Ishitushizya 14 - Tesitamenti Umupwa 1965

Ishitushizya sha Hagonzi nave vaposilwe

¹ Havili nkalda, yenya, aHagonzi himiliye pigamba uZiyoni. Vimiliye avantu 144,000 poka naho, vʼizina lyakwe huho nizina lya Yise gasimṿilwe paṿweni ṿwavo.

² Pe nkiṿwʼizwi kumwanya, lye lyali fwe ngati lizwi lya minzi aminji, havili fwe ngati lizwi lya lujilimo ulupiti, havili izwi lye nalyiṿuye lyali fwe ngati lipango lyʼumuntu akuhoma.

³ Vakwimbʼulwimbo ulupwa kuminso ga shitengo sha vumwene nakuminso ga ṿipuma ṿwe ṿine naga vasongo. Numo atamanyilʼukusambilila ulwimbo lunulu nkandi vuvo veka ve vali 144,000, vala ve vatavuzilwe kunsi.

⁴ Ve vuvo ve vatayihandaminye nalumo muvantanda, she vali vasunde avene. Iva ve vuvo ve vakuhalandata aHagonzi kwonti kwe hakuvala, ve vuvo ve vatavuzilwe muvantu ukuti vavanje ṿwa kutomola iṿitanzi kwa Mulungu nakuHagonzi.

⁵ Havili mumalomu gavo shitahaloleha ishifumbo nashimo, she vasitamazota.

Ishitushizya sha vahavizya vatatu

⁶ Pe nkamulola uhavizyʼuwamwavo akuvuha pahati paya kumwanya, lwʼalemilʼIvangeli lya shimashima ukuvakumusizya vonti ve vasamiye pansi namunsi zyonti namunkolo zyonti namunjango zyonti nakuvantu vonti,

⁷ ahayangʼizwʼipiti ahati: MumunyilajʼuMulungu nukumushindiha, shʼahavalilizyo ha vulonzi ṿwakwe hafisile, muputaje kuli wuyo wʼapezile kumwanya napansi nusumbi niṿiduda ṿwa minzi ṿwonti.

⁸ Pʼuhavizya uwamwavo uwa vuvili ahalandata, ahati: Aguye, aguyʼuBabeli, inkayʼimpiti, she ye yavangʼwesyaga avantʼinkolo zyonti ipele lya vuhalazu ṿwa vumalaya ṿwakwe.

⁹ Nuhavizyʼuwamwavo uwa vutatu ahavalandata, ahayanga izwʼipiti ahati: Umuntu wonti wengʼakuputa kushihanu nishiholanyo shakwe, wengʼakuposhela nuvusimbe vwakwe pasheni nga pe pamuhono,

¹⁰ wope vwelele pe lwʼakungʼwelʼipele lya vuhalazu ṿwa Mulungu lye lyenzilwe shisitakusanganya naminzi mushikombe sha mulaha wakwe, wʼaliyimba nkani mumwoto nakuṿibiliti, kuminso ga vahavizya avafinjile naga Hagonzi.

¹¹ Lyope nilyosi lya mayimba gavo lilisuha shisitakusila nalumo. Vate napamo apa vutuzyo umusanya nuvusiku vuvo venga vakuputa kushihanu nakushiholanyo shakwe, nawonti wengʼakuposhela uvusimbe vwʼizina lyakwe.

¹² Ipa pe palʼuvuvindilamalema ṿwa vafinjile ve vakulandatʼindajizyo zya Mulungu nukumwitihʼuYesu.

¹³ Pe nkiṿwʼizwi ipiti kufuma kumwanya, likuti: Simbaga utinji: Vasangalusu avafwe ve vakufwila mwa Mwene ukufuma shinishi. Ena, akuyangʼuMupepo ukuti vatuzye lwʼamayimba gavo gasila; shʼimbombo zyavo zikulandatana navo.

Imṿuno nukuyisezyʼinsi

¹⁴ Pe nkenya, nkagʼivingo izelu; pivingo wumo atendime ali fwe ngati Mwana-wa-muntu, azwayʼishipambwi sha sahabu kwitwe, munyove alemilʼumufwu umuhozu.

¹⁵ Nuhavizyʼuwamwavo ahafuma mwa tempeli, ahamwitʼuwamwavo wʼatendime pivingo kwizwʼipiti, ahati: Tumagʼumufwu waho, uṿunaje shʼahavalilizyo ha mṿuno hafisile, shʼiṿiyavo ṿwa munsi ṿweleye nkani.

¹⁶ Pe wʼatendime pivingo ahatajilʼumufwu wakwe pansi, insi yihaṿunwa.

¹⁷ Nuhavizyʼuwamwavo ahafuma mwa tempeli ye yili kumwanya, wope vwelele ali numufwu umuhozu.

¹⁸ Nuhavizyʼuwamwavo ahafuma mushifinjilo, uwene nyene wʼali muhatamaha ga mwoto, ahamuvilishilʼuwamwavo wʼali numufwʼumuhozu kwizwʼipiti, ahati: Tumagʼumufwu wahʼumuhozu, udumulʼiṿihovwa ṿwʼimpensya lya munsi, shʼinsanga zyakwe zitonile nkani.

¹⁹ Pʼuhavizyʼula ahatagʼumufwu wakwe pansi, ahadumulʼiṿihovwa ṿwʼimpensya lya munsi, ahaṿitajila munchelenje ya kufinyila amampensya iya vuhalazu ṿwa Mulungu uvupiti.

²⁰ Ilelo amampensya gahafinywa munchelenje kunkaya kunzi, amavanda gahafuma kunchelenje, gahafiha kuṿijela ṿwa majego ga mfalasi kuntambwi 1,600.