Ishitushizya 16 - Tesitamenti Umupwa 1965

¹ Pe nkiywa izwʼipiti kufuma mwa tempeli lihayanga navahavizya vasano navavili iva, lihati: Valaji mwite munsi uvuhalazu ṿwa Mulungu vwe vuli mumbiga izi zisano nazivili.

² Pʼumutanzi ahavalʼukwitʼiṿwa muluviga lwakwe pansi, pʼipumbʼivivi ilya lombwa lihavalemʼavantu vonti ve vali nuvusimbe ṿwa shintu nave vahaputaga kushiholanyo shakwe.

³ Nuwa vuvili ahitʼiṿwa muluviga lwakwe mwa sumbi, pe gahayipelʼukuva mavanda ge gali fwe ngati ga mufwe. Pʼiyintu ṿwonti iṿwa mwuyu vwe ṿwali mwa sumbi vihafwa.

⁴ Nuwa vutatu wope ahitʼiṿwa muluviga lwakwe mumajenje namuṿiduda ṿwa minzi, gonti gahayipelʼukuva mavanda.

⁵ Pe nkiywa uhavizya wa minzi akuti: We mugolosʼiwe, wʼulipo havili walipo, we Mufinjile, shʼujelelezizye ukulonga.

⁶ Shʼavene visitʼamavanda ga vafinjile naga vakuvwi, niwe uvapiye ge mavanda ukuti ge vangʼwelaje. Zye vahondeye zinizi.

⁷ Pe nkiywa ishifinjilo shikuti: Ena, we Mwene Mulungu, we Muhatamahagonti, iwe ukulonga muvwanalyoli namuvugolosu.

⁸ Nuwa vune ahitila iṿwa muluviga lwakwe pizuva; lye lihapelwa ukwoshʼavantu numwoto.

⁹ Pʼavantu vahapwʼuvupwe uvupiti. Pʼavene vahasamulʼizina lya Mulungu umuhatantipo zinizi, vahasita nukupinduha ukumushindiha uwene.

¹⁰ Nuwa vusano ahitila iṿwa muluviga lwakwe pashitengo sha vumwene isha shintu. Pʼishisi shihagwa munsi yakwe yonti, avantu vahalumanyʼimili zyavo she pahavavaga.

¹¹ VahamusamulʼuMulungu wa kumwanya she vahavavwaga havili vali nipumba. Nkandi vahasitʼukupinduha kumbombo zyavo.

¹² Nuwa mutanda ahitila iṿwa muluviga lwakwe mwijenjʼipiti ilya Yufulati. Pʼaminzi gahuma ukuti avayananizyajʼidala avamwene ve vakufuma kuvutukulo vwʼizuva.

¹³ Pe nkalola impepʼinkandamanu zitatu zikufuma mwilomu lya njoha impiti namulya shintu namwilomu lya mukuvwi wʼilenga, zyali fwe ngati ve vachula.

¹⁴ Shʼizi zye mpepʼimbivi impelamamfindango, zye zikuvala kuvamwene va munsi zyonti mwe vasamiyʼavantu, zikuvita kuvulugu ṿwa pisikʼipiti lila ilya Mulungu uWamahagonti.

¹⁵ Yenya, nkwinza fwe mwiva. Musangalusʼuno wengʼakudamulila, wʼakuzwalʼiṿizwalo ṿwakwʼahinza ukuti atajendaje ishitali, vatenyaje insoni zyakwe.

¹⁶ Zihavavunganiha pamo pʼavaHebuli vakuti pe pa Halimagedoni.

¹⁷ Nuwa vusano navuvili wope ahitʼiṿwa muluviga lwakwe mumwanya. Pʼizwʼipiti lihafuma mwa tempeli pashitengo sha vumwene, lihati: Mpela, zyinzile.

¹⁸ Pe kuhavʼimesyo zya myula numuligimbo ningʼanto nukuyinga kwa nsi ukupiti, kwe kutalolesile nalumo ukufuma pʼavantu vapezilwe munsi, kwali kuyinga kwa nsi ukupiti nkani.

¹⁹ Pʼinkayʼimpiti ṿila yihatapunkana iṿigavo ṿitatu. Inkaya zyonti izya vakunzi zihagwa. Wope nuBabeli umupiti ula ahakumbukwa kuminso ga Mulungu ukuti aposhelaje ishikombe shʼipele lya mulaha nuvuhalazu ṿwakwe.

²⁰ Pʼinsungo zya mwa sumbi zyonti zihashimbila, gope namagamba gahasita nukuloleha.

²¹ Nintalalʼimpiti yʼamavwe gakwe gali nuvumwamu fwe ngati ṿwa latili, gahalagala kufuma kumwanya nukuhomʼavantu. VahamusamulʼuMulungu kuzyʼisunde ili ilya ntalala, shʼisunde lilyo lyali lipiti nkani.