Maliko 16 - Tesitamenti Umupwa 1965

Ukuzyuha kwa Yesu

¹ Ilelo lwe lyasilʼisabati, pʼavaMaliya wa mu-Magadala nuMaliya unyina wa Yakobu, nuSalome vahavalʼukukalʼumulembo, vahati tuvalʼukumupaha.

² Vahalinga pisikʼitanzi lya pamulungu vahalavila lwe likwanda likutukulʼizuva.

³ Vahavuzilizanya vahati: Unanu akutufupusizyʼivwe pashilyango sha mbipa?

⁴ Ilelo lwe vakuti twenye, pe vahagʼivwe lifupushe; she lyali lipiti nkani.

⁵ Pe vahinjila mumbipa, vahagʼumulumendo atendime kumuhonʼumulilo, azwayʼinkanzu intali inzelu. Pe vahaganduha.

⁶ Uwenʼahati: Kwe ndali ukutetema. MukumwanzʼuYesu wa mu-Nazaleti, wʼahomelilwe pashihovenkanyo. Shʼazyusile, atalipʼumu. Yenyi, pe vamulambalisilʼipa.

⁷ Simuvale lelo, muvavuzye navasundikwa vakwe nuPeteli, mutinji: Akulongolela ukuvala mu-Galilayi. Kwe mulimwenya inza shʼavavuzizye nzila.

⁸ Pe vahafuma mumbipa, vahashimbila, she vahatetemaga ishitetemwi nulusukumilo lwavagwiliye nkani.

⁹ UwenʼuYesu lwʼazyusile pisikʼitanzi lya pamulungu shanzanche, pʼahatalihʼukumwitushizyʼuMaliya wa mu-Magadala, Uno we mumwakwe afumizyʼimpepʼimbivi zisano nazivili.

¹⁰ PʼuwenʼuMaliya ahavala ahavavuzya ve vali nawo shima, she vaswimililwe, vahakutʼamansozi.

¹¹ Ilelo lwe viṿuye ukuti: Mulanzi, amuwenyi, pe zihasita nukuvaholʼavene.

¹² Pisinda ahaga vakujendʼidala vavili vakuvala mumagunda, Pe vope ahavitushizya. Ahava fwe wunji lwʼakuvitushizya.

¹³ Pe vahavala vope ukuvavuzyʼavamwavo. Zyope nizya vanava zihasita nukuvaholʼavene.

¹⁴ Pisinda havili vazile vatendimʼukulyʼavishumi nawoka, pʼahavitushizya, ahavapilila namaganigani gavo nuvugomu vwa moyo gavo, she zitavahozilʼavene zye vavavuzizye vuvo ve vamuwenyi ukuti azyusile.

¹⁵ Ahavavuzya ahati: Muvale munsi yonti, muhavakumusizye vontʼavapelelwa Ivangeli.

¹⁶ Uno wengʼali nulwitiho akuti nukwozelwa, wʼalipona, nkandʼuno wengʼatali nulwitiho, wʼalilongwa ilya kumutupula.

¹⁷ Agene nyenʼamamfindango ge gakuvalandata vuvo venga vitisile ge gugo: Impepʼimbivi valizifumwa mwizina lyanʼine, valiyanga nimilʼimpwa,

¹⁸ ninjoha valizilema, nashenga vangʼweleye ṿimʼiṿwa kuvagoga ṿitalivapota. Avayeyevazu valivavihʼinyove, ilelo pe valizuzuvuha.

¹⁹ IlelʼuMwene uYesu lwʼayanzile navo, pʼahanyatulwa kumwanya, kwʼatendime kumuhonʼumulilo wa Mulungu.

²⁰ Pʼavene vahafuma pupo, vahavalʼukukumusya mwonti mwontʼinongwa; uMwene ahava pambombo yavo, izwi ahalipʼamaha, gʼahalipelela mumamfindango ge gavalandite.