Maliko 5 - Tesitamenti Umupwa 1965

Ukupola kwa wa mpepʼinkandamanu wa vaGelaseni

¹ Pe vahalambʼusumbi vahafihʼisyila lila, munsi ya vaGelaseni.

² Awenyi lelo lwʼakufuma mwivoti, pʼahahomana numuntu wa mpepʼinkandamanu, afumile mumbipa.

³ Wʼahavanga mwe mumbipa shima. Avaposile vontʼavantu ve vatili tumukunje, nage manyololo agaposite.

⁴ She shima vatili twinjizyʼiṿinama ṿwakwe mwikoli, tumukunje namanyololo. Uwene pʼahadumulanya namanyololo gavo, agenʼamakoli ahasya. Pʼahasita nukuva numo uwa kumukunga.

⁵ Shima nashamusanya nashavusiku ahava namumbipa namumagamba, ahapongomoha ahayihoma namavwe.

⁶ Ayazile lelo lwʼamuwenyʼuYesu ukutali, pʼahamushimbilila, ahakupama kukwakwe,

⁷ ahapongomoha nkani ahati: Tuli vuli nane nawe we Yesu we Mwana wa Mulungu Mulusyi? Nkukulapizya kwa Mulungu nkuti utanizizyaje.

⁸ ShʼayazilʼuYesu akuti: We mpepo we nkandamanu fumaga mumuntʼuno.

⁹ PʼuYesu ahamuvuzilizya ahati: Izina lyaho we nanu? Uwenʼahamula ahati: Ne Mpuga izina lyanʼine, she tulʼavinji.

¹⁰ Ahalambilizya nkani kwa Yesu ahati: Utatuvingaje munsi yinino.

¹¹ Ilelo lyali pupo nidimilo lya vahapola vahalyʼuvusole pigamba.

¹² Pʼimpepʼinkandamanu zihalambilizya kukwakwe zihati: Ututumaje muvahapoli vala, mwe twinjilaje.

¹³ UwenʼuYesu ahitiha. Pʼimpepʼinkandamanu zihafuma zihavalʼukwinjila muvahapoli. Pʼavahapoli idimilo lyonti vahagalagatila paluvambala, vahayitaga mwa sumbi, vonti mwe vavaliye 2,000, vahamila mwa sumbi.

¹⁴ Avenʼavalumendo ve vahadimagʼavahapoli vahashimbila, vahavalʼukuzikumusya namunkaya mwonti namuṿwegwi. Pʼavahatankaya vahavalʼukwenya zyʼapezile.

¹⁵ Vahafiha pʼalʼuYesu, vahagʼumuntu we zyamwinjiyʼimpepʼimbivi ukuti atendimʼahinza, azwaye namenda asansamusile, wuyo wʼali nimpuga. Pʼavene vahatetema.

¹⁶ Avene lelʼava ve vamuwenyi, ve vahavavuzya nizya wa mpepʼimbivi ukumuzuzuvushizyʼuwene nizya vahapoli.

¹⁷ Pʼavene vahalambilizya kukwakwe ukuti ayepaje kumwavo.

¹⁸ Ayazile lelo lwʼakuyipashila mwivoti, pʼuwa mpepʼimbivi ula ahalambilizya kukwakwe pakuti ave poka nawo.

¹⁹ UwenʼuYesu ahahana ahati: Ndali, uvale kuhaya nakuvajenzi vaho uhavavuzye uhatinji: Shʼahonzizye vovulʼuMwene, ampepelezizye nukumpepelezya.

²⁰ Pʼuwenʼahavala munsi ya mu-Dekapoli, ahazikumusya zyonti zyʼamupeleyʼuYesu. Pe vonti vahasukumila.

Ukuzyuha kwa mwanʼumulindu wa Yayili nukupola kwa mwantanda wʼali nisha mwiho

²¹ IlelʼuYesu lwʼalamṿile mwivoti, lwʼafisilʼisyilʼili, pe vahavungana pupo pʼali avantʼavinji, lwʼali pasumbi uwene.

²² Pe wokʼusongo wavo uwa sinagogi, wʼali wʼuYayili izina, ahapalamila kukwakwe. Lwʼamuwenyi pʼahakupama kuṿinama ṿwakwe,

²³ ahamulambilizya nkani ahati: Ahana hanʼahalindu hamakusililishila shinishi. Nzagaga, tuvale kukwane, uhamuvishʼumuhono, ukuti apone nukulandila.

²⁴ Uwenʼahavuhʼukuvala nawo. Vahalandatʼavantʼimpuga ye mpiti. Vahatitilinkana nawo.

²⁵ Ilelo pʼali pupo wope numwantanda woka, wʼalimbiliye nisha mwiho amahʼishumi nagavili,

²⁶ wʼayimṿilwe kuvaganga ve vinji. Mwe ṿwasiliye niṿwuma ṿwakwe ṿwonti, nakupola ha, nkandʼiyenʼimpungo yakwe inaṿula nkani.

²⁷ Ilelo lwʼayi-ṿuyʼizya Yesu, pʼahajendela mumpuga ya vantu, ahapalamila mwisinda, ahapalamansyʼamenda gakwe.

²⁸ Shʼuwene muhati yakwʼatili: Inga nkumupalamansya ge menda gakwe pe nkupola.

²⁹ Ilelo pe shihajenda nukwumila panapʼishiduda sha mavanda. Ahayimanya mumuvili ukuti mpozilʼimpungo yanʼino.

³⁰ PʼuwenʼuYesu ahayimanya pupo amaha gakwe ukuti gefile gamo mumuvili wakwe. Pʼahavashevelʼavantu ahati: Unanu ampalamansizyʼamenda panapa?

³¹ Pʼavasundikwa vakwe vahamula vahati: Sutakwenyʼavantu ve vakululinkana nawe, havili ukuti: Unanʼampalamansizye?

³² Uwenʼahatalanganya ukumwanza wʼahonzizye vovulo.

³³ Uwenʼumwantanda ilyoga lihamugwila, ahatetema, shʼayimanyilʼukutʼazuzuvusile. Pʼahavalʼukumugwila, ahamuvuzya zyonti, atalesile nazimo.

³⁴ UwenʼuYesu ahamuvuzya ahati: We mwana wanʼiwe, lukuzuzuvushizizye lwe lwitiho lwaho; valaga nuvwihalo, yope nimpungo yahʼitalivuyila nalumo.

³⁵ Ilelo lwʼamakuyanga linili, pe vahafiha vamo ve vafumile pasongo wavo wa sinagogi, vahamuvuzya vahati: Umwana waho afuye. Ilelo ukumulisyʼumusambilizi shonu?

³⁶ UwenʼuYesu ahiṿwa lwe vakumuvuzya, pʼahayanga nawʼusongo wavo wa sinagogi, ahati: Utatetemajʼiwe, uyitihaje vwelele.

³⁷ Atahamwitiha numuntu numʼukulandatana nawo. Ahasenda veka ve vaPeteli nuYakobu nuYohani umuzuna wa Yakobu.

³⁸ Pe vahinjila munyumba ya songo wavo wa sinagogi. Ahaga mumwo ahalanga hatupu navantu ve vahakutaga nave vahalosyagʼilosyo.

³⁹ Ahinjila ahavavuzya ahati: Ahalangʼiha hashi, mukukuta shonu? Shʼumwana atafuye ndali, akasite twe tulo.

⁴⁰ Avene pe vahamuseha. Uwenʼahavavinga vonti. Pe nuyise wa mwana nunyina nava vʼayinzile navo, vʼahinjila navo mwe halʼahalindu.

⁴¹ Pʼahahalemʼumuhonʼahalindu, ahati: Talita kumi, lye likuti: We halindu, nkukuvuzya nkuti vuhaga.

⁴² Pʼahalindu hahavuha luvilo luvilo, hahajenda. Shʼamaha gakwe hamazilʼishumi nagavili. Pe vonti vahatentwa nukulemwa nkani.

⁴³ Uwenʼahavahandanizya nkani ahati: Mutamuvuzyaje numʼumuntu. Ahalajizya ukuti vahapanjʼahalindu yimo iṿwa kulya.