Ishitushizya 19 - Tesitamenti Umupwa 1965

Uvupoti kumwanya nuvusendelo ṿwa Hagonzi

¹ Lwe zyapitilila zinizi pe nkivwʼizwʼipiti fwe ngati lya mpuga ya vantʼavinji kumwanya, likuti: Haleluya, uvuposhi nuvumwamu namaha ṿwa we Mulungu witu,

² shʼuwenʼakulonga muvwanalyoli namuvugolosu, shʼamulonzilʼumalayʼumupiti wʼanangagʼinsi nuvumalaya vwakwe, gope namavanda ga vanyamata vakwe ge gali munyove zyakwe, gʼuMulungu amulanduzizye.

³ Nohavili vahati: Haleluya. Pʼilyosi lyakwe lihasuha ukufiha nakuvusitakusila nalumo lumo.

⁴ Pʼavasongo amashumi gavili navane vala nivipuma ṿwe ṿine, ve vahakupama ukuputa kwa Mulungu wʼatendime pashitengo sha vumwene, vahati: Amen, Haleluya.

⁵ Nizwi lihafuma kushitengo sha vumwene, lihati: MumutundumihajʼuMulungu witu, mwenti mwe mukumuvombela, namwe mukumunyila, mwe vansi namwe vapiti.

⁶ Pe havili nkiṿwʼizwi lye lyali fwe ngati lya vantu impugʼimpiti nilya minzi ga majenjʼaminji nilya lungʼanto lwa myula ulupiti, lihati: Haleluya, shʼuMwene uMulungu witu uMuhatamahagonti ayipezilʼukuva wʼumwene.

⁷ Tuseshelaje nukudovela, tumumwamihaje, she lyinzilʼisiku lya vusendelo ṿwa Hagonzi, wope numuzinjilwa wakwe ayiyaninye.

⁸ Apelilwe ukuzwalʼamendʼaminza amanyengʼenyezu amazelu. Shʼamenda aminza iga zye mbombʼingolosu zya vafinjile.

⁹ Uwenʼahambuzya ahati: Simbaga utinji: Vasangalusu ve visitwe ukulyʼiṿintu ṿwa pavusendelo ṿwa Hagonzi. Havili ahambuzya ahati: Iga ge mazwi ga nalyoli ga Mulungu.

¹⁰ Pʼine nkakupama kuvinama ṿwakwe ukuputa kukwakwe. Pʼahayanga kulʼine ahati: Zye ndah, utahashele. She nane ne munyamata wamwinyu poka nawe navamwinyu ve vali muvwahome ṿwa Yesu. Uputaje kwe kwa Mulungu. Shʼuvwahome ṿwa Yesu vwe mupepo wa vukuvwi.

UChilisiti wʼaposite akuseshela

¹¹ Pe nkalola kumwanya kwigusile, yenya yalipo imfalasi inzelu, nawʼayilimbiye izina lyakwe ali Mutungamu nuWanalyoli, we muvugolosu akulonga nukulwʼuvulugu.

¹² Aminso gakwe gali fwe ngati mwilo wa mwoto. Pkwe lyakwe azwayʼiṿipambwi iṿwinji, asimṿilwe pupo izina lye numo atalimanyile nkandi wuyo weka.

¹³ Azwayʼishizwalo she vatumpisile mumavanda nizina lyakwe lihatakwa ukuva Izwi lya Mulungu.

¹⁴ Impuga zya vulugu zyonti zye zili kumwanya zihamulandata mwisinda lwe zilimbiye pamfalasi inzelu, lwe vazwayʼamendʼaminza amazelu amasanza.

¹⁵ Mwilomu lyakwe mwali ishipangʼishihozu she shikufuma mumwo isha kudibilʼinkolo zya vantu. Uwene alivadima nindisa ya shijela, havili akuhanya munchelenje ya kufinyila amampensya ga mulaha wa vuhalazu ṿwa Mulungu uWamahagonti.

¹⁶ Pashizwalo shakwe napavukunjilo ṿwa shinama asimṿilwʼizina lye likuti: umwene wa VAMWENE NUMUPITI WA VAPITI.

Ukutupulwa kwa valugu vakwe

¹⁷ Pe nkalolʼuhavizya woka wʼayimiliye mwizuva, wʼahavilishila izwʼipiti ukuzivuzya inyunyi zyonti zye zikwelela mumwanya, ahati: Mwinzaje, muvungane paluhomano ulupiti lwa Mulungu ulwa ṿwa kulya,

¹⁸ ukuti mulyʼamavili ga vamwene, namavili ga vatwale va vulugu, namavili ga vamaha, namavili ga mfalasi naga vuvo ve vazilimbiye, namavili ga vasatushe naga vazya naga vansi naga vapiti vonti.

¹⁹ Pe nkalola ishintu shila navamwene va munsi nimpuga zyavo zya vulugu, vavungine ukulwʼuvulugu nawo wʼalimbiye pamfalasi havili navantu va mpuga yakwe.

²⁰ Pʼishintu shihalemwa poka numukuvwi wakwe uwʼilenga wʼahavapelelagʼamamfindango kaminso gakwe, ge muli gugo ahavahopaga vuvo ve vaposheleyʼuvusimbe ṿwa shintu shila nave vahaputaga kushiholanyo shakwe. Ve vavili vahatajilwa she valanzi mwa sumbi wa mwoto wʼakwaha nishibiliti.

²¹ Ve vasyaliliye ve vahafwa kushipanga shʼula wʼalimbiye pamfalasi she shikufuma mwilomu lyakwe. Ninyunyi zyonti zihikuta amavili gavo.