1 Timoti 1 - Tesitamenti Umupwa 1965

Umulamu ninsoshe kuzya nsambilizyo zyʼilenga

¹ UPavuli umwapositili wa Chilisiti Yesu mululajizyo lwa Mulungu umuposhi witu nuChilisiti Yesu we lusuvilo lwitu,

² nakusimbila we Timoti we mwana wane mulwitiho, nkuti: Uvwila nulupepelezyo nuvwihalo uvufuma kwa Mulungu uTata nuChilisiti Yesu uMwene witu vuvanje nawe.

³ Udilaje mw-Efeso inza she nakulajizizye lwe nkavalaga mu-Makedoniya, ukuti uvalesyajʼavantu vala vamo vatasambilizyajʼizinji.

⁴ Vatenyaje utulumbe namazina ga nkolo mwe galandatine amasitavusilo, shʼagene gakupelʼimbuzilizyo inyinji shisitakulusyʼukusimpa mumiho ga Mulungu ge gali mulwitiho.

⁵ Izyenʼindajizyo zye zikunjilinkane mushikunzi ishifuma mumwoyo umuzelu namunyenyezyʼinyinza namulwitiho ulusitamafuji.

⁶ She vamo vapagusile muṿiniṿi, vahapindushila kumazwi ga shaha,

⁷ lwe vakwanzʼukuva vasambilizyankomelezyo, nashenga vatazyaginye zye vakuziyanga nukuzisimishizya.

⁸ Nkandʼiswe tuzimanyilʼinkomelezyo ukuti nyinza ingʼumuntu akuzilandata mumwo mwe zivaliye,

⁹ ingʼazimanyilʼinkomelezyo ukuti te zya mugolosu nkandi zya vasitankomelezyo navasitakusajila, zya vasitakunyilʼuMulungu avatalamalandu, zya vasitavufinjile navapopo, zya vagogavayise navagogavanyina, zya vagogavantu,

¹⁰ zya vavembu, havili zya ve vakuvembuha navanaṿuli vamwavo, zya vakazyavantu, zya valumilenga, zya ve vakulapʼizyʼilenga, havili zya zyontʼizinji zye zikulasana ninsambilizyʼindanzi,

¹¹ zye zili mwIvangeli lya vumwamu vwa Mulungu umusangalusu, lye mpelilwe munyove ine.

Ulusalifwo lwa Pavuli kuzya vwila vwa Mulungu

¹² Nkugwʼulupi kwa Chilisiti Yesu uMwene witu wʼampiyʼamaha, shʼambwenyi uvutungamu lwʼahambiha mumbombo,

¹³ nashenga lulwo nkavombagʼizya musamu, nali ne wa kuyimṿwʼavantu nukuvasyonoloha. Nkandi shinishi mpepelezilwe she zinizi nkazivombaga shisitakuzimanya nashisitalwitiho.

¹⁴ She vuhalafuha nkani uvwenʼuvwila vwa Mwene witu poka nulwitiho nishikunzi she shili mwa Chilisiti Yesu.

¹⁵ Litungamu izwi linili, lihondeye ukuposhelwa, lye likuti uChilisiti Yesu ayinzile munsʼumu ukupohʼavatalamalandu, ve njipezilʼukuva ne ululusyi wavo vonti.

¹⁶ Zye zizyo ahampepelezya ukuti mulʼine ne wa kwanda uYesu Chilisiti alolesyʼulupepelezyo lwakwe lwonti, imbe ne shimanyilo kuli ve valimwitiha pisinda ukuti tuvwagaje uvulanzi vwa shimashima.

¹⁷ UMwene nyene wʼalipo shima, umusitakufwa nalumo, umusitakuloleha muminso, uMulungu wʼali woka mwene, avanje nulushindiho nulutimo shimashima shisitakusila. Amen.

¹⁸ Nkukupʼululajizyʼulu munyove zyaho, we mwana wane Timoti, ukulandata muvukuvwi vwe vwatalisilʼukukutaha, ukuti muli zinizi ulwanje uvulugu vula ahinza,

¹⁹ lwʼuli nulwitiho ninyenyezyʼinyinza zye vamo vahazitaga, pʼuvwato vwavo —nkutaha ulwitiho— vuhajenda nukubazuha.

²⁰ Muli vanava valipo uHemenayi nuAlekizanda, vʼimupiyʼuSetano ukuti vasundwaje vatahasufwe.