Ishitushizya 13 - Tesitamenti Umupwa 1965

Ishitushizya sha shintu

¹ Pe nkalda ishintu shikufuma mwa sumbi, shali nimpembe ishumi namatwe gasano nagavili. Kumpembe shazwayʼiṿipambwi ishumi nakumatwe gakwe shali namazina ga musamu.

² Ishintu ishi she nashiwenyi shaholine ninzovwe. Iṿinama ṿwakwe ṿwali fwe ngati ṿwa nyimba. Ilomu lyakwe lyali fwe ngati lilomu lya nsama. Pʼinjoha isikisiki yihashipa inguvu zyakwe nishitengo shakwe isha vumwene namahʼaminji.

³ Itwe lyoka ilya shintu shinishi lyadiṿilwe fwe ngati kwe kuvufwe. Havili ishiṿwalalo shakwe isha vufwe shihapola. Ulusukumilo lwa nsi yonti luhashilandata ishintu shinishi.

⁴ Pe vahakupama nukuputa kunjoha isikisiki she yashipiye ishintu ishi amaha, havili vahakupama nukuputa kushintu shinishi, vahati: Unanu wʼali fwe ngati shintu shinishi, unanu wʼangalwa nashʼuvulugu?

⁵ Pe shihapelwʼilomu lya kuyanga izya mabado amapiti nizya musamu. Shihapelwa namaha aga kuvomba imbombo zyakwe zyonti kumezi amashumi gane nagavili.

⁶ Pe shihavusyʼilomu lyakwe ukumusamulʼuMulungu nukulisamulʼizina lyakwe nihema lyakwe vovulo, ve vuvo ve vasamiye kumwanya.

⁷ Shapelilwe ukulwa navafinjile nukuvapota, havili shapelilwe ukukonzya inkolo zyonti navantu vonti ninjango zyonti ninsi zyonti.

⁸ Vonti ve vasamiye munsi valikupama nukuputa kukwakwe, vʼamazina gavo ukufuma kwe kuvwando ṿwa nsi gatasimṿilwe mwa kalata wa vulanzi uwa Hagonzi he havolilwe.

⁹ Uno wengʼali namakutwi wʼatejelezyaje.

¹⁰ Uno wengʼakugoma avamwavo uvugomwa, we wope aligomwa vwe vugomwa. Uno wengʼakugoga avamwavo nishipanga, we wope aligogwa nishipanga. Panapa pe vulipo uvuṿindilamalema nulwitiho lwa vafinjile.

¹¹ Pe nkalola ishintu ishamwavo shikuzuva kufuma pansi. Shali nimpembe zivili zye zyali fwe ngati zya hagonzi, shikuyanga fwe ngati njoha isikisiki.

¹² Shihavomba namaha gonti zyʼishintu ishitanzi shila shazivomvile, shihazivomba kuminso gakwe. Shihayisinjilizyʼinsi navonti ve vasamiye mumwo ukuti vakupamaje nukuputa kushintu ishitanzi shila, shʼishiṿwalalo shakwe ishipelavufwe shihapola.

¹³ Pe shihapelʼamamfindango amapiti aga kulagazyʼumwoto ukuti afume kumwanya lwe vakwenyʼavantu.

¹⁴ Shihavatezya vonti ve vasamiye pansi namamfindango gakwe ge shapelilwe ukuti shigapelaje kuminso ga shintu, shihavavuzya ve vasamiye pansi ukuti vapelaje ishiholanyo sha shintu shila she shihaṿwalala kushipanga she havili shihalandila.

¹⁵ Havili shapelilwe ukushipʼishiholanyo sha shintu shila umwuyu, ukuti ishiholanyo shila isha shintu shiyangaje, havili ukuti shivapelelaje ukufwa vonti avasitakukupama nukuputa kushiholanyo sha shintu.

¹⁶ Vonti navansi navapiti, navadumbwe navapina, navasatushe navazya, shihahomelezya ukuti vavamatihaje ishimanyilo pamuhono wavo umulilo, pamo pasheni,

¹⁷ ukuti numo atakalaje nga kukazya wenga vatamumatisile ishimanyilo, nga lizina lya shintu nga mbazyo yʼizina lyakwe.

¹⁸ Injele zili panapa lelo. Wengʼali ninjele wʼayisinkamizyaje imbazyo ya shintu. Imbazyo yakwe yili 666.