Ishitushizya 18 - Tesitamenti Umupwa 1965

Ukugwa kwa nkayʼimpiti

¹ Lwe zyapitilila zinizi pe nkamulolʼuhavizyʼuwamwavo akwiha kufuma kumwanya, ali namahʼamapiti, nuvumwamu ṿwakwe vuhayihozezyʼinsi.

² Ahavilishilʼizwʼipiti ahati: Aguye, aguyʼuBabeli, inkayʼimpiti, yʼiyipezilʼukuva vutendamo ṿwa mpepʼimbivi nilinga lya kuzyigalila mumwʼimpepʼinkandamanu zyonti nilinga lya nyunyi inkandamanu zyonti impatwe.

³ Shʼinkolo zyonti zingʼweleyʼipele lya vuhalazu ṿwa vumalaya ṿwakwe, navamwene va munsi vavembusile nawo, navahayitantanye va munsi vadumbukwilwe kwe kumaha ga ngosi yakwe.

⁴ Pe havili nkiṿwʼizwi ilyamwavo kufuma kumwanya, lihati: Fumaji mumwakwe mwe vantu vane, ukuti mutalilanaje nawo uvutalamalandu ṿwakwe, havili ukuti intipo zyakwe zitavagajʼimwe.

⁵ Shʼuvutalamalandu ṿwakwe uvwinji vufisile kumwanya nuMulungu akumbusile imbombo zyakwe zya vugombanu.

⁶ Mumugalushizyaje inza she wope avagalushizyagʼimwe, muvuyizyaje ukumugalushizya havili pambombo zyakwe. Ishikombe shʼahavenjelaga she muvuyizyaje ukumwenjela havili imwe.

⁷ Inza shʼahayipelelaga uvupiti muvulyaṿwonti ṿwe namwe mumupelelaje ulwizizyo muvuswimililwa. Shʼuwene mumwoyo wakwe akuti: Ntendime ipa, ne mwene, nte ne mufwile, havili ntaliswimililwa nalumo.

⁸ Mwe mumwo isiku limo intipo zyakwe zyonti zilimwinzila, nuvufwe nuvuswimililwa ninzala. Ilelo pʼalipwa mumwoto, shʼuMwenʼuMulungu wʼamulonzile ali namaha.

⁹ Pʼavamwene va munsi ve vahavembuhaga nukuluguha poka nawo valimukutilʼamansozi nukumulosezya ilosyo lwe vakwenyʼilyosi lyakwe lwʼakupwa.

¹⁰ Valitantamana apatali lwe vakwogopa amayimba gakwe, valiti: Ye mayi we, ye mayi we, we nkaya impiti, we Babeli, we nkaya ya maha, shʼukulongwa kwaho kwinzile kuhavalilizyo hoka vwelele.

¹¹ Navahayitantanye valimukutilʼamansozi nukumulosezyʼilosyo, shʼataliloleha numo uwa kukalʼinsavo zyavo,

¹² insavo zya sahabu nizya feza nizyʼamavwʼamagomu nizya vwambo nizya mendʼamazelu namafwavilizu namatikimizu namashemamu; namakwi gonti ge gakununkʼimfungo, nutuntu twe vavinzile utwa mpembe zya nzovu, nutuntu twe vavinzile utwa makwi amagomu nutwa ṿipondo iyizelu nutwa vijela nutwa mavwe amalimoli;

¹³ numudalasini, namafuta ga nsisi, nutuntu twe tukununkʼimfungo inyinza, nutuntu twa kusushizya, nimpondanya, nipele lya mampensya, namafuta ga nsumbu, nuvusu uvutinyu, ningana ningʼombe ningʼonzi nimfalasi namageleti namavili, namoyo ga vantu.

¹⁴ Zyope ninsanga zya makwi zyʼumwoyo waho asungwagʼukulya shima zitezile kukwaho. Twe twalangalilaga twonti natwe twayiyemṿwaga tutezile nzila, utalitwaga nalumo.

¹⁵ Avahayitantanye ve vakalaga zyonti zinizi, ve vadumbukwilwe muli wuyo, ve valitantamana apatali lwe vakwogopa amayimba gakwe, valikutʼamansozi nukulosyʼilosyo,

¹⁶ lwe vakuti: Ye mayi we, ye mayi we, we nkayʼimpiti, wʼuzwayʼamenda amazelu namafwavilizu namashemamu, we wayiyemṿwaga nusahabu nutuvwʼutugomu nuvwambo,

¹⁷ she kuhavalilizyo hoka vwelele uvudumbwe vwontʼuvu vupalankine. Avajenzyameli vonti numuntu wonti wengʼakujenda ponti mumeli navabahaliya vonti navavomṿi va mwa sumbi vonti vahatantamana apatali,

¹⁸ vahakuta nkani lwe vakwenyʼilyosi lwʼakupwʼuwene, vahati: Nkaya vuli ye yili fwe ye yino uvupiti?

¹⁹ Vahayinyampilʼulusuto pamatwe gavo, vahakuta lwe vakulosya nukuswimililwa, vahati: Ye mayi we, ye mayi we, we nkayʼimpiti, ye muvudumbwe ṿwakwe avahatameli mwa sumbi vonti vadumbukwilwe—she kuhavalilizyo hoka vwelele upalankine.

²⁰ Seshelaga muli wuyo we nsi ya kumwanya poka navafinjile navapositili navakuvwi, shʼuMulungu ayisunzite zyonti zye mwayilongagʼimwe.

²¹ Havili uhavizya woka uwa maha ahanyatulʼivwe lye lili fwe ngati lwalʼulupiti, ahalitajila mwa sumbi lwʼakuti: She valihonzya vovulo nuBabeli inkayʼimpiti, yilitajilwa pansi namaha, yitaliloleha havili.

²² Nizwi lya vahomamapango nilya vimbanyimbo nilya vahomamalonji nilya vahomamasaji ge gataliyiṿwiha nalumo mumwahʼumu.

²³ Nuvuzelu ṿwa nyak vutalilama havili mumwaho. Nizwi lya musendamwantanda nilya muzinjilwa gataliyivwiha havili mumwaho, shʼavahayitantanye vaho vali ve vapiti va munsi, shʼinyeleho zyaho zihavahopelezyaga avantu inkolo zyonti.

²⁴ Havili muli wuyo amavanda ga vakuvwi naga vafinjile gahaloleha naga vonti ve vavolilwe munsi.