Ishitushizya 3 - Tesitamenti Umupwa 1965

Ukalata wʼasimṿilwe kushivanza sha mu-Salidisi

¹ Uwenʼuhavizya wa shivanza sha mu-Salidisi wʼumusimbilaje utinji: Lyʼakuyangʼuno wʼali nimpepo zisano nazivili izya Mulungu ninzota zisano nazivili, akuti: Inzimanyilʼimbombo zyaho. Nashenga vakukutaha ukuti we mulanzi, ilelo we mufwe.

² Damulilaga, uzigomwaje zye zisyaye zye zikulungama kuvufwe. Shʼimbombo zyaho nazile zitalunjisile kuminso ga Mulungu wane.

³ Kumbuhaga lelo zyʼuziposheleye nukuzyivwa, zyʼuzisunjililaje, upinduhaje. Apene nyene ingʼutakudamulila pe ndikwinzila fwe mwiva, havili utamanyile ahavalilizyo he ndikwinzilʼiwe.

⁴ Nkandi uli nago mumwo mu-Salidisi amazina gamo ga vuvo ve vatahandaminye amenda gavo, ve vakujenda nane lwe vazwaye amendʼamazelu, she vahondeye.

⁵ Uno wengʼakupotʼuvulugu wʼalizwikwa iṿizwalʼiṿizelu, lyope nizina lyakwe ntalilisyusyutanya mwa kalata wa vulanzi, ndilitaha kuminso ga Tata nakuminso ga vahavizya vakwe.

⁶ Uno wengʼali namakutwi wʼatejelezyaje zyʼuMupepo akuṿivuzyʼiṿivanza.

Ukalata wʼasimṿilwe kushivanza sha mu-Filatelifiya

⁷ Uwenʼuhavizya wa shivanza sha mu-Filatelefiya wʼumusimbilaje utinji: LyʼakuyangʼuMufinjile, we wa nalyoli, wʼali nishigulilo sha Davidi wʼakwigula, havili numo atakwigalila, wʼakwigalila, havili numo atakwigula.

⁸ Inzimanyilʼimbombo zyaho. Yenya, nkupiye kuminso gaho ishilyango she shilʼukwazi, she numo atangashigalila. Ngamanyile amaha gaho ukuti mansi, imanyile ukuti ulisunjiliyʼizwi lyane, havili ukuti lyope nizina lyane utalihanile.

⁹ Yenya nkukupa vamo ava muluhomano lwa Setano ve vakuyitaha ukuti vaYuda lwe vate vaYuda avene, nkandi vakulumʼilenga. Yenya, ndivapelʼukuva vakwinzʼukukupama kuṿinama ṿwaho nukumanya ukuti ine nkukunzitʼiwe.

¹⁰ Shʼulisunjiliye izwi lyane ilya vuzyihamulaha mwe mumwo nine ndikusunjilila ukuti ahavalilizyo ha lulingo hatakwagaje he haliyinzila insi yonti, he halivalinga vonti ve vasamiye pansʼipa.

¹¹ Yenya ntakuhavʼukwinza. Uyumishizyaje lelo ukuva naho huho hʼuli naho, ukuti numo atahafwule ishipambwi shaho.

¹² Uno wengʼakupotʼuvulugu we ndimupelʼukuva lupanda mwa tempeli ya Mulungu wane, ilelo mwʼatalifuma nalumo kunzi. Ndimusimba pupo izina lya Mulungu wane nizina lya nkaya ya Mulungu wane, ilya Yelusalemu umupwa yʼikwiha ukufuma kumwanya kwa Mulungu wane, nkumusimba pupo nizina lyane ipwa.

¹³ Uno wengʼali namakutwi wʼatejelezyaje zyʼuMupepo akuṿivuzyʼiṿivanza.

Ukalata wʼasimyilwe kushivanza sha mu-Layodikeya

¹⁴ Uwenʼuhavizya wa shivanza sha mu-Layodikeya wʼumusimbilaje utinji: LyʼakuyangʼuAmen, uhome umutungamu uwa nalyoli, wʼiṿipelelwa ṿwa Mulungu ṿwonti ṿwanzite mumwakwe wuyo.

¹⁵ Nzimanyilʼimbombo zyaho, ukuti iwe te we muhatazu havili te we mupwu, zingalusyʼukuhondela ingʼukuva we muhatazu pamo we mupwu.

¹⁶ Nkandi shinishi she we mutushizu vwelele, te we muhatazu havili te we mupwu, pe ndikuswila ukufuma mwilomu lyane umu.

¹⁷ Shʼiwe ukuti: Ne dumbwe, ndonsile nkani, ntasovelilwe navimo. Nkandi utamanyile ukuti we muzwelusu numupelanahavwila numupina nuwantonko numuzwalusu.

¹⁸ Nkukusoha ukuti ukalaje usahabu kukwane wʼazelufile mushintengwi sha mwoto, niṿizwalo iṿizelu ukuti uzwalaje ukuti insoni zya nzwalo yaho zitalolehaje, nimpondanya iya kuyipaha muminso gaho ukuti uyenyaje.

¹⁹ Ine vonti venga mbakunzite ve nkuvamena amalandu gavo, nkuvasunda. Ukwo lelo uyikungule ukupinduha.

²⁰ Yenya nimiliye kushilyango, nkuhonyonsya kulwiji. Uno wengʼakwiṿwʼizwi lyane nukunigulila kushilyango we nkwinjila mumwakwe, we ndilya poka nawo, wope poka nane.

²¹ Uno wengʼakupotʼuvulugu we ndimupa apa kutendama nane pashitengo shane isha vumwene, inza she nane impositʼuvulugu havili inza she ntendime nuTata pashitengo shakwe isha vumwene.

²² Uno wengʼali namakutwi wʼatejelezyaje zyʼuMupepo akuṿivuzyʼiṿivanza.