Maliko 2 - Tesitamenti Umupwa 1965

Ukupola kwa washulu

¹ Ilelo lwe gashilinkinʼamanda gamo, pʼahavuyizyʼukuvala mu-Kapelinahumu. Ahakumuha ukuti ali munyumba.

² Pe vahavunganʼavantʼavinji. Pope napashilyango pahasova pavwimo avantu. Uwenʼahavavuzyʼinongwa.

³ Pe vahamwinzilʼavantu vane, ve vamunyatuye wokʼuwashulu.

⁴ Vazile lelo vatapazilʼapa kumwinjizya lwe vakuti tupalamile kukwakwe, she vali vinji nkanʼavantu, pe vahapangulʼinyumba pamwanya pupo pʼalʼuwene. Ilelo lwe vapanguye, pe vahamwisya poka namazagala gakwe, pʼalambalayʼuwashulu.

⁵ UwenʼuYesu lwʼawenyʼulwitiho lwavo, pʼahamuvuzyʼuwashulu ahati: We mwana wane we, nswiliyʼamalandu gaho.

⁶ Mwe vali vamʼa-vamanyakalata ve vatendime mumwo. Ve vahakumbuha muhati zyavo vahati:

⁷ Zyʼakuyanga vuli vovulo? AkumusamulʼuMulungu. Swe vantu amwʼalipo wokʼuwa kuswilʼamalandu umuntu wamwavo? We Mulungu weka wʼamanyilʼukuswilʼamalandu.

⁸ UwenʼuYesu ahazimanya nzila mumwoyo wakwe, ukuti zye vakusiva zinizi muhati zyavo, pʼahavuzilizya ahati: Zye mukusiva zyashi zinizi mumoyo ginyu?

⁹ Lye lipupusu lili kwi ilya kumuvuzyʼuwashulʼuno nilya kuti: Nswiliyʼamalandu gaho, nilya kuti: Vuhaga, nyatulagʼamazagala gaho, uvalaje?

¹⁰ She nkuti mumumanyʼuMwanamuntu ukuti ali namaha ga kuswilʼamalandu munsʼumu,—lyʼahayanga kuwashulu, ahati:

¹¹ Nkukuvuzyʼine nkuti: Vuhaga, nyatulagʼamazagala gaho, uvale kuhaya.

¹² Pʼuwenʼahavuhʼapashezi, ahanyatulʼamazagala gakwe, ahafuma kunzi lwe vonti vakwenya. Pe vonti vahatentwa, vahamutimʼuMulungu, vahati: Zye tutaziwenyi nalumo zinizi.

Ukwitwa kwa Leṿi

¹³ Ahavala kwa sumbi nohavili. Pʼavantʼimpuga yonti vahamwinzila pʼali, pʼuwenʼahavasambilizya.

¹⁴ Ilelo lwʼakujenda, pʼahamwenyʼuLeṿi umwana-Alifayi, ahaga atendime pavusonkolamusonko. Wʼahamwita, ahati: Nzagaga, undandatʼiwe. Pʼuwenʼahavuha, ahamulandata.

¹⁵ Ayazile lelo lwʼatendimʼukulyʼiṿintu munyumba yakwe, pe navasonkolamusonko navatalamalandu ve vinji vahavalʼukutendama nuYesu navasundikwa vakwe ukulyʼiṿintu. She vali vinji ve vahajendaga nawo.

¹⁶ Avene navamanyakalata navaFalisayi lwe vamuwenyi akutendama navasonkolamusonko navatalamalandu ukulyʼiṿintu, pe vahayanga navasundikwa vakwe vahati: Akulyʼiṿintu poka navasonkolamusonko navatalamalandu?

¹⁷ UwenʼuYesu ahiṿwa. Pʼahavavuzya ahati: Avapuma vatakumwanzʼumuganga, nkandʼavavinu. Ntinzilʼukuvitʼavagolosʼine ndali, nkandʼavatalamalandu.

Ukuvuzilizyʼizya kusitakulyʼiṿintu

¹⁸ Ilelo navasundikwa va Yohani navaFalisayi vahalinga. Pe vahavalʼukumuvuzya vahati: Yenya, avasundikwa va Yohani navasundikwa va vaFalisayi vakulinga, nkandʼavasundikwa vaho vatakufunga shonu?

¹⁹ UwenʼuYesu ahamula ahati: Pe vatinji vafungaje vuli avalyaṿintu ṿwa pavusendelo lwe suti vali nawo numusendamwantanda? Isuti lwe vali nawo umusendamwantanda, pe vatahondeyʼukufunga.

²⁰ Nkandi gakwinzʼamanda lwʼanyatulilwe kuli vuvo umusendamwantanda. Pala nyene valifungʼiṿintu pamanda gugo.

²¹ Numʼatakupatihʼahapatikwa ha mwendʼumupwa pamwendʼumukali. She hatakuyanana pamwendʼumukali, ndali, hakuzepulanya vwelele, ilelo pʼuwenʼumwenda pʼakwonjezyʼukuzepuha.

²² Numʼatakusotʼishinyanya sha mampensya mumafukʼamakali ga mampensya. She ingʼumuntʼasosite mumwo, pʼishinyanya shikulepulanyʼamafuko ga mampensya, ilelo pʼamampensya gajende nukwitiha, gope namafuko gajende nukunanjiha. Ndali ishinyanya she pakuti umuntu asotaje mumafukʼamapwa.

Ukuvuzilizya izya kwimishilwa kwʼisabati

²³ Lumo lelo pisabati lwʼakujenda mwidala lya mumagunda, pʼavasundikwa vakwe vahaṿwanulʼamatwe lwe vakujenda.

²⁴ PʼavaFalisayi vahayanga nawo vahati: Yenya, avasundikwa vaho vakuvomba hashi he mwihʼukuvomba pisabati?

²⁵ Uwenʼahamula ahati: Mutazyazilʼimwe mwa kalata zila zyʼahavombʼuDavidi pala pe ṿihasovʼiṿwa kulya, pala pʼihamulumʼinzala nuno nava ve vali nawo?

²⁶ Pala pʼayinjiye munyumba ya Mulungu pamwaha wa kuvʼuwashiputʼumupiti uAbiyatali, pala pʼahalyangʼamakati ga lulolesyo, ge gali mwiho ukulya, ge vahalyanga veka ve vashiputo, palʼuwenʼahavapa navuvo vʼali navo.

²⁷ Havili ahavavuzya ahati: Isabati limwinziyʼumuntu, umuntu atinziyʼisabati ndali.

²⁸ Pe lyope nisabati uMwanamuntu wʼuMwene wakwe.