Ishitushizya 6 - Tesitamenti Umupwa 1965

Ukwigulwa kwa ṿilemezanyo

¹ Pe havili nkalola aHagonzi higuye ahalemezanyo hoka ha tula tusano natuvili, pe nkiṿwa shoka isha ṿipuma ṿiniṿi shikuyanga mwizwi lye likuguluma, shikuti: Nzagaga.

² Pe nkalola, yenya, imfalasi inzelu. Nawuyo wʼayilimbiye ali nuvuta, ahapelwʼishipambwi, ahavuha ukukonzyʼinsi, ahavalʼukupota.

³ Ilelo lwe higula ahalemezanyo ha vuvili, pe nkivwa ishipuma sha vuvili shikuyanga shikuti: Nzagaga.

⁴ Pʼimfalasi iyamwavo yihaloleha, yali che fwe ngati mwoto. Uwene wʼayilimbiye wʼapelilwe ukufwula uvwihalo munsi, ukuti avantu vagoganaje, apelilwe ishipangʼishipiti.

⁵ Ilelo lwe higula ahalemezanyo ha vutatu, pe nkivwa ishipuma sha vutatu shikuyanga shikuti: Nzagaga. Pe nkalola, yenya, imfalasi inyilu. Wʼayilimbiye ali nishilinjilo mumuhono wakwe.

⁶ Pe nkivwa izwi likufuma muṿipuma ṿila ṿwe ṿine, likuti: Ishivo shoka sha ngana kudinali yoka. Iṿwivo ṿitatu ṿwa vulezi kudinali yoka. Agenʼamavula namampensya gʼutaganangaje.

⁷ Ilelo lwe higula ahalemezanyo ha vune, nkiṿwa ishipuma sha vune shikuyanga shikuti: Nzagaga.

⁸ Pe nkalola, yenya, imfalasi imṿuku. Uwene wʼayilimbiye we Vufwe izina lyakwe, nuvuzimu vwalandatine nawo. Ve vapelilwe ishigavo shoka paṿine isha nsi, ukuti vagogajʼavantu kushipanga nakunzala nakumpungo nakuṿikoko ṿwa munsi.

⁹ Ilelo lwe higula ahalemezanyo ha vusano, pe kunsi kushifinjilo nkalola amapepo ga ve vavolilwe pazyʼizwi lya Mulungu napazya luhomeshezyo lwe vah nalwo.

¹⁰ Ve vahavilishila izwʼipiti vahati: Pasyaye vuli we Mukonzyayonti, we mufinjile, we wa nalyoli, shʼutakuvalonga nukuvalanduzya amavanda gitu vuvo ve vasamiye munsi?

¹¹ Pe vonti vahapelwa inkanzʼinzelu intali, unʼiyakwe unʼiyakwe, havili zihayangwa kuli vuvo ukuti vizyaje suti, isuti vamalilizyaje vafihaje vope navanyamata avamwavo, navamwavo ve vakwenyelezyʼukugogwa inza she vope vagozilwe.

¹² Pe nkalola ukuti higuye ahalemezanyo ha mutanda, pʼinsi yihayinga te kuyinga, nizuva lihilupa fwe ngati lifuko lya makaka uvwilu, numwezi wonti ahashemama fwe ngati mavanda,

¹³ ninzota zya kumwanya zihalagala pansi, zihahonzya fwe ngati makunyu gʼituvu ge gakugwa kunkungʼimpiti inga yikuliyinzya.

¹⁴ Lyope nivingo lihepa fwe ngati hapepala ha kalata lwʼumuntu akuhazinga, namagamba gonti ninsungo zyonti vihefelwa mumwo mwe ṿwali.

¹⁵ Havili navamwene va munsi navahombe avapiti navatwale va vulugu navadumbwe navamaha navazya vonti navasatushe vahazyihama muninga namumavwe ga mumagamba.

¹⁶ Vakugavuzya amagamba namavwe vakuti: Mutugwile, mutuzyishe kuminso gʼuno wʼatendime pashitengo sha vumwene nakuvuhalazu vwa Hagonzi.

¹⁷ She lyinzilʼisiku ipiti ilya vuhalazu vwavo. Wunanu wʼangasimpa?