Ishitushizya 21 - Tesitamenti Umupwa 1965

Kumwanya ukupwa ninsi impwa

¹ Pe nkalda insi ya kumwanya impwa mya pansi impwa. Shʼiya kumwanya intanzi mya pansi intanzi zipitiliye, wope nusumbi atalipo numo.

² Havili nkalola inkaya ṿila imfinjile uYelusalemu umupwa yikwiha kufuma kumwanya kwa Mulungu, yiyiyaninye fwe ngati muzinjilwa wʼakuvala kumulume.

³ Pe nkiṿwa izwʼipiti kufuma kushitengo shila isha vumwene likuti: Yenya, uvutendamo ṿwa Mulungu vuli poka navantu. Alitendama navo, valiva vantu vakwe, havili uwene aliva Mulungu wʼali navo.

⁴ Uwene alisyumula amansozi gonti kuminso gavo, kutalivʼuvufwe navumo, nukuswimililwa, nilosyo, nuvuvaṿi vutaliva navumo, shʼintanzi zyonti zyavalila nzila.

⁵ Pe wʼatendime pashitengo sha vumwene ahati: Yenya, nkuṿwandula ṿwonti, nkuṿipelʼuvupwa. Havili ahati: Simbaga ukuti amazwi gontʼiga matungamu, ga nalyoli.

⁶ Pʼahambuzya ahati: Mpela zivomṿilwe. Nene ne Alifa havili ne Omega, ne vwando nene havili ne vumalilishilo. Nene ne ndimungʼwesya aga mushiduda sha minzi amapelavulanzi wengʼayumilwe ishinyoto, ndimupa pavwila.

⁷ Uno wengʼakupota wʼalipwana zyonti zinizi, ilelo ine ndiva ne Mulungu wakwe, uwene aliva mwana wane.

⁸ Avene nyene avʼilyoga, nave vakusitʼukwitiha, nava vuhandamanu, navagozi navavembu navalozi, nave vakuputa kumalungʼaganji, navalumilenga vonti, ishigavo shavo shili mwa sumbi wa mwoto niṿibiliti, vwe vufwe ṿwa vuvili.

UYelusalemu wa kumwanya

⁹ Pe woka uwa vahavizya vak vasano navavili ve vali nimbiga zila zye zyizuye intipo zisano nazivili zila izya kumpelela, ahayanga kulʼine ahati: Nzagagʼipa, inkulanje umuzinjilwa, umushi wa Hagonzi.

¹⁰ Pʼahanyatula mumupepo, ahantwala pigambʼipiti itali. Ahandanga inkayʼimfinjile uYelusalemu, ye yihiha kufuma kumwanya kwa Mulungu,

¹¹ yali nuvumwamu ṿwa Mulungu, uvuzelu ṿwa luhozyo lwakwe ṿwali fwe ngati lwa havwe ahagomu nkani, fwe ngati lwa havwe uyasipi wʼakulangalila fwe livwe lya kilisitali;

¹² yali nilinga ipiti itali, lye lyali niṿikwilo ishumi naṿivili, paṿikwilo pali avahavizya ishumi navavili, namazina gasimṿilwe pupo, agene nyene ge gali ga nkolʼishumi nazivili izya vana-Yisilayili.

¹³ Kuvutukulo kwali iṿikwilo ṿitatu, kuluvazu lwa muhonʼumulilo iṿikwilo ṿitatu, kuluvazu lwa muhonʼumumongo iṿikwilo ṿitatu, havili kuvuswelo iṿikwilo ṿitatu.

¹⁴ Nilinga lya nkaya lyali ninyalo ishumi nazivili, pamwanya pazizyo gasimṿilwʼamazina ishumi nagavili aga vapositili ishumi navavili va Hagonzi.

¹⁵ Uwene nyene wʼahayangaga nane, ali nishilinjilo sha sahabu she shali fwe litete, ukuti ayipimaje inkaya niṿikwilo ṿwakwe inga nilinga lyakwe.

¹⁶ Inkaya yiyo yali niṿipembe ṿine ṿwe ṿilingine mwonti, yalingine mwitali namwibaba. Ahayipimʼinkaya nitete lyakwe, ahaga kuli intambwi 12,000. Yalingine mwitali, mwibaba, namwitali kumwanya.

¹⁷ Havili ahapima ilinga lyakwe, ahaga kuli amahono 144, kushipimo sha muntu, she shali sha havizya.

¹⁸ Agenʼamavwe ge vazenjeyʼilinga ge gali ga yasipi, iyenʼinkaya ye vazenjeyʼusahabu umusitakusanganya nutuntʼutunji, fwe ngati magalasi amazelu.

¹⁹ Inyalo zyʼilinga lya nkaya zye zya yemṿilwe nutuvwʼutugomu twonti. Ulwalʼulutanzi lwali lwa yasipi, ulwa vuvili lwali lwa sapili, ulwa vutatu lwali lwa kalikidoni, ulwa vune lwali lwa simalagiti,

²⁰ ulwa vusanu lwali lwa salidonisi, ulwa mutanda lwali lwa salidyoni, ulwa vusano navuvili lwali lwa chilisotoli, ulwa munana lwali lwa belili, ulwa vusano navune lwali lwa topasi, ulwʼishumi lwali lwa chilisopilasi, ulwʼishumi nalwoka lwali lwa hiyakinti, ulwʼishumi navuvili lwali lwa ametisiti.

²¹ Ivwenʼiṿikwilo ṿwonti ishumi naṿivili ṿwe ṿwali vwambo vutupu ṿwonti mwe ṿivaliye ṿwavomṿilwe kufuma muvwambo ishi uvwakwe ishi uvwakwe. Igulumo lya nkaya lye lyali lya sahabu umuzelu, wʼali fwe ngati magalasi ukulangalila.

²² Yope nitempeli ntayiwenyi nayimo mumwo. ShʼuMwenʼuMulungu uWamahagonti we wʼutempeli wakwe, inga naHagonzi.

²³ Izuva numwezi ṿitakwanzilwa munkaya yiyo shʼuvumwamu ṿwa Mulungu vukuyihozezya, naHagonzi he nyale yakwe.

²⁴ Ninkolo zyonti zilijenda muvuzelu ṿwakwe, vope navamwene va munsi valitwalʼuvumwamu ṿwavo muli yiyo.

²⁵ Iywenʼiṿikwilo ṿwakwe nyene ṿwe ṿitaliyigalilwa nalumo umusanya, she kutalivʼuvusiku navumo mumwo.

²⁶ Havili valitwalʼuvumwamu numushinzi wa nkolo zyonti muli yiyo.

²⁷ Muli yiyo hataliyinjila ahantu nahamo he halʼumwiho, nga muntu numo wengʼakuvomba izya vuhandamanu, nga mulumilenga, nkandi vuvo veka venga vasimṿilwe mwa kalata wa vulanzi uwa Hagonzi.