Maliko 11 - Tesitamenti Umupwa 1965

UYesu akwinjila mu-Yelusalemu nuluseshelo ulupiti

¹ Lwe vasenjeleye naku-Yelusalemu naku-Betifage naku-Betaniya lwe vamakufiha nakwIgamba lya Mavula, pʼuYesu ahavatumʼavasundikwa vakwe vavili,

² ahavavuzya ahati: Muvale munkayʼila ye mulungamine nayo. Lwe mukuvalʼukufiha, pe mutalihavʼukwagʼinyana ya ndogovi ye vakunzile, ye numʼumuntu atalimbiye nalumo. Ye musatule muhaletʼuku.

³ Ingʼumuntu wumo akuvavuzilizya akuti: Mukuhonzya vuli? pe muhatinji: ShʼuMwene akuyanza, pʼaliyigalusya naluvilo uku.

⁴ Pe vahavala, vahagʼinyana ya ndogovi, vayikunzile kushilyango kunzi pidala. Pe vahayisatula.

⁵ Pe vamo ve vimiliye pupo vahavavuzilizya vahati: Mwe shonu, mukusatula yashʼinyana ya ndogovʼino?

⁶ Avene vahayanga lilyo lyʼavavuzizyʼuYesu, pe vahavaleha.

⁷ Pʼinyana ya ndogovi vahayitwala kwa Yesu. Pe vahalʼamenda gavo pamwanya pandogovi, pʼuwenʼahalimbila.

⁸ Vamo nyenʼavantʼavinji vahalʼamenda gavo mwidala, avamwavo insamba zye vahapanyulaga mumakwi.

⁹ Pe vonti ve valongoleye kwilongolela nave valandite mwisinda vahavilishila vahati: Hosyana, mulotwa wʼakwinzila mwizina lya Mwene.

¹⁰ Vulotwa uvumwene vwa Tata uDavidi, vwe vukwinza. Hosyana kumwanya.

¹¹ Pʼahavalʼukufiha mu-Yelusalemu, ahinjila mwa tempeli. Ilelo lwʼatalanginye mwonti ukwenyelezya zyonti, pʼahaga vwiliye. Pʼahafuma ahavala mu-Betaniya navasundikwa vakwe ishumi navavili.

Ituvu isita nsanga

¹² Isiku lya ndavi lelo lwe vakufuma mu-Betaniya, pʼuwenʼahaga yikumulumʼinzala.

¹³ Ilelo lwʼawenyʼituvu lya matundʼaminji ukutali, pʼahavala ahati nenye inga lihomilʼamakunyu. Ilelo lwʼafisile pʼahaga gamezile ge matundu geka. Shʼamanda ga kuhomʼamakunyu gashili.

¹⁴ Pʼahalivuzya ahati: Ilelo pe shima numo atalyanje nalumo insanga papaho. Avasundikwa vahiṿwa zinizi.

UYesu akuzelufwa mwa tempeli

¹⁵ Pe vahavalʼukufiha mu-Yelusalemu, ahinjila mwa tempeli, pʼahavavinga mumwo nave vahakazyaga nave vahakalaga mwa tempeli, niṿitala ṿwa vuvo ve vahatananyagʼimpiya niṿitengo ṿwa vakalankunda ahaṿibenulanya.

¹⁶ Ahavalesya nave vahatinji vatushe ilya mwa tempeli lwe vanyatuye yimo.

¹⁷ Ahavalanganizya ahati: Amwe litasimṿilwe lye likuti: Inyumba yane yilitashilwa ukuva ye nyumba ya kuputila mumwo vontʼavakunzi? Nkandʼimwe muyipezilʼukuva ninga ya vapumaṿintu.

¹⁸ Zye vahiṿwa navashiputʼavapiti navamanyakalata zinizi, pe vahanzʼizya kumugojela; havili vahogopʼavantʼimpuga yonti, she vahasukumila munsambilizyo zyakwe.

¹⁹ Shima ahalinga lwe vwiliye shamazuva, pʼahafuma munkaya mumwo.

Amaha ga lwitiho

²⁰ Shanzanche lwe vakutuha, pe vahagʼituvu lila lyumile nage mazi.

²¹ Pʼahakumbuha UPeteli ahamuvuzya ahati: Labi, yenya, ituvu lila lyʼulitifile lyumile.

²² PʼuYesu ahamula ahati: Muve nulwitiho lwa kumwitihʼuMulungu.

²³ Nalyoli, nkuvavuzyʼine nkuti: Uno wengʼakuyanga kwigamba linili akuti: Vuhagʼuyitaje mwa sumbi, ilelo asite nukuganagana mumwoyo wakwe, nkandʼali nulwitiho lwe lukuti zikwinza zizyo zyʼayanzile zikuyipela, wʼaliva nazyo.

²⁴ Mwe mumwo nkuvavuzya nkuti: Vwonti ṿwenga mukulava lwe mukuputa, muvanje nulwitiho lwe lukuti tukuposhela, pe muliposhela.

²⁵ Inga mwimiliye mukuputa, pe muswilʼamalandu ga muntu wengʼali nago kulʼimwe; pe wope nuSo kumwanya ukuti agaswile namwʼamalandu ginyu.

²⁶ Ingʼimwe mutakuswilʼamalandu ga vamwinyu, pe wope nuSo kumwanya atakuswila namwʼamalandu ginyu.

Vahamuvuzilizyʼu Yesu amaha gakwe

²⁷ Pe vahafiha mu-Yelusalemu nohavili. Ilelo lwʼakujendanga mwa tempeli, pe vahapalamila kukwakwe avashiputʼavapiti navamanyakalata navasongo.

²⁸ Vahamuvuzilizya vahati: Zyʼukuvomba ukuvombelʼamaha vuli? Unanʼakupiyʼamaha ganaga atili uvombaje zinizi?

²⁹ UwenʼuYesu ahamula ahati: Nane mbavuzilizyajʼizwi lyoka. Inga mwambuzya lyenelyo, pe nane nkuvavuzyʼamaha ge nkuvombela zinizi kwe gafumile.

³⁰ Ulwozyo lwa Yohani lwafumile kumwanya amwe kuvantu? Simumbuzye.

³¹ Pʼavene vahanongʼonelana lwe vayelelesile, vahati: Inga tukuti lwafumile kumwanya, pʼuwenʼalitinji: Pe mwali nishonu ukumwitiha?

³² Amwe tutinji valwasite ve vantu?—Havili vahavogopʼavantu, she vonti vamulemilʼuvukuvwi uYohani.

³³ Pe vahanawamulʼuYesu vahati: Tutalumanyile. Pe wopʼuYesu ahamula ahati: Pe fwane lelo nane ntakuvavuzya kwe gafumilʼamaha ge nkuvombela zinizi.