Maliko 10 - Tesitamenti Umupwa 1965

Ukuvuzilizya izyʼitalaka

¹ Pʼahepa pupo pʼali, ahavalʼukufiha munsi ya mu-Yudayi namwisyila lila lya Yolidani. Pʼavantu vahavalʼukuvungana pupo pʼali. Uwenʼahavasambilizya inza shʼahahonzyaga shima.

² PʼavaFalisayi vahapalamila kukwakwe, vahamuvuzilizya vahati: Umuntʼali numulandu ingʼakutavulʼumushi wakwe? She vahamulinga.

³ Uwene ahavavuzilizya ahati: UMose munkomelezyo zyʼalajizizye atili vuli?

⁴ Avene vahati: UwenʼuMose wʼayitisile atili mumusimbilʼukalata wa talaka inga pe mumutavule.

⁵ UwenʼuYesu ahamula ahati: Shʼamoyo ginyu gali nuvugomu, mwe mumwo mwʼavasimbiyʼululajizyo lunulu.

⁶ Apene ukufuma pavwando lwe ṿwapezilwe ṿwonti, pʼahavapela numwanaṿuli numwantanda.

⁷ Mwe mumwo umuntu akumuleha uyise nunyina, nukusyelemetela numushi,

⁸ ilelo ve vavili vanava valivʼumuvili woka wene. Pe valesilʼukuva vavili, vali muvili woka wene.

⁹ Ilelo hengʼahapatinkinyʼuMulungu, he mwiho ukuhapagulanya we muntu.

¹⁰ Kuhaya havili vahamuvuzilizyʼavasundikwa vakwʼinongwa zinizi.

¹¹ Uwenʼahavavuzya ahati: Uno wengʼakumuvingʼumushi wakwe, havili ajende nukusendʼuwunji, pʼavembusile numuhamuntu.

¹² Wope numwantanda ingʼakulehʼumulume wakwe, ingʼakusendana nuwunji, pʼakuvembuha.

UYesu akulota avanʼavansi

¹³ Pe vahaletʼavana kukwakwe vahati avapalamansye. Avenʼavasundikwa vakwe vahavapilila ve vavaleshe.

¹⁴ UwenʼuYesu nyene lwʼavawenyi pʼahaṿitwa, ahati: Simuleshʼavana vinze kukwane. Mutavahanizye. Shʼishinamwene sha Mulungu sha vuvo venga vali vovulo.

¹⁵ Nalyoli nkuvavuzyʼine nkuti: Uno wengʼishinamwene sha Mulungu atakushiposhela fwe mwana, wʼataliyinjila nalumo.

¹⁶ Pʼahavakukula, ahavavihʼinyove, ahavalota.

Umulumendʼudumbwe akulondolʼuvulanzi vwa shimashima

¹⁷ Ilelo lwʼafuma munyumba lwʼakuti njende mwidala, pe wokʼumuntu ahamushimbilila, ahamusugamilila, ahamuvuzilizya ahati: We Musambilizi, we mwinza, imbombe zyonʼine izya kuvalʼukupwanʼuvupwano vwa vulanzi vwa shimashima?

¹⁸ UwenʼuYesu ahati: Ukunjanga shonʼuvwinzʼine? Atalipo numo we mwinza, nkandʼuMulungu weka.

¹⁹ Inkomelezyo uzimanyile zye zikuti: Utahagoje, Utahavembuhaje, utahivaje, utamuhomeshezyaje shaha uwamwinyu, utasampajʼiṿwa wamwinyu, umushindishe uso nuvinyu.

²⁰ Pʼuwenʼahamuvuzya ahati: We Musambilizi, zye nzilandite zyonti zinizi, mfumile nazyo kwe kuvunsi.

²¹ PʼuYesu lwʼamwenya pʼahamukunda, ahati: Halipo hoka hʼusyayʼiwe. Valaga, ukazyʼishuma shaho shonti, uvapanjʼavapina, she pʼuliva nishuma kumwanya. Inga pʼuyinze undandatʼine.

²² Pʼuwenʼahavinduha kusheni lwʼayi-ṿuyʼizwi linili, ahaswimililwa, ahavala. Shʼali muhataṿwu-mʼiṿwinji.

Ipunulo lya vudumbwe

²³ PʼuYesu ahatalanganya, ahavavuzyʼavasundikwa vakwe ahati: Uvugomu te vugomʼavahataṿwuma ukwinjila mushinamwene sha Mulungu!

²⁴ Pʼavenʼavasundikwa vahahasamala pamazwi gakwe. PʼuYesu ahavuyizyʼukuyanga ahati: Mwe vana mwe, kugomu nkani ukwinjila mushinamwene sha Mulungu ve vakusuvila ṿwe ṿwuma.

²⁵ Ingamila ukutuha mwilyinso lya nsindano nudumbwe ukwinjila mushinamwene sha Mulungu—kupupusu ukutuhʼingamila mwilyinso lya nsindano.

²⁶ Pʼavenʼavasundikwa vahonjezyʼukutentwa, vahati: Pʼunanu angapona lelo?

²⁷ PʼuYesu ahavenyelezya, ahati: Avantu ve vashi, ve zivaposite zinizi, uwenʼuMulungu nyene nazimo zitakumupota.

²⁸ PʼuPeteli ahayanga ahati: Yenya, iswe tuṿilesile ṿwontʼiṿwitu, tukulandite wenewe.

²⁹ PʼuYesu ahati: Nalyoli, nkuvavuzyʼine nkuti: Atalipʼumuntu numo wengʼalesile inyumba, navaninʼavanaṿuli, navaninʼavantanda, nunyina, nuyise, navana, namagunda pazyane napIvangeli,

³⁰ wʼatalivazilwa amashumʼishumi pali hoka he ahalesile; akuposhelaga nakushinishi namunsi pansʼumu: Inyumba, navaninʼavanaṿuli, navaninʼavantanda, navanyina, navana, namagunda poka nuvuṿwimilwa pupo, mwope namunsʼila yikwinza uvulanzi vwa shimashima.

³¹ Avinjʼavalanzi nyene valiva vamwisinda, avinjʼavamwisinda valiva vatanzi.

Ukukuvwa kwa vutatu ukwa vufwe vwakwe Yesu

³² Avene vali mwidala ukuzuvʼukuvala mu-Yelusalemu. UwenʼuYesu ahalongolela kwilongolela, pʼavene vahatentwa. Avene ve vahalandata mwisinda vahatetema. PʼuYesu ahasenda nohavilʼavʼishumi navavili, ahavavuzya zizyo zye zikwe zimwinzilaje.

³³ Ahavavuzya ahati: Yenyi, tukuzuva tukuvala mu-Yelusalemu, mwʼuMwanamuntu alitwalwa nakuvashiputʼavapiti nakuvamanyakalata. Ve valimulonga ilya kuti pakuti afwanje, havili valimutwala kuvakunzi,

³⁴ ve valimusamula, valimuswila namati, valimusyempa, valimugoga. Nkandi pisiku lya vutatu pʼalizyuhʼuwene.

ZyʼuYakobu nuYohani valayile

³⁵ Pe vahapalamila kukwakwe avana-Zebedayi, nuYakobu nuYohani, vahati: We Musambilizi, tukwanza ukulava hamo kukwaho aha kutupʼiwe.

³⁶ Uwenʼahavavuzya ahati: Hantu vuli he mukulava, mukuti imbavombelʼine?

³⁷ Avene vahamuvuzya vahati: Utupanjʼizya kutendama nawe lwʼuliyinza muvumwamu vwaho, woka kumuhonʼumulilo, woka kumuhonʼumumongo.

³⁸ UwenʼuYesu ahamula ahati: Mutazimanyile zye mukulava. Amwe mumanyilʼukungʼwelʼishikombe she nkwe ngʼwelajʼine, amwe ukwozelwʼulwozyo lwe nkwe nozelwajʼine?

³⁹ Vahati: Ena tumanyile. UwenʼuYesu ahavavuzya ahati: Ishikombe shane she shashi, she mulingʼwela, nulwozyo lwane lwe lwashi, lwe muliyozelwa.

⁴⁰ Nkandʼukwenʼukutendama kumulilo nakumumongo kukwane, yʼite mbombo yanʼine ukumupʼumuntu ndali, pe valitendama vuvo vengʼavayananizizye Wuyo.

Uvupiti vwa nalyoli

⁴¹ Avene lelʼavʼishumi lwe viṿuye zinizi, pe vahavaṿitililwʼavaYakobu nuYohani.

⁴² PʼuYesu ahavita, ahayanga navo ahati: Muvamanyile nave vakuyanjilwa ukuva vamwene va vantu, ukuti vakutilingʼulwa vumwene avantu vavo, navapiti vavo vakuvakonzya ge maha avantu.

⁴³ Imwe nyene mutahonzyaje vovulo ndali. Uno wengʼakwanzʼukuva mupiti kulʼimwe, we pakuti ayipelajʼukuva muvombezi kulʼimwe.

⁴⁴ Nuno wengʼakwanzʼukuva mutanzi kulʼimwe, we pakuti ayipelajʼukuva munyamata wa vonti.

⁴⁵ She wope nuMwanamuntu atinzilʼukuvanzʼavakumuvombela wuyo ndali, ayinzilʼukuvavombela ve vantu, ayinzilʼukulipʼuvulanzi vwakwe ukuti vuvanje vwa kuvahombola ve vinji.

Ukupozya uBalitimayi uvwantonko

⁴⁶ Pe vahavalʼukufiha mu-Yeliho. Ilelo lwe vakufuma mu-Yeliho nawuyo navasundikwa vakwe navantʼimpugʼimpiti, pe vahagʼuwantonko umulaṿi uBalitimayi, umwana-Timayi, wʼatendime kwidala kuluvazu.

⁴⁷ Ilelo lwʼayiṿuye ukuti we wʼuYesu wa mu-Nazaleti wʼakupitilila, pʼahavilishila ahati: Yesu, we Mwana-Davidi, umpepelezyaje.

⁴⁸ Vahamupililʼavantʼavinji vahati: We pumaga! Uwene nyene pʼahonjezya nkani ukuvilishila, ahati: We Mwana-Davidi, umpepelezyaje.

⁴⁹ PʼuYesu ahimilila, ahati: Mumwite. Pe vahamwitʼuwantonko vahati: Jimbagʼiwe, vuhaga, shʼunʼakukwita.

⁵⁰ Pʼuwenʼahatagʼumwenda wakwe umutote pansi, ahavuha, ahavala kwa Yesu.

⁵¹ PʼuYesu ahamuvuzilizya ahati: Watinji nti vuli nawe? Uwenʼuwantonko ahati: Labuni, inga nenyagʼaminso.

⁵² UwenʼuYesu ahati: Vuhaga, lukuzuzuvushizizye lwe lwitiho lwaho. Pʼahenyʼapashezi. Pʼahamulandata mwidala.