Ishitushizya 5 - Tesitamenti Umupwa 1965

Ishitushizya sha Hagonzi ha Mulungu

¹ Nkalola Ukalata mumuhonʼumulilo wa wʼatendime pashitengo sha vumwene. Ukalatʼuno wʼasimṿilwe mwonti muhati nakundwila vovulo, we vawulemezinye nutulemezanyo tusano natuvili.

² Nkalola uhavizya wa maha akuvilishilʼizwʼipiti akuti: Unanu wʼahondeye ukukupula ukalatʼuno nukusatula utulemezanyo twakwe?

³ Pʼatalipo numo kumwanya napansi nakunsi pansi wʼamanyilʼukukupula ukalatʼuno nukwenya muhati.

⁴ Pe nkakuta nkani shʼatahaloleha nawumo uwa kukupula ukalatʼuno nga kwenya muhati.

⁵ Pʼusongo woka mwe vavaliye ahayanga kulʼine ahati: Utakutaje. Yenya, Nsama ya muluho lwa Yuda, we Lizi lya mwa Davidi, wʼavupositʼuvulugu, ukuti akupulaje ukalatʼuno nutulemezanyo twakwe twe tusano natuvili.

⁶ Pe nkalola pahati pashitengo sha vumwene napaṿipuma ṿwe ṿine napahati pavasongo aHagonzi himiliye pupo he hali fwe ngati havolilwe, he hali nimpembe zisano nazivili naminso gasano nagavili, ge zye mpepo zya Mulungu zisano nazivili, zyʼazitumile munsi yonti.

⁷ Pe hahinza, hahasendʼukalatʼuno ukufuma mumuhono umulilo wʼuno wʼatendime pashitengo sha vumwene.

⁸ Ilelo lwe haposheleyʼukalata pʼiṿipuma vwe ṿine navasongo vonti amashumi gavili navane vahayitaga pansi kuminso ga Hagonzi. Vonti valemile amapango unʼilyakwe unʼilyakwe, nimbiga zya sahabu zye zyizuye iṿwa kusushizya, ṿwe zye mputo zya vafinjile.

⁹ Vahimbʼulwimbʼulupwa vahati: Iwe uhondeyʼukuposhelʼukalata nukwigulʼutulemezanyo twakwe, she wavolilwe, umukaliyʼuMulungu namavanda gaho avantu va munkolo zyonti namunjango zyonti namuvantu vonti namunsi zyonti.

¹⁰ Uvapezilʼukuva vumwene nukuva vashiputo va Mulungu witu, ve valikonzya munsi fwe ngati ve vamwene.

¹¹ Pe nkalola, nkiṿwʼizwi lya vahavizyʼavinji ve valiviyʼishitengo nilya ṿipuma ṿila nilya vasongo vala. Uvwinji vwavo vali amashumi namashumi.

¹² Ve vahayanga izwʼipiti vahati: AHagonzi he havolilwe hahondeye ukuposhela amaha nuvudumbwe ninjele ninguvu nulushindiho nuvumwamu nulutimo.

¹³ Pʼiṿipelelwa ṿwonti iṿwa kumwanya niṿwa pansi niṿwa kunsi pansi niṿwa pasumbi ṿwonti naṿwonti ṿwe ṿili mumwo, nkiṿwa ṿikuyanga ṿikuti: Uno wʼatendime pashitengo sha vumwene naHagonzi wʼali nulutimo nulushindiho nuvumwamu ninguvu shima ukufiha nakuvusitakusila nalumo lumo.

¹⁴ Pʼiṿipuma ṿila ṿwe ṿine ṿihati: Amen. Vope navasongo vala vahayitaga pansi vahakupama muluputo.