Maliko 14 - Tesitamenti Umupwa 1965

Izya kumugogʼuYesu

¹ Ilelo gasyayʼamanda gavili ukwinza nuPasa nuchaka wa makati amasitaṿiluzizyo. Pe navashiputʼavapiti navamanyakalata vahanzʼizya kumwambamba ishifumbo ukumulema, ukumugoga.

² Vahati: Pachaka pe ndali, she pe vakutusambushilʼavantu.

Ukupakwa uYesu amafuta mu-Betaniya

³ Ayazile lelo lwʼali mu-Betaniya munyumba ya Simoni wamambombo, lwʼahalyʼiṿintu, pʼahinzʼumwantanda woka wʼasenzitʼinsupa ya mafutʼamagomu nkani amasitakusanganya nahantʼahanji, ahabazulʼinsupa, ahamwitilila pitwe.

⁴ Pe vamo ve vali pupo vahaṿitwa, vahavuzanya vahati: Akutaga gashʼamafuta vovulo?

⁵ Shenga vakazyagʼamafuta ganaga, pe nkandi valonsilʼamadinali ge galusizyʼamashumʼamashumi gatatu uvwinji, zye vavagavanyʼavapina. Pe vahamupilila nkanʼumwantanda.

⁶ UwenʼuYesu ahati: Simumuleshʼumwantandʼuno, mukumuhasamiha shonu? Shʼimbombo yʼambombeyʼine ye nyinza.

⁷ Shʼavapina ve muli navo shima. Inga mwatinji tuvapanjʼiṿwinza avene vatasoṿile. Nkandʼine ntakuva mumwinyʼumu shima.

⁸ Avomṿile anonelezizyʼuwene. Atalisile ukumpahʼamafuta ga kunsyililʼine.

⁹ Nalyoli nkuvavuzyʼine nkuti: Mwonti mwIvangeli likuvalʼukukumuha munsi yonti, mwe ziliyanjilwa poka Zyope nazyʼavomṿilʼumwantanda wununo, zikuva zya kumukumbushila wuyo.

Inza shʼuYuda amwambiliyʼuYesu

¹⁰ PʼuYuda wa mu-Kalyoti, woka wa vishumi navavili, ahavala kuvashiputʼavapiti, ahayanga navo izya kuvaninchilizyʼuYesu.

¹¹ Avene lwe viṿuye zinizi, pe vahaseshela, vahati: E, tukukulipilʼimpiya. Pʼuwenʼahanzʼapinza apa kuvaninchilizya.

UYesu akulya isha kulya sha kumpelela poka navasundikwa vakwe

¹² Apene lelo pisikʼitanzi lya makati amasitaṿiluzizyo, lye vakuvola nahagonzi ha Pasa, pe vahamuvuzilizyʼavasundikwa vakwe vahati: Watinji tuhayananye poshi apa kulyʼiwe ahagonzi ha Pasa?

¹³ Pʼuwenʼahavatumʼavasundikwa vakwe vavili, ahati: Muvale munkaya mula, mwe mulihomana numuntu wʼasenzitʼinsonta ya minzi; we muhamulandate;

¹⁴ muhinjile nawo mwenga mwazilʼakwinjilʼuwene. Mwe muhayanje nawo umuhatanyumba, muhatinji: UMusambilizi atili: Inyumba ya kulila mumwʼahagonzi ha Pasa nane navasundikwa vane yʼili kwi?

¹⁵ Pʼuwenʼalivalanganizyʼinyumbʼimpiti ya pigulu, mwe vaye niṿilili vayiyaninye. Mwe muhatuyananizye mumwo.

¹⁶ Pʼavasundikwa vahavala, vahafiha munkaya, vahazyaga inza she lilyo lyʼavavuzizye. Pe vahayananyʼiṿintu ṿwa Pasa.

17-25: Mat. 26,20-29. Luk. 22,14-23. Yoh. 13,21-26.

¹⁷ Ilelo pe lwe vwiliye shamazuva, pʼahavalʼukwinjila mumwo navishumi navavili.

¹⁸ Ilelo lwe vatendimʼukulya, pʼuYesu ahavavuzya ahati: Nalyoli nkuvavuzyʼine nkuti mwe muvaliye, woka wʼakulya poka nane, wʼalinanililʼine.

¹⁹ Pe vahandʼukuswimililwa nkani, vahamuvuzilizya woka woka vahati: Amwe nene?

²⁰ Uwenʼahavavuzya ahati: Woka mwe muvaliyʼishumi navavili, we wuyo we tukusanzila poka mumbakuli, nane nawo.

²¹ UwenʼuMwanamuntu akuvuha inza she lisimṿilwe kuli wuyo. Nkandi ye mwe we muntu, wʼukumwanililʼuMwanamuntu. Hali hinza ukusitʼukupapwa nalumʼiwe.

²² Ilelo lwe valemilʼukulya, pʼuYesu ahasendʼumukati, ahaputa, ahawumensulanya, ahavapa, ahati: Ali, we muvili wanʼuno.

²³ Nishikombe ahasenda, ahasalifwa, shope ahavapa, vonti vahangʼwela.

²⁴ Ahavavuzya ahati: Ge mavanda gane ga lumfingwi ganaga, ge gakuvitishila ve vinji.

²⁵ Nalyoli nkuvavuzyʼine nkuti: Nkwanda we musanyʼuno ntakuvuyizya nohavili ukungʼwelʼilya nsanga zya mampensyʼili, nkuvalʼukufiha pisiku lila lye ndingʼwelʼipwa mushinamwene sha Mulungu.

UYesu akukuvwa izya viva ntagwa viva vasundikwa

²⁶ Ilelo lwe vimṿilʼulushindiho, pe vahafuma kunzi, pe vahavala kwigamba lya Mavula.

²⁷ PʼuYesu ahavavuzya ahati: Mwenti mulipunula. She lisimṿilwe lye likuti: Ndimuhomangʼumudimi, ilelo pʼingʼonzi zilinyampana.

²⁸ Nkandi lwe nzyusile, pe ndivalongolela ukuvala mu-Galilayi.

²⁹ UwenʼuPeteli nyene ahamuvuzya ahati: Pope nashenga vonti vakupunula—nkandʼine ndali.

³⁰ AhamulʼuYesu ahati: Nalyoli nkukuvuzyʼine nkuti, vwe vusiku vunuvu, lwʼinkandʼishili nukuvilishila havili, she pʼuyihanile hatatu kukwanʼiwe.

³¹ Uwenʼahapitililʼukuyanga nkani ahati: Pope nashenga twavalʼukufwa nawe nane, pope ntaliyihana kukwaho. Vonti navamwavo vahayanga linili.

UYesu mu-Getisemani

³² Pe vahavalʼukufiha kuluvungano lumo lwe vatili mwe mu-Getisemani izina. Uwenʼahayanga navasundikwa vakwe ahati: Mutendame panapʼimwe, nkuvalʼukuputa kulʼine suti.

³³ AhasendʼavaPeteli nuYakobu nuYohani, vʼahavala navo. Pʼahatetema umwoyo ahelela.

³⁴ Pʼahavavuzya ahati: Umwoyo wane ali nuvuswimililwa uvupiti, ndi fwe ngati nakufwa vufwe. Muvanje panapʼimwe, mudamulaje.

³⁵ Uwenʼahapitilila hansi, ahakupama pansi, ahaputa ahati: Inga hapagaga pavupitililo papanʼahavalilizyo hanaha!

³⁶ Ahati: Aha, we Tata, naṿimo ṿitakukupotʼiwe, ushipitilizyajʼishikombʼishi papanʼipa. Nkandi ne washʼine zye nkasimʼine, zivombelwaje zyengʼukasimʼiwe.

³⁷ Ahinza, ahavaga vakasitʼutulo. Pʼahayanga nuPeteli ahati: Simoni, ukasitʼutulo? Pope nahavalilizyo hoka vwelele hakupositʼukudamulʼiwe?

³⁸ Simudamule, muputaje, ukuti ulutazyo lutavagaje. Uwenʼumupepo wa muhati wʼayitisile, uwenʼumuvili nyene we mutonsu.

³⁹ Ahavuyizya nohavili ahavalʼukuputa, ahayanga gugo gʼayanzilʼulutanzʼamazwi.

⁴⁰ Lwʼayinzile nohavili, pʼahaga havili vakasitʼutulo, shʼaminso gavo gamwamile, Zyope nazye vahamwamula vahasavata vwelele.

⁴¹ Pʼahinza nohavili ulwa vutatu ahayanga navo ahati: Pashi simukataje, mutuzyaje. Mpela. Ahavalilizyo hafisile. Yenyi, uMwanamuntu akutwalwa munyove zya vatalamalandu.

⁴² Simuvushe tujende, ayinzilʼuwa kunanilila.

Ukulemwa kwa Yesu

⁴³ Ilelo naluvilo lwʼamakuyanga, pe vahaganduha wuyo ayinzilʼuYuda uwa vishumi navavili poka navantʼimpuga, ve valemile niṿipanga namakunku, vafumile kuvashiputʼavapiti nakuvamanyakalata nakuvasongo.

⁴⁴ Uwene wuyo wʼavapanga avavuzizye nishimanyilo, ahati: Uno wenga nkumulipa, we wuyo we muhamuleme, mumutwale, atahashimbile.

⁴⁵ Ilelo lwʼafisile, pʼahamushimbililʼuwene, ahati: Labi; pʼahamufipa.

⁴⁶ Pe vahavusyʼamahono, vahamulema.

⁴⁷ Avene nyene ve vimiliye pupo, woka ahakulʼishipanga shakwe, ahamudibʼumunyamata wa washiputʼumupiti, ahamusengʼikutwi lyoka.

⁴⁸ PʼuYesu ahavavuzya ahati: Mwinzile kukwane kundema fwe ngati mwavalʼukumulemʼumupumaṿintu, musenzite niṿipanga namakunku?

⁴⁹ Shima lwe tuhizyaga mwa tempeli, lwe nkavasambilizyaga, pe mutahandema; nkandi she zihonzizye vovulo ukwinza zizyo zye zili mwa kalata.

⁵⁰ Pe vahamuleshela vontʼavasundikwa vakwe, vahashimbila.

⁵¹ Wokʼumulumendo wʼamulandite, wʼazwaye we mutote weka wa mwendʼumuzelu mumuvili, we vahamulema.

⁵² Pʼuwenʼahavaleshelʼumwenda, ahashimbila vwelele.

Ukulongwa kwa Yesu kuwashiputo umupiti

⁵³ UwenʼuYesu vahavala nawo, vahamutwala kuwashiputʼumupiti, she kwe vavungine navashiputʼavapiti navasongo navamanyakalata.

⁵⁴ UwenʼuPeteli wʼahamulandatʼukutali ahafiha nawo paluvungano lwa washiputʼumupiti, pʼahatendama poka navanyamata ukwotʼumwoto.

⁵⁵ Avene nyene avashiputʼavapiti nuluhomano lwonti lwa vayangamalandu vahanza zimo izya kumumenelezyʼuYesu, izya kumugojela mumwo, nkandi vatazyazile.

⁵⁶ Pe vali navinji ava kumuyangʼizyʼilenga, havili vahaga zye vakumuyanga zitayaninʼahinza.

⁵⁷ Pe vahavuha vamo vahamuhomeshezyʼizyʼilenga, vahati:

⁵⁸ Umuntʼuno tuhaga akuti: Imanyilʼine ukumongolʼutempeli uno, we vazenzile ninyove, havili njende nukuvombʼamanda gatatu ukuzengʼuwamwavo umusitakuzengwa ninyove.

⁵⁹ Havili Uvwahome vwavo vwe vakumuyanga vutayanine.

⁶⁰ Pʼahavuhʼuwashiputʼumupiti, ahimilila pahati, ahamuvuzilizyʼuYesu ahati: Zyonti zye vakuyanga vanava sutakwamula nalimʼiwe?

⁶¹ Uwenʼahapuma mwa, ahasita nukwamula nalimo. Pʼuwashiputʼumupiti ahavuyizyʼukumuvuzilizya, ahati: Iwe we Chilisiti lelo, we Mwana wa Muhatalutimo?

⁶² UwenʼuYesu ahati: E, nene. Havili mulimwenyʼuMwanamuntu lwʼatendime kumuhonʼumulilo wa Muhatamaha, lwʼakwinza mumavingo ga kumwanya.

⁶³ Pʼuwashiputʼumupiti ahazepulanyʼamenda gakwe, ahati: Pe tutinji tuvanze vashʼavanji ava kumuyanga?

⁶⁴ Mwiṿuye namwe lwʼakumusamulʼuMulungu. Vulʼimwe? Pe vonti vahalonga vahati: We wa kumugoga.

⁶⁵ Pe vamo vahandʼukumuswila namati nukumuziga kuminso, vahamukunta, havili vahati: Ukwo, kuvwaga lelo. Vope navanyamata vahamukanza namakofi.

UPeteli akumuhanʼuYesu

⁶⁶ UwenʼuPeteli lwʼatendime paluvungano, pe wokʼumuntu wa washiputʼumupiti, umwantanda, ahavala pʼali.

⁶⁷ AhagʼuPeteli akwotʼumwoto, pʼahamwenya, ahati: Nawe wavanga nuYesu wa mu-Nazaleti ula.

⁶⁸ UwenʼuPeteli ahahana ahati: Ha, ntazimanyile zyʼukuyanga. Ilelo lwʼafuma kunzi lwʼali pashilyango, pʼihavilishilʼinkanda.

⁶⁹ Uwenʼumwantanda lwʼamuwenyi, pʼahavuyizya havili ahavavuzya vuvo ve vali pupo, ahati: Umuntu wununo wamwavo wa vala.

⁷⁰ Uwenʼahahana nohavili. Ilelo lwe vizizye hansi, pe vahavuyizya vuvo ve vali pupo, vahayanga nuPeteli, vahati: Weya, nalyoli we wamwavo wa vala. She we muGalilayi.

⁷¹ Pʼuwenʼahayitipa, ahalapa, ahati: Ine ntamumanyile nakumʼumuntʼuno we mukumutaha.

⁷² Pʼihavilishilʼulwa vuvili inkanda. PʼuPeteli ahakumbuhʼizwi lyʼuYesu amuvuzizye lyʼatili: Lwʼishili nukuvilishila havilʼinkanda, pʼuyihanile hatatu kukwanʼiwe. Pʼahasiva, ahakutʼamansozi.