Kolosi 2 - Tesitamenti Umupwa 1965

¹ She nkasimʼine ukuti muvumanyʼuvulugu vwane ṿwe vuli vwe mumpeleyʼimwe nava mu-Layodikeya, navonti ve vatambwenyi muminsʼine umuvili,

² ukuti vapumilizilwaje mumoyo gavo lwe vakuyikunjilinkanya mushikunzi, ukuti vavanje muvwinji vwa vwizule vwa vusinkamizyo, ukuti vazimanyinsanye izya vuzigizigi vwa Mulungu, uvwa Chilisiti,

³ wʼishuma shonti isha njele nisha vumanyinsanyi ṿiṿwamile mumwakwe wuyo.

Ukuva poka nuChilisiti ninsoshe kuzya njele zyʼilenga

⁴ Zye ukuvavuzya zinizi ukuti numo atavatezyaje namazwi ga menelezyo.

⁵ She nashenga ndʼukutali umuvili, pʼuwene umupepo wane ali namwe, nkuseshela lwe nkwenya uluyananyo lwinyu nilinga lya lwitiho lwinyu lwe mumwitisilʼuChilisiti.

⁶ Inza she mumuposheleye uChilisiti Yesu, uMwene, vovulo mujendelaje muli wuyo,

⁷ lwe musimfile amazi nukuzengwa muli wuyo, lwe musimfile mulwitiho inza she musambilizilwe, lwe mukulusya ukusalifwa.

⁸ Mwandaje numo atavagomaje muvusungwanjele namuvugulugulu vwa shaha mumiho gʼavantu vavalesheye namumaha ga munsʼumu inza mwe zyavaliye lulwo, shisitakumulandatʼuChilisiti.

⁹ Shʼuvulunjisu vwonti vwa vulungu vwe vuli mumwakwe wuyo, nkuti mwe mumuvili wakwe.

¹⁰ Namwe mulunjisile muli wuyo, we litwe lya vusongo vwonti nilya vuhombe vwonti,

¹¹ Havili muli wuyo muvolilwe uvuvolwa uvusitakuvolwa ninyove, nkutaha uvwa kuzulʼumuvili wa mbivi uno, uvuvolwa vwa Chilisiti.

¹² She mwasyililwe poka nawo mulwozyo, havili muli lulwo muhazyuha poka nawo mulwitiho lwa maha amapiti ga Mulungu wʼamuzyusizye kuvafwe.

¹³ Ilelo lwʼimwe mwali mwe vafwe munchilanyo namunsitakuvolwa umuvili winyu wa mbivi, pʼuwene ahavapelʼimwe poka nawo uvulanzi, lwʼavaswila inchilanyo zyinyu zyonti,

¹⁴ lwʼahasyusyutanyʼukalata wa malandu, wʼatulanduzyaga uwa ndajizyo, wʼatulonjelelaga,

¹⁵ lwʼavuzula uvusongo vwonti nuvuhombe vwonti, ahavususyʼapazelu, ahavuholela pashihovenkanyo.

¹⁶ Ilelo numo atavalongaje pazya kulya nukungʼwela namunongwa zya chaka nizya mwezi umupwa nizyʼisabati.

¹⁷ She zinizi zye ṿinzyunguli ṿwa zizyo zye zikwinza, uwenʼumuvili nyene we wa Chilisiti.

¹⁸ Numo atavafwulajʼahuma hinyu aha mulutumṿanyo, nga ve vala ve vakuyipelelʼuvwahayisye, nga ve vala ve vakuvashindiha avahavizya, ve vakusajila zye vaziwenyi, ve vakuyibada shaha munsivo zya muvili wavo wa mbivi,

¹⁹ ve vatakuyilemanya kwitwe, mwʼumuvili wonti afumile, wʼakutulana, wʼayikunjilinkinye nimpingu ninkole, ukukulʼuvukuzi vwʼapezilʼuMulungu.

²⁰ Inga mugalesile amaha ga munsʼumu inza mwe gavaliye lulwo, she mwafuye poka nuChilisiti, pe mukuyiviha shonu kunsi kundajizyo fwe ngati uvulanzi vwinyu vwa munsi yinino?

²¹ Kunsi kundajizyo zye zikuti: Kwe ndali ukuyilema, kwe ndali ukuṿitomola, kwe ndali ukuṿipalamansya,

²² she ṿiniṿi ṿwonti ṿikusilila mulunanjiho lwʼumuntu akuṿilya; zyonti zinizi zifumile munkomelezyo namunsambilizyo zya vantu,

²³ zye zikuloleha fwe ngati zya njele, mwʼavantu vakushindiha umushinzi we vayiseveye veka, havili lwe vakuyisya veka muvwahayisye, havili lwe vatakusajilʼumuvili. Nkandi zikuvosya nahamo ukuzidindila impapilo zya muvili wa mbivi.