilʼine shaha vwelele, she vakusambilizyʼinsambilizyo zye tulumbe twa vantu.

⁸ Shʼizyenʼinkomelezyo zya Mulungu muzilesile, nkandʼagenʼamiho ga vantu, ge mugalemile.

⁹ Ahavavuzya ahati: Hinza! Inza she muvinduyʼinkomelezyo zya Mulungu, lwe mukuti tulandate ge gitʼamiho.

¹⁰ ShʼuwenʼuMose alajizizye nilya kuti: Ushindishe uso nuvinyu; nilya kuti: Uno we ngʼakumuliga uyise nunyina, we pakuti afwanje.

¹¹ Imwe nyene mukuti: Umuntu ingʼayanzile kwa yise nakwa nyina, ingʼatili: Kolibani, lye likuti: He ha kutajila mwa tempeli, he natinji inkupe, iha he wasungwaga—

¹² pe muvinzite mutili atavapanje naṿimo uyise nunyina.

¹³ Pʼamiho ginyu gugo ge mulesheline ge gakuvindulʼizwi lya Mulungu. Naganji ge muli nago ge minji nkani.

¹⁴ Pʼahavavunganihʼavantʼimpuga yonti, ahavavuzya ahati: Simutejelezyaje kukwane imwe mwenti, muzimanyinsanye.

¹⁵ Naṿimʼiṿwa kunzi ṿitakumuhandamanyʼumuntu lwe akwinjila muhati mumwakwe ndali, nkandi zizyo zye zikufuma mumwakwe, zye zikumuhandamisyʼumuntu.

¹⁶ Uno wengʼali nagʼamakutwi, wʼatejelezyaje.

¹⁷ Ilelo vazile ayefile kwʼali navantu lwʼayinjiye munyumba, pe vahamuvuzilizyʼavasundikwa vakwe ishiholanyo shinishi.

¹⁸ Uwenʼahati: Namwe fwane she muhonzizye namwe mushilʼukuva ninjele? Zye mushili namwe ukuzimanyinsanya, ukuti ṿwontʼiṿwa kunzi, inga vakwinjila mumuntu, ṿwe ṿitakumuhandamisya napamo?

¹⁹ She ṿitakwinjila mumwoyo ndali, ṿikuvala mwe muvula, havili ṿikutagwa mumusalani. Mwe ṿikuzelupila vovulo ṿwontʼiṿintu.

²⁰ Ahati: Nkandi zizyo zye zikufuma muhati mumuntu, zye zikumuhandamisya zizyo.

²¹ She mumwoyo wa muntu muhati, mwe zikufumʼinsivʼimbivi zyonti, nuvwamalaya, nuvwiva, nuvugozi,

²² nuluvembu, niṿipapilo, nuvuvivi, nishifumbo, nuvuluṿu, nahafwishi, numusamu, namabado, nuvuwelewele.

²³ Zyontʼimbivi zinizi zye zikufuma muhati, zye zikumuhandamisyʼumuntu.

Ukupola kwa mulindu umufuma kuvakunzi

²⁴ Pʼahavuhʼukuvala munsi ya Tili niya Sidoni. Mwʼahinjila munyumba, ahati ingavanga vatalinenyʼavantu, havili mwope ahakumuha.

²⁵ She wokʼumwantanda umuhatahalindu he hali nimpepʼinkandamanu, ayiṿuyʼukuti mwʼali. Ilelo pʼahavala pʼali, ahagwila kuṿinama ṿwakwe.

²⁶ Uwenʼumwantanda ali muGiliki, afumile muluho lwa vaSilofoyinike. Wʼahalambilizya kukwakwe ahati: Ufumwajʼimpepʼimbivi mumwana wane.

²⁷ UwenʼuYesu ahati: Yiṿwa, isuti vikutajʼavana, she mwiho ukusendʼuvugali vwa vana nukututajilʼutuvwa.

²⁸ Uwenʼumwantanda ahamula ahati: Zye nalyoli, Mwene, nkandʼine ntili she nutuvwa tukuseva utulagala, twe tukulagala lwe vakugavana.

²⁹ UwenʼuYesu ahamula ahati: Shʼuyanzilʼizwi linili, pe valaga, ukuvʼukwagʼimpepʼimbivi yifumile mumwana waho.

³⁰ Pʼahavala kuhaya, ahamwagʼumwana wʼalambalaye pashitala, nimpepʼimbivi yifumile nalyoli.

Ukupola kwa muntu ukutwi havili ushinunu

³¹ Havili ahepa munsi ya Tili, ahajendʼiya mu-Sidoni, ahavalʼukufiha pasumbi wa Galilayi pahati munsi ya Dekapoli.

³² Pe vahamuleta kukwakwe ukutwi, wʼali wʼushinunu, vahalambilizya kukwakwe vahati: Umuvishʼumuhono.

³³ Uwenʼahase-guha kuvantu, ahayeleleha nawo, ahamuvihʼinyove mumakutwi, ahaswilʼamati, ahamupalamansyʼulumili lwakwe,

³⁴ ahenya kumwanya, ahalwilwinta, ahati: Hefata, lye likuti: Yiguha.

³⁵ Pʼamakutwi gakwe gahiguha, ulumili lwakwe mwe lwapi-nyilwe luhasatuha, ahayanga, ahagolosya.

³⁶ Uwenʼahavinda ahati: Mutamuvuzyaje numʼumuntu. Avene vahalinga lwʼakuvinda, pe vahonjezyʼukuzikumusya.

³⁷ Pe vahasukumila vahapitilizya, vahati: Anonelezizye zyonti; avakutwi akuvapele-lʼukwiṿwa, navashinunu akuvapelelʼukuyanga.