Ishitushizya 17 - Tesitamenti Umupwa 1965

Ishitushizya sha mwantandʼumalaya nishintu

¹ Pe wokʼuwa vahavizya vasano navavili vala ve valemilʼimbiga zisano nazivili ahinza, ahayanga nane ahati: Nzaga, nkwe nkulanje ṿwʼakulongwa umwantanda umalaya ula umupiti watendime paminzʼaminji,

² wʼavamwene va munsi vavembusile nawo, we vonti ve vasamiye munsi vahozilwʼipele lya luvembu lwakwe.

³ Pʼahanyatula mwa mupepo ahambiha mulwugwa, mwe nkamulola umwantanda wʼatendime pashintu ishishemamu, she shizuye amazina ga musamu mumuvili wonti, shali namatwe gasano nagavili nimpembʼishumi.

⁴ Umwantandʼuno azwayʼiṿizwalo iṿifwavilizu niṿishemamu, ayiyemṿizye nusahabu nutuvwe utugomu nuvwambo, alemile ishikombe sha sahabu kunyove yakwe, shizuye zye zilʼumwiho zyonti nuvuhandamanu ṿwa luvembu lwakwe.

⁵ Izina lyasimṿilwe pasheni shakwe lye lyali lya vuzigizigi lye likuti: UBABELI UMUPITI, UNYINA WA VAMALAYA VONTI NAZYONTI ZYE zilʼumwiho munsi.

⁶ Pe nkalola umwantandʼula ahozilwe amavanda ga vafinjile namavanda ga vahome va Yesu. Lwe namulola nkasukumila ulusukumilʼulupiti.

⁷ Pʼuhavizya ahambuzya ahati: Ukusukumila shonu? Nkwe nkuvuzye izya vuzigizigi ṿwa mwantanda nuvwa shintu she shimunyatuye she shili namatwe gasano nagavili nimpembʼishumi.

⁸ Ishintu shila she washiwenyi shalipo, ishi shitalipo shilizuva ukufuma kushiliva sha kungolongo ukuvala kulunanjiho. Navantu vonti ve vasamiye munsi valisukumila, vʼamazina gavo gatasimṿilwe mwa kalata wa vulanzi ukufuma pala pʼulwalo lwa nsi luhavikwaga, valisukumila lwe vakulolʼishintu shila ukuti shalipo, havili ishi shitalipo, havili shiliva.

⁹ Ipa pe zili injele zya vumanyinsanyi! Amatwe gala gasano nagavili ge magamba gasano nagavili ge pali gugo umwantanda atendime.

¹⁰ Vope navamwene vali vasano navavili, vaguye vasano, wokʼalipo shinishi, uwamwavo ashilʼukwinza. Lwengʼayinza pe pakuti adilaje hansi vwelele.

¹¹ Shope nishintu shila she shalipo, she ishi shitalipo, we wa munana, uwene nyene we wa mpuga ya vasano navavili havili wʼakuvala kulunanjiho.

¹² Izyenʼimpembʼishumi zila zyʼuziwenyi ve vamwenʼishumi, ve vashilʼukuposhelʼuvumwene ṿwavo, nkandi vali namaha fwe ngati ve vamwene ge vagaposheleye poka nishintu kuhavalilizyo hoka.

¹³ Avene vanava vali numwoyo woka mwene uwa kushipʼishintu inguṿu zyavo namaha gavo.

¹⁴ Avene valilwʼuvulugu naHagonzi, ahenʼaHagonzi halivapota, shʼahene wʼuMwene wa vamwene, Muhatansi wa vahatansi, mva ve vali nawo ve vitwa, ve vasavulwa, ve vatungamu.

¹⁵ Havili ahambuzya ahati: Aminzi gala gʼugawenyi, gʼumwantandʼumalaya ula atendime pupo, ve vantu, nimpuga zya vantu, zye nkolo zya vantu, ninjango zya vantu mwe vavaliye.

¹⁶ Nimpembʼishumi zila zyʼuziwenyi nishintu shila, ve valimupata umalayʼuno, valimusansulanya nukumufwulʼamenda, valimulyʼumuvili wakwe, havili valimupemba mumwoto.

¹⁷ ShʼuMulungu avisile mumoyo gavo ukuti vavombaje zizyo zyʼalulumiye nukushipʼishintu uvumwene ṿwavo, ukufiha pupo pe zililunjiha zyʼayanzilʼuMulungu.

¹⁸ Numwantandʼula wʼumuwenyi ye nkayʼila impiti ye yikonzizye avamwene va munsi.