Ishitushizya 7 - Tesitamenti Umupwa 1965

Ukulemezanya avantu 144,000

¹ Ilelo lwe zipitiliye zinizi, pe nkalola avahavizya vane vimiliye kuṿipembe ṿwe ṿine iṿwa nsi, valemilʼinkungu zye zine izya munsi, ukuti inkungu yitaṿugulaje pansi napasumbi napamakwi gonti.

² Havili nkalola uhavizya uwamwavo akuzuva kufuma kuvutukulo vwʼizuva, alemilʼishilemezanyo sha Mulungu umulanzi, ahavavilishila kwizwʼipiti avahavizya vane vala ve vapelilwe ukuyiyimṿwʼinsi nusumbi,

³ ahati: Kwe ndah ukuyiyimṿwʼinsi nusumbi namakwi, nkandʼisuti lwe twavalemezanya pasheni avanyamata va Mulungu witu.

⁴ Pe nkivwa imbazyo zya vala avalemezanye ukuti vah 144,000 ve vavisilwe ahalemezanyo munkolo zyonti izya vana-Yisilayili.

⁵ Muluho lwa Yuda vavisilwʼahalemezanyo 12,000. Muluho lwa Lubeni vavisilwʼahalemezanyo 12,000. Muluho lwa Gadi vavisilwʼahalemezanyo 12,000.

⁶ Muluho lwa Aseli vavisilwʼahalemezanyo 12,000. Muluho lwa Nafutali vavisilwʼahalemezanyo 12,000. Muluho lwa Manase vavisilwʼahalemezanyo 12,000.

⁷ Muluho lwa Simeyoni vavisilwʼahalemezanyo 12,000. Muluho lwa Levi vavisilwʼahalemezanyo 12,000. Muluho lwa Yisashali vavisilwʼahalemezanyo 12,000.

⁸ Muluho lwa Zabuloni vavisilwʼahalemezanyo 12,000. Muluho lwa Yosefu vavisilwʼahalemezanyo 12,000. Muluho lwa Benyamini vavisilwʼahalemezanyo 12,000.

Ishitushizya sha ve vaposilwe kumwanya

⁹ Ilelo lwe zipitiliye zinizi pe nkalola nimpugʼimpiti iya vantu ve numo atangavavazya ve vafumile munsi zyonti namunkolo zyonti namuvantu vonti namunjango zyonti, vimiliye ukulungamana nishitengo sha vumwene nukulungamana naHagonzi, vazwaye inkanzʼinzelu intali, valemile namanchinda munyove zyavo.

¹⁰ Vahavilishila izwʼipiti vahati: Uvuposhi vwe vwa we Mulungu witu wʼatendime pashitengo sha vumwene, havili vwa Hagonzi.

¹¹ Pʼavahavizya vonti ve valiviye ishitengo sha vumwene navasongo nivipuma ṿwe ṿine vahayitaga pansi kuṿweni ṿwavo kuminso ga shitengo sha vumwene, vahakupama pansi nukuputa kwa Mulungu,

¹² vahati: Amen, ulutimo nuvumwamu ninjele nulupi nulushindiho namaha ninguvu ṿwe ṿwa Mulungu witu shima ukufiha nakuvusitakusila nalumo lumo. Amen.

¹³ Pʼusongo woka ahambuzya ahati: Avene vonti ve vazwayʼinkanzʼinzelu intali ve vonu, havili vafumile kwi?

¹⁴ Ine nkamwamula nkati: Mwene, uzimanyile wenewe. Uwene ahambuzya ahati: Iva ve vuvo ve vafumile muvuhamantanilwa uvupiti vula vʼinkanzu zyavo vazihanzite nukuzizelufwa mumavanda ga Hagonzi.

¹⁵ Mwe mumwo shinishi valungamine nishitengo sha Mulungu, vakumuvombela umusanya nuvusiku mutempeli yakwe, nuno wʼatendime pashitengo sha vumwene aliyipelʼukuva lihema lyavo.

¹⁶ Avene vatalilumwʼinzala havili, vataliyumilwʼishinyoto havili, litalivoshʼizuva havili nga hasanyʼahanji nga honu.

¹⁷ ShʼaHagonzi he hali pahati pashitengo halivadimaga nukuvalongozya kuṿiduda vwa minzi amapelavulanzi. NuMulungu alivasyumula amansozi gonti kuminso gavo.