Ishitushizya 9 - Tesitamenti Umupwa 1965

¹ Pe wope nuhavizya wa vusano ahahomʼisaji. Pe nkalda uluzota lwe lwaguye pansi kufuma kumwanya, lwe luhapelwa ishigulilo sha shiliva sha kungolongo.

² Ulwene luhigula kushiliva sha kungolongo. Ilelo pʼilyosi lihazuva ukufuma mushiliva fwe ngati lyosi lyʼilungu ipiti, nizuva lihayipelʼukuva shisi, nakumwanya vovulo kwe kwizuyʼilyosi lya shiliva.

³ Numakanta ahafuma mwilyosi, ahagwa pansi, wʼapelilwe amaha ge gali fwe ngati maha ga nkonya zya munsi ge zili nago.

⁴ Lyayanzilwe kuli wuyo ukuti atanangajʼisole lya munsi numulemṿwe wonti namakwi gonti, nkandi ve vantu veka ve vate nahalemezanyo ha Mulungu pasheni shavo.

⁵ Apelilwe ululajizyo ukuti atavagogaje ndah, nkandi ukuti vayimṿilwaje kumezi gasano. Amayimba gavo gali fwe ngati mayimba ga mbolela zya nkonya lwe yikumulumʼumuntu.

⁶ Mumanda gugo pʼavantu valiyanzaga nkani uvufwe, ilelo valipotwa ukuvwenya. Valisungwaga nkani ukufwa nkandi uvufwe vulivashimbila.

⁷ Ukwenʼukuholana umakantʼuno ali fwe ngati mfalasi zye ziyananizilwe kuvulugu. Pamatwe gavo zyali niṿintu ṿwe ṿiholine niṿipambwi ṿwa sahabu, kuminso zyali fwe vantu.

⁸ Insisi zyavo zyali fwe ngati nsisi zya vantanda naminso gavo gali fwe ngati ga nsama.

⁹ Paṿifuva azwaye iṿijela fwe ngati ṿizigashifuva ṿwa vijela. Niṿwapa ṿwakwe ṿihakuta fwe ngati mageleti ga mfalasi inyinji zye zikushimbilila muvulugu.

¹⁰ Ali ninsinda fwe ngati zya nkonya nimbolela. Agenʼamaha ga kuvayimṿwʼavantu kumezi gasano ge gali kunsinda zyavo.

¹¹ Ali numwene wavo uwa kumukonzya, uhavizya wa kungolongo, izina lyakwe mushiHebuli wʼuAbadoni namushiGiliki wʼuApolyoni.

¹² Izya kuti: Ye mayi we, intanzi zye zipitiliye. Yenya, zisyaye ukwinza izya kuti: Ye mayi we, zivili zye zikulandata pali zinizi.

¹³ Pe wope nuhavizya wa mutanda ahahomʼisaji. Pe nkiṿwʼizwi lyoka ukufuma muṿipembe ṿine iṿwa shifinjilo sha sahabu she shili kuminso ga Mulungu,

¹⁴ lye lihayanga kwa havizya wa mutanda wʼali nisaji, lihati: Uvasatule avahavizya vane vak ve vakunzilwe pʼijenjʼipiti lya Yefulati.

¹⁵ Pe vahasatulwa avahavizya vane vala, ve vayananizilwe nzila pazya havalilizyo hanaha napazyʼisiku napazya mwezi napazya mwaha, ukuti vavagogajʼavantu ishigavo shoka paṿitatu.

¹⁶ Imbazyo ya valwavulugu avalimbilamfalasi vali amashumi namashumi. Nkiywa imbazyo yavo.

¹⁷ Havili mushitushizya shane nkenyʼimfalasi zila nava ve vazilimbiye, ve vali niṿizigashifuva vwe ṿwali fwe ngati mwoto, fwe ngati mavanda, havili fwe ngati mulembo wa ṿibiliti. Amatwe ga mfalasi gali fwe ngati matwe ga nsama. Namumalomu gavo muhafumaga umwoto nilyosi niṿibiliti.

¹⁸ Pʼavantu vahafwa ishigavo shoka paṿitatu kuntipo zitatu zinizi, ulwa mwoto nulwa lyosi nulwa ṿibiliti ṿwe ṿwafumile mumalomu gavo.

¹⁹ Shʼagenʼamaha ga mfalasi zinizi gali mumalomu namunsinda zyavo. Shʼinsinda zyavo zili fwe njoha zye zili namatwe. Zizyo nyene zye zikuvanangʼavantu.

²⁰ Ilelo pʼavantu ve vasyaye ve vatagozilwe kuntipo zinizi ve vahasitʼukupinduha nukuṿvileha vwe vaṿipezile ninyove zyavo, ṿahasitʼukuleha ukuputa kumpepʼimbivi nakumalungu ga sahabu naga feza naga ṿipondo naga mavwe naga makwi, ge gatakwenya, nga kwiṿwa, nga kujenda,

²¹ havili vahasitʼukupinduha kuvugozi ṿwavo nakuluvembu lwavo nakuvwiva ṿwavo.