Ishitushizya 10 - Tesitamenti Umupwa 1965

Uhavizya wa maha nahakalata ahansi

¹ Havili nkalola uhavizya uwamwavo akwiha ukufuma kumwanya, agwinkinʼivingo, pitwe azwayʼigombogombo. Isheni shakwe shali fwe ngati lizuva. Niṿinama ṿwakwe ṿwali fwe ngati mpanda zya mwoto.

² Kunyove yakwe ali nahakalata ahakupule. Ishinama shakwe ishililo ahahanya pasumbi, isha kumumongo ahahanya pansi.

³ Pʼahavilishila izwʼipiti inza shʼinsama yikuvuna. Ilelo lwʼakuvilishila, pʼinjilimo zye zisano nazivili zyope zihangʼanta izwi lyavo.

⁴ Ilelo lwʼinjilimo zye zisano nazivili zinizi zikungʼanta, pʼine nayisenginye ukusimba. Pe nkiṿwʼizwi kufuma kumwanya, likuti: Uzilemezanye nahalemezanyo zyʼinjilimo zisano nazivili izi ziyanzile, utazisimbaje zyenezyo.

⁵ Pʼuhavizya we namuwenyi ayimiliye pasumbi napansi wʼahavusyʼumuhono wakwe umulilo, ahasonta kumwanya.

⁶ Ahalapila muli wuyo umulanzi shima nakuvusitakusila nalumo lumo, wʼapezile iya kumwanya naṿwe ṿili mumwo niya pansi naṿwe ṿili mumwo nusumbi naṿwe ṿili mumwo, ukuti pataliva ahavalilizyo ahamwavo he hasyaye,

⁷ nkandi mumanda gʼizwi lya havizya wa vusano navuvili, lwʼayinza ahomʼisaji lyakwe, pe zililunjiha izya vuzigizigi ṿwa Mulungu, inza shʼahavakumusizya avanyamata vakwe navakuvwi munongwʼinyinza.

⁸ Nizwi tila lye lyafumile kumwanya lwe likuyanga havili kulʼine, pe lihati: Valaga, usendʼahakalata ahakupule hala hʼuhavizya ula wʼayimiliye pasumbi napansi ahalemile munyove.

⁹ Pe nkavala kwa havizya nkamuvuzya ukuti ampanje ahakalata. Pʼahambuzya ahati: Ale, ulye heneho. Muhati mwe hakukuvava, nkandi mwilomu lyaho mwe hakunona fwe ngati vwushi.

¹⁰ Pe nkaposhela ahakalata hala munyove zya havizya, nkahalya honti. Mwilomu lyane mwe hahanona fwe ngati vwushi, nkandi lwe nalya heneho pe muhati muhavava.

¹¹ Pe vahambuzya vahati: Pe pakuti uvuyizyaje ukuvakuvwa avantu ninsi ninjango navamwene ve vinji.