Ishitushizya 11 - Tesitamenti Umupwa 1965

Avahome vavili

¹ Pe nkapelwʼitete lye lyaholine nindisa ya kulinjila, vahati: Vuhaga, ulingaje utempeli wa Mulungu nishifinjilo, navuvo ve vakuputa mumwo.

² Ulwenʼuluvungano lwa muluvazu mwa tempeli nyene lwʼululeshe shisitakululinga she lwe mbapiye avakunzi. Yope ninkayʼimfinjile valiyihanyanjila niṿinama ṿwavo kumezi amashumi gane nagavili.

³ Pe ndivapʼamaha avahome vane vavili, ve valikuvwa kumanda 1,260 lwe vazwayʼinkusʼinyezya.

⁴ Iva ve mavula gavili gala, zye nyale zivili zila zye zyimiliye kuminso ga Mwene umuhatansi yonti.

⁵ Apene inga wumo akwanzʼukuvananga pʼumwoto akufuma mumalomu gavo, akuvalya nukuvamalʼavalugu vavo. Wengʼakwanza ukuvananga we pakuti agogwaje inza she vovulo.

⁶ Avantu iva vali namaha aga kwigalila kumwanya shima ukuti imṿula yitatonyaje mumanda ga vukuvwi ṿwavo. Havili imbapiyʼamaha aga kugalulʼamajenje ukuva mavanda naga kuyihomʼinsi nintipo zyonti shima lwenga vakasime vuvo.

⁷ Apene nyene lwenga vamalilizya uvwahome ṿwavo, pʼishintu she shikuzuva kufuma kungolongo shililwa navo uvulugu, shilivapota nukuvagoga.

⁸ Agenʼamavimba gavo ge galivanga mumagulumo ga nkayʼimpiti ye mumupepo vakuti mwe mu-Sodomu namw-Egipiti, mwe vamuhomeleye nawe Mwene wavo pashihovenkanyo.

⁹ Ilelo pʼavantu inkolo ninjango ninsi valigenyʼamaṿimba gavo kumanda gatatu ninusu, valivalesya venga vakwanza ukugasyila mumbipa.

¹⁰ Ilelo pe vonti ve vazenzile pansʼipa valiseshela pazyavo, validova, valitumilana niṿwa kupelana, shʼavakuvwi ve vavili vanava vavayimṿwaga ve vazenzile pansi.

¹¹ Ilelo lwe gashilinkine amanda gatatu ninusu pʼumwuyu wa vulanzi ahafuma kwa Mulungu, ahinjila muli vuvo. Pe vahavuha vahimilila niṿinama ṿwavo. Ilelo pʼishitetemwi ishipiti shihavagwila vuvo ve vahavenyaga.

¹² Pe nkiṿwʼizwi ipiti kufuma kumwanya lihavavuzya lihati: Muzuvajʼipa. Pe vahazuva kumwanya mwivingo, navalugu vavo vahavenya.

¹³ Ilelo pahavalilizyo huho insi yihayinga te kuyinga, ninkaya yihamongonkana ishigavo shoka pishumi. Mukuyinga kwa nsi kunuku vahafwʼavantu namazina gavo 7,000. Avamwavo vonti ve vasyaye ishitetemwi shihavagwila nkani. Ilelo pe vahamumwamihʼuMulungu uwa kumwanya.

¹⁴ Izya kuti “Ye mayi we” izya vuvili zipitiliye. Yenya, izya kuti “Ye mayi we” zya vutatu zikwinza luvilo luvilo.

Isaji lya vusano na vuvili

¹⁵ Wope nuhavizya wa vusano navuvili ahahomʼisaji. Pʼamazwi amapiti gahapongomoha kumwanya, gahati: Uvumwene ṿwa munsi yonti vuyipezilʼukuva ṿwa Mwene witu nuvwa Chilisiti wakwe. Aliva wʼuMwene wuyo shima ukufiha nakuvusitakusila nalumo lumo.

¹⁶ Pʼavasongo amashumi gavili navane vala ve valungamine nuMulungu lwe vatendime paṿitengo ṿwavo, ve vahayitaga pansi vahakupama nukuputa kwa Mulungu,

¹⁷ vahati: Tukukusalifwa we Mwene Mulungu uWamahagonti, wʼulipo shinishi, we walipo nalulwo, shʼusenzite amaha gaho amapiti, havili uyipezilʼukuva we mwene.

¹⁸ Inkolo zyasambusile ukuvitwa, nuvuhalazu vwaho vuhinza. Numwaha wa kulongʼavafwe wuhinza, uwa kuvapʼamalipilo avanyamata vaho avakuvwi navafinjile, nave vakulinyilʼizina lyaho, navansi navapiti, nuwa kutupula ve vakunangʼinsi.

¹⁹ Pʼitempeli ya Mulungu ye yili kumwanya yihiguha, pe nkalola insandiko ya lwitinkano lwakwe mutempeli yakwe. Pe kuhava imesyo numuligimbo ningʼanto nukuyinga kwa nsi nintalala inyinji.