Ishitushizya 22 - Tesitamenti Umupwa 1965

¹ Pʼahandangʼijenje lya minzi amapelavulanzi izelu fwe ngati livwe lya kilisitali, lye liduvusile kushitengo sha vumwene isha Mulungu nisha Hagonzi.

² Pahati yʼigulumo nijenje kuluvazu ulu nulwamwavo pe lyali ikwi ipelavulanzi lye likuhomʼinsangʼishumi nazivili, likuvuyizyʼukuhomʼinsanga amezi gonti. Agenʼamatundu gʼikwʼili gali ga kupozezya inkolo zya vantu.

³ Nahamʼahantu ahatipwa hataliva mumwo havili. Ishitengo sha vumwene isha Mulungu nisha Hagonzi shiliva munkaya yiyo. Avenʼavanyamata vakwe valimuvombela.

⁴ Valimwenya kuminso, valiva nizina lyakwe paṿweni ṿwavo.

⁵ Kutalivʼuvusiku havili, vataliyanzʼinyale nuluhozyo lwʼizuva, shʼalivahozezya wuyo we Mwene Mulungu, valiva ve vamwene shima nakuvusitakusila nalumo lumo.

Izya kumpelela

⁶ Pʼahambuzya ahati: Amazwi ganaga matungamu, ge ga nalyoli. UwenʼuMwene uMulungu umuhatampepo zya vakuvwi, wʼamutumilʼuhavizya wakwe ukuvalanganizyʼavanyamata vakwe zye kwe zyinze shisitakuhava.

⁷ Yenya nkwinza, ntalihava. Musangalusu uno wengʼakusajilʼamazwi ga vakuvwi aga kalata uno.

⁸ Nene ne Yohani ne niṿuye nukuzyenya zyonti zinizi. Ilelo lwe niṿwa nukwenya pe nkakupama pansi kuṿinama ṿwa havizya wʼandanganizizye zinizi, ukuti impute kukwakwe.

⁹ Uwenʼahambuzya ahati: Zye ndah utahashele. She nane ne munyamata wamwinyu poka nawe navamwinyu ve vali vakuvwi nave vakusajilʼamazwi ga kalatʼuno. Uputaje kwe kwa Mulungu.

¹⁰ Pʼahambuzya ahati: Amazwi ga vukuvwi aga kalatʼuno utahagalemezanye nishilemezanyo, shʼumwaha apalamiye.

¹¹ Umuleshe umuvombambivi avombaje suti imbivi, numuhandamanu avombaje suti izya vuhandamanu, numugolosu avombaje suti izya vugolosu, wope numufinjile ayonjezyaje ukuzelupa.

¹² Yenya nkwinza, ntalihava. Ṿwope niṿwa kuvalipila iṿwane ndi naṿwo, iṿwa kuvalipila avantu vonti, unʼiṿwakwe unʼiṿwakwe, mwʼivaliyʼimbombo yavo.

¹³ Nene ne Alifa, havili ne Omega; ne Mutanzi havili ne Wakumpelela nenene; ne Vwando havili ne Vumalilishilo.

¹⁴ Vasangalusu venga vakuhandʼiṿizwalo ṿwavo, ukuti vavanje namaha ga kulifishila ikwi ipelavulanzi naga kutuha paṿikwilo ukuti vinjile munkaya yiyo.

¹⁵ Kunzi kwe kuli imbwa navavwanga navamalaya navagogavantu navavombelamalungu, navonti ve valikunzitʼilenga nukulivombela.

¹⁶ Ne Yesu nʼimutumilʼuhavizya wane ukuvahomeshezyʼimwe zyonti zinizi zye zikuṿitahʼiṿivanza. Ine ne ne Lizi havili ne wa luho lwa Davidi, nene ne Namankungulu umuzelu.

¹⁷ Pe nawe Mupepo numuzinjilwa vahati: Nzagaga. Navonti ve vakwiṿwa vayangaje vatinji: Nzagaga. Wope nawengʼayumilwe ayinzaje, wengʼakasime asendajʼaminzi amapelavulanzi pavwila.

¹⁸ Vonti venga vakwiṿwʼamazwi ga vukuvwi aga kalata uno, ve nkuvahomeshezya nkuti: Uno wengʼakwonjezya ukuviha pupo hamo, wʼuMulungu alimwonjelezezya intipo zye zisimṿilwe mwa kalatʼuno.

¹⁹ Wope nawenga akwefwa hamo aha mwa kalata wa vukuvwi uno, wʼuMulungu aliyefwa ishigavo shakwe ishʼikwi lya vulanzi nisha nkayʼimfinjile, ṿwe ṿisimṿilwe mwa kalatʼuno.

²⁰ Umuhatakuzihomeshezya zinizi akuti: Ena, nkwinza ntalihava. Amen, nzagaga we Mwene Yesu.

²¹ Uvwila ṿwa Mwene uYesu vuvanje namwe mwenti. Amen.