2 Peteli 2 - Tesitamenti Umupwa 1965

Avakuvwi vʼilenga nulujendʼuluvivi

¹ Muvantu nyene mwe vah navakuvwi avilenga, inza she namumwinyu muliva navasambilizi avilenga. Ve muvushevu valiyinjizya uvuṿwalanganu uvupelakutupulwa, havili valiyihana kwa Mwene wʼavakazile. Valiyipalilʼuvutupulwa vwe vutalihavʼukuvaga.

² Navinji valilandata uvuluṿu vwavo, ve nidala lya vwanalyoli lilitonwa amatona pe pazyavo.

³ Mumpapilo valivasheṿwʼimwe ninongwʼinyata izya kulonchela mumwo ṿimʼavene. Vʼukulongwa kwavo kufuma he hali kutakuhava, nuvutupulwa vwavo vutakusupila.

⁴ She vope navahavizya ve vatazilʼamalandu uMulungu atavapepelezizye ndali, ahavabunchilizya kungolongo muninga zya shisi ukuti mwe vavanje ukufiha kuvulonzi.

⁵ Yope ninsi inkali ila uwene atayipepeiezizye pala pʼamulesile uNwaka, vuvo ve vali umunana poka nawuyo, wʼakumusizyʼuvugolosu, pala pʼayisitʼihava munsi ya vasitakunyilʼuMulungu.

⁶ Zyope ninkaya iya mu-Sodomu mya mu-Gomola azipemyile numwoto nukuziloṿwa nzila, ukuti zivanje zya kwenyelezya mumwo vonti venga valisitʼukumunyilʼuMulungu.

⁷ Nkandi ahamupona uLoti umugolosu, wʼulujendo lwa vasitakupela nakumo muvulugusu vwa luvembu luhamutamwaga nkani.

⁸ Shʼimbombo zyavo insitankomelezyo zihavuyizyʼamanda gonti ukwizizyʼumwoyo wakwe umugolosu shʼahazyenyaga nukuzyiṿvwa zyonti wuyo wʼali mugolosu.

⁹ ShʼuMulungu amanyile ukuvapoha mululingo vuvo ve vakumunyila, nkandʼavenʼavasitavugolosu vʼamanyile ukuvasunda nukuvaviha suti ukufiha pisiku lya kulongwa.

¹⁰ Avene uyene ve vakulandata izya muvili wavo wa mbivi mumpapilo izya kuyihandamiha, vʼakupitilizyʼukuvasunda, nava ve vakupupusyʼavapiti, ve vakusinga, vakuvomba zye vakasime vuvo. Havili shisitakutetema vakuvuliga uvupiti ṿwonti,

¹¹ nashengʼavahavizya ve vavalusizyʼukugomʼamaha vatakuvaliga nga kuvalonjelela kuminso ga Mwene.

¹² Avenʼavantu vanava nyene vali fwe ṿihanu iṿisitanjele, iṿipelelwa ṿwe ṿikupapwa ukuti ṿilemwaje nukugogwa. Vakusamula nazye vatazimanyile, valinanjiha mulunanjiho lwavo.

¹³ Valiposhela amalipilo ga vusitavugolosu vwavo. Avene vakusiva uvuluṿu vwavo uvwa musanya ukuti vwe vwa kuseshela mumwo. Avene mipamizu, mizota vwelele, vakuyiseshelezya muzya vuluṿu vwavo lwe vakulilana namwe palwizyo ululusyʼuvupiti.

¹⁴ Muminso gavo vizuye lwe luvembu, ge gatakwikutʼuvutalamalandu, ve vantu ve vakuvasipa ve vashilʼukugoma mumoyo. Amoyo gavo gavelezinye mumpapilo zyonti, ve vana va ntipo.

¹⁵ Valesilʼidala lye ligolosile, vatezile, valandite idala lya Bilyamu umwana wa Beyoli, wʼahasungwaga amalipilo ga vugombanu,

¹⁶ we zihamumena zyʼashizile munkomelezyo, shʼinyatulamaligo yʼilʼishinunu yihayangʼizwi lya muntu ukumugalusyʼumukuvwi wʼapuṿilʼinjele.

¹⁷ Avene ve ṿiduda ṿwe ṿite naminzi, ve mavingo ge gakuyugumbana mwonti mwonti kunkungu. Ve vuvo ve vasengulilwe ishisi sha shimashima.

¹⁸ Vakuyangʼamazwi amadudusu ge gali vwelele, vakuvahopela mumpapilo zya muvili wa mbivi namuvuluṿu avantu ve vanzitʼukuyilema kuli vuvo ve vakujenda muvutezyi.

¹⁹ Vakuti tukuvapʼuvutavushe, nashengʼavene vazya va lunanjiho. She huho henga hakuposite we muntu he hakupezilʼukuva we muzya wakwe.

²⁰ Shʼinga vashimbiyʼuvupamizu vwa munsʼumu, she vamumanyinsinye uMwene uYesu Chilisiti uMuposhi, inga vakuvuyizya ukuyipinzya mumwo, pe kuli vuvo izya mwisinda zinizi zilusizye uvuvivi nakuntanzi zila.

²¹ She zyamile zivanje nyinza inga vatamanyile idala lya vugolosu, nkandi shinishi nashenga valimanyile vazigunjiye inkomelezyo imfinjile zye valajizilwe.

²² Mwe mumwo lelo zivazile nalyoli zye tukuyanga mumivi tukuti: Imbwa yigalusile kumatapisi gakwe, havili: Inguluve yʼufumile nayo ukuyozya yikuyigalagasya muntoto nohavili.