Ishitushizya 4 - Tesitamenti Umupwa 1965

Ishitushizya sha kumzuanya

¹ Ilelo lwe zipitiliye zinizi, pe nkaga, yenya, ishilyango shigusile kumwanya, pʼizwi itanzi lila lye nkalyiṿwa lyali fwe ngati lisaji, lihati: Zuvagʼipa, nkulanje zye pakuti zikwinza pisinda.

² Pʼapashezi nkava mwa Mupepo. Pe nkagʼishitengo sha vumwene shili kumwanya, havili pashitengo woka atendime pupo.

³ Uwene wʼatendime pupo ahavoneha aholine nivwe lya yasipi nilya salidyoni. Havili nigombogombo lishilivizizyʼishitengo sha vumwene, lyali fwe ngati simalakiti.

⁴ Havili iṿitengo amashumi gavili naṿine ṿishiliviye ishitengo ishi sha vumwene. Havili paṿitengo ṿiniṿi vatendime avasongo amashumi gavili navane ve vazwaye iṿizwalo iṿizelu niṿipambwi ṿwa sahabu kumatwe.

⁵ Havili imesyo nukugulumʼimṿula numuligimbo ṿikufuma mwe mushitengo sha vumwene. Ninkozyo zya mwoto zisano nazivili zikwaha, zilungamine nishitengo sha vumwene. Zizyo zye mpepo zisano nazivili izya Mulungu.

⁶ Havili kwilongolela kushitengo sha vumwene kwali fwe ngati wusumbi wa magalasi, wʼaholine nivwe lya kilisitali. Napahati pashitengo sha vumwene namuluvazu mwonti ṿwali iṿipuma ṿine ṿwe ṿwali naminso mwonti mwonti kwitwe nakuṿinama.

⁷ Ishenʼishipuma ishitanzi shaholine ninsama, ishipuma sha vuvili shaholine ningida, ishipuma sha vutatu she kuminso shaholine numuntu, nishipuma sha vune shaholine nipula lye likwelela.

⁸ Havili iṿipuma vwe ṿine ṿiniṿi ṿwonti shoka shoka ṿwali niṿwapa umutanda vwe ṿwizuyʼaminso mumbazu zyonti namuhati vovulo. Ṿitakutuzya shamusanya nuvusiku lwe ṿikuti: Mufinjile, Mufinjile, Mufinjile uMwene uMulungu uMuhatamaha gonti, wʼalipo lulwo, wʼalipo nashinishi, we havili akwinza.

⁹ Ilelo shima lwʼiṿipuma iṿi ṿikumupʼuvumwamu nulushindiho nukumugwilʼulupi uno wʼatendime pashitengo sha vumwene, wʼalipo shima nakuvusitakusila nalumo lumo,

¹⁰ pʼavenʼavasongo amashumi gavili navane vakuyitaga kuminso ga wʼatendime pashitengo sha vumwene, vakumukupamilila wʼalipo shima nakuvusitakusila nalumo lumo, ṿwope niṿipambwi ṿwavo vakuyitaga pansi kwilongolela kushitengo sha vumwene, lwe vakuti:

¹¹ Uhondeyʼiwe we Mwene, we Mulungu witu, ukuposhela uvumwamu nulushindiho namaha, shʼiwe upezile vwonti, havili mulukasamo lwaho ṿwalipo, muli lulwo mwe ṿipezilwe.