1 Peteli 1 - Tesitamenti Umupwa 1965

Umulamu

¹ UPeteli umwapositili wa Yesu Chilisiti, kuvasavulwa avashintizi ve vasavaliye mu-Ponti namu-Galatiya namu-Kapadokiya namw-Asiya namu-Bitiniya,

² inza shʼuMulungu uTata atalisile nzila ukuvamanya, muvufinjile vwʼuMupepo avapeleye, ukuti musajile nukusansilwa amavanda ga Yesu Chilisiti: Uvwila vuve namwe nuvwihalo vuṿule mumwinyu.

Ulusalifwo kulutungamilo lwa vupokwa vwa vachilisiti

³ AshindikwajʼuMulungu uYise wa Mwene witu uYesu Chilisiti, we muvwila vwakwe uvupiti ahatupapa iswe muvupwa ukuti tuve nulusuvilo ululanzi, azipezile zinizi muvuzyuha vwa Yesu Chilisiti kuvafwe;

⁴ havili ukuti tupwanʼuvupwano uvusitakuvola, uvusitamazota nuvusitakufwoha, vwʼavavishiyʼimwe kumwanya,

⁵ imwe mwʼulwitiho lwinyu lukuvasunjilila mumaha ga Mulungu ukuti muhafishe muvupokwa vwe vuyananizilwe nzila ukugwinkulwa mumanda ga kumpelela.

⁶ Zye museshelajʼimwe, mwe suti shinishi mukusungama mundingo zyonti mwe zivaliye,

⁷ ukuti ulwitiho lwinyu lulusyʼuvugomu nawe sahabu wʼatakuhavʼukulala, nashengʼakulingwa mumwoto, havili lupelaje ulutiniho nuvumwamu nulushindiho lwʼaligwinkulilwa uYesu Chilisiti.

⁸ We mumukunzite nashenga mutamuwenyi, we mumwitisile nashenga mutakumwenya nashinishi, mukuseshela mumwakwe uluseshelo ulusitakutakwa lwe luli nuvumwamu;

⁹ lwe mukuposhela nzila iṿwa kumpelela ṿwa lwitiho lwinyu, ṿwe vupokwa vwa moyo.

¹⁰ Izya vupokwa vunuvu zye vahazyanzaga nkanʼavakuvwi nukuvuṿulila, vala ve vakuvwilwe izya vwila vwe vwali vwa kuvagʼimwe.

¹¹ Vahavuzilizyaga ukuti mwaha vuli havili ali vuli wʼuMupepo wa Chilisiti wʼali muhati zyavo ahawuvila, uwene wʼakuvwilwe amayimba ge gahamwinzilʼuChilisiti nuvumwamu vwe vuhalandata mwisinda.

Umwata wa lujendo lwa muchilisiti

¹² Ve kuli vuvo zihagwinkulwa zye zikuti vatahayivombela vuvo ndali nkandi mwenemwe muli zizyo, zye shinishi zivizilwe kulʼimwe muli vuvo ve vavavuzizyʼimwe Ivangeli muMupepʼuMufinjile wʼatumilwe ukufuma kumwanya, zyʼavahavizya vakusungwa ukuzyinanjizya.

¹³ Mwe mumwo mufungajʼamalamba mumasana ga nsivo zyinyu, muteshelʼiṿintu. Ulusuvilo lwinyu lwonti mulusontelezyaje nzila kwe kuvwila vwe vukuvinzila lwʼaligwinkulilwʼuYesu Chilisiti.

¹⁴ Inza shʼavana va lusajilo mutayiholanyaje nimpapilo zyinyu zye muhapapilaga lulwo muvusitavumanyinsanyi,

¹⁵ nkandi inza she mufinjile wʼavisitʼimwe, namwe muyipelajʼukuva mwe vafinjile mulujendo lwinyu lwonti,

¹⁶ she lisimṿilwe lye likuti: Muliva mwe vafinjile, shʼine ne mufinjile.

¹⁷ Shʼinga mukumutaha ilya Tata uwene wʼakumulongʼumuntu wonti woka woka ukulandata mumbombo zyakwe shisitakuvenya muvwinzʼavantu, pʼamaha ga vushintizi vwinyu mujendele mulutetemo.

¹⁸ She mumanyile ukuti mutahombolilwe nutuntu twe tukunanjiha inza shʼufeza nusahabu ukuti muleshe ulujendo lwinyu ulwa shaha lwe muluposheleye kuvaso,

¹⁹ nkandi nage ma vanda amagomu aga Chilisiti ge gali fwe ngau ga hagonzi ahasitaṿilema nahasitamazota.

²⁰ Uwene asavulilwe nzila lwʼinsʼino yishili ukwalwa, nkandʼahaloleha kumaha ga kumpelela pe pazyinyu.

²¹ Imwe muli wuyo mumwitisilʼuMulungu wʼamuzyusizye kuvafwe, wʼamupiye nuvumwamu, ukuti ulwitiho lwinyu nulusuvilo lwenyezye kwe kwa Mulungu.

²² Ilelo she muzelufizyʼamoyo ginyu mulusajilo lwa vwanalyoli ukuti mukundanʼishikunzi ishisitamafuji isha vanamuntu, mwe mumwo lelo mukundane numwoyo wonti shisitakutozoha.

²³ She mupafilwe uvupwa, te mwe mumbeyu yʼikuvola ndali, nkandi mumbeyu insitakuvola, mwe mwizwi lya Mulungu ilanzi lye likuva shimashima.

²⁴ She: Vontʼavantu vali fwe lisole, nuvumwamu vwavo vwonti vuli fwe vwezya vwʼisole. Isole lyumile nuvwezya vulagaye.

²⁵ Izwi lya Mwene nyene lye likuva shimashima. Ili lye lizwi lye vavavuzizyʼimwe mwIvangeli.