Kolosi 3 - Tesitamenti Umupwa 1965

Zye zikuloleha mwidala lya kuzyuha poka nuChilisiti

¹ Apene lelo inga muzyusile poka nuChilisiti, pe mwanzajʼiṿwa kumwanya, kwʼuChilisiti atendime kumuhonʼumulilo wa Mulungu.

² Musivaje zye zya kumwanya, mutasivajʼizya pansi.

³ She mwafuye, shinishi lelo pʼuvulanzi vwinyu vuṿwamile poka nuChilisiti mwa Mulungu.

⁴ Inga lumo lwʼuChilisiti ayinzʼaloleha, pʼimwe muliloleha poka nawo muvumwamu.

⁵ Ishi pe mutugogaje utuntu twa mumuvili winyu wa pansʼipa, nuluvembu nuvuhandamanu, nuvupwe vwa kupwela mumbivi, nuvulugusu uvuvivi, nuvupapilaṿwonti, shʼuvwene vwe vwa kugavombelʼamalungu.

⁶ Zyonti zinizi zye zikuvaletela vontʼavanalwilo umulaha wa Mulungu,

⁷ she lulwo namwe muhajendelaga muli zinizi, lwe muhalandilaga muli zizyo.

⁸ Shinishi nyene pe muzitagaje zyonti zinizi, umulaha, nahafwishi, nulombwa, numusamu, namazwi ga nsoni ukufuma mwilomu lyinyu.

⁹ Mutalumilanajʼamalenga, lwe mwazulʼumuntʼumukali nimbombo zyakwe zyonti,

¹⁰ lwe mwazwalʼumuntʼumupwa wʼayandusile ukufiha kuvumanyinsanyi ukulandata mumwo mwʼamuhozizyʼishati shʼuno wʼamupezile.

¹¹ Mwe muvupwʼumu mwe numo umuGiliki numuYuda, numuvolwa numusitakuvolwa, numujeni umusitamwiho, numuSikito, numuzya numutavushe ndali, wʼuChilisiti mutupu muli vonti.

¹² She mwe vasavulwa va Mulungu avafinjile avankundwa, ishi pe muzwalaje ulupepelezyo lwa muhati, nuvutonsu nuvwahayisye nuvutehamu nukujimbilila.

¹³ Mutetesanyaje nukuswilana zyenga muli nazyo izya kulanduzanya, inza shʼuMwene avaswiliyʼizyinyu namwe ṿwe muhonzyaje vovulo.

¹⁴ Kulusya pali zyonti zinizi mwonjezyajʼishikunzi, she shiyipezilʼukuva lilamba lya vulunjisu.

¹⁵ Uvwenʼuvwihalo vwa Chilisiti vwe vuvanje vumwene mumoyo ginyu, she mwisitwe mumuvili woka mwene, lwope nulupi muvanje nalwo.

¹⁶ Ilyenʼizwi lya Chilisiti lye lidilaje lyonti muhati zyinyu, munjele zyonti, lwe mukusambilizanya nukutontelana munyimbo zya kusalifwa namunyimbo zya lutimo inyata zye mukwata mwa mupepo, zye zifumile muvwila, lwe mukumwimbilʼuMulungu mumoyo ginyu.

¹⁷ Zyonti zyenga mukuvomba mumazwi namumbombo, zye muvombaje mwizina lya Mwene Yesu lwe mukumusalifwʼuMulungu uYise muli wuyo.

Ulujendo lwa nyumba ya muchilisiti

¹⁸ Mwe vantanda, mukonzaje kuvalume vinyu inza ṿwe zihondeye mwa Mwene.

¹⁹ Mwe vanaṿuli, muvakundaje avashi vinyu mutavaṿitililwaje.

²⁰ Mwe vana, muvasajilʼavapafi vinyu muli zyonti she zye nyinza kwa Mwene.

²¹ Mwe vayise, mwandaje mutavasambulanyaje avana vinyu, ukuti vatasilikitwaje.

²² Mwe vazya, muvasajilaje muli zyonti avapiti vinyu muvuntu, mutavavombelaje peka penga vakuvenya fwe ngati mukwanzʼuvwankundwa kuvantu ndali, muvavombelaje shisitakusiva inyinji mumoyo ginyu lwe mukumunyilʼuMwene.

²³ Yonti yenga mukuvomba muvombaje numwoyo wonti fwe ngati mukumuvombelʼuMwene, te vantu.

²⁴ She mumanyile ukuti muliposhela kwa Mwene amalipilo ginyu, nkutaha uvupwano. MumuvombelajʼuMwene Chilisiti!

²⁵ Shʼuno wengʼakuvomba zimo ingombanu wʼaliposhela zizyo zyʼagombanisile. She kutalipo ukusevelwa kuvwinza vwa kuminso.