ꓟ˗ꓘꓳ ꓕꓰ˗ꓷ 3 - ꓟ˗ꓘꓳ ꓕꓰ˗ꓷ 1932

ꓫꓲꓱ˗ꓠꓲ˗ꓪ ꓠꓷ ꓠꓖꓴ ꓟꓸ˗ꓟ

¹ ꓬꓰ꓿ꓢꓴ ꓡꓰ ꓚꓵ ꓦꓰ˗⅄ꓲ ꓡꓳ ꓐꓴ ꓘꓭꓹ ꓡꓽ ꓓꓷ ꓒꓴ ꓑꓴꓽ ꓒꓲ ꓖꓱ ꓫꓲ ꓓꓷ ꓗꓴ ꓠ⅄ꓵ ꓬꓯ。

² ꓫꓲ ꓓꓷ ꓦꓱ ꓐꓰ ꓬꓰ꓿ꓢꓴ ꓕꓷ ꓫꓲꓱ ꓠꓲ˗ꓪ ꓡꓳ ꓟꓸ˗ꓟ ꓐꓷ ꓠꓴꓹ ꓟꓱ ꓐꓷ ꓝꓭꓹ ꓠ˗ꓠꓽ ꓐꓰ ꓕꓰ ꓡꓵ ꓢꓲꓯꓹ ꓠꓴ˗ꓟꓰ ꓗꓳ ꓬꓰ꓿ꓢꓴ ꓔꓳ ꓚꓲ˗ꓗꓪ ꓠꓯ˗ꓴ ꓟꓰ ꓪ。

³ ꓬꓰ꓿ꓢꓴ ꓠꓷ ꓡꓽ ꓓꓷ ꓒꓴ ꓑꓴꓽ ꓖꓱ ꓕꓷ ꓗꓴ ꓔꓳ ꓫꓱ ꓟꓰꓹ ꓖꓱ ꓔꓷ ꓡꓴ ꓡꓵ ꓖꓴ ꓕꓰ ꓫꓵ ꓬꓲ。

⁴ ꓡꓰ ꓚꓵ ꓕꓷ˗ꓠꓖꓷ ꓔꓳ ꓟꓲ˗ꓓꓳ ꓢꓰꓹ ꓫꓱ ꓟꓰꓹ ꓫꓲꓱ˗ꓠꓲ˗ꓪ ꓗ˗ꓐꓰ ꓘꓪ˗ꓐꓰꓹ ꓫꓲ ꓚꓵ ꓫꓲ ꓢꓵ ꓣꓰ ꓕꓷ ꓕ ꓟꓰ ꓪ ꓡꓰꓹ ꓕꓷ˗ꓠꓖꓷ ꓓꓷ ꓦꓱ ꓐꓰ ꓘꓳ ꓟꓱ ꓕꓴ ꓢꓲꓯ。

⁵ ꓬꓰ꓿ꓢꓴ ꓟꓲꓱ ꓕꓰ˗ꓗꓳꓽ ꓬꓱꓹ ꓭ˗ꓷ˗ꓐꓰ ꓕꓷ˗ꓠꓖꓷ ꓡꓵꓹ ꓕꓷ˗ꓠꓖꓷ ꓖꓱ ꓠꓴ˗ꓟꓰ ꓠ⅄ꓵ ꓕꓷ ꓜꓭ˗ꓜꓷꓹ ꓕꓷ ꓢꓰ ꓕꓷ ꓔꓳ ꓫꓱ ꓟꓰꓹ ꓡꓽ ꓗꓯ ꓛꓴ ꓡꓴꓹ ꓕꓷ ꓡꓽ ꓗꓯ ꓓꓷ ꓛꓴ ꓠꓷꓹ ꓡꓰ ꓗ ꓒꓲ ꓢꓲꓯ。

⁶ ꓧ˗ꓡꓲ˗ꓢꓯ ꓖꓱ ꓫꓲ ꓟꓴ˗ꓔꓵ ꓦꓷ ꓢꓰꓹ ꓫꓲ꓿ꓡꓵ ꓓꓷ ꓦꓪ ꓗꓳ˗ꓠꓖꓷ ꓠꓷꓹ ꓢꓰ ꓐꓰ ꓢꓷ ꓬꓰ꓿ꓢꓷ ꓢꓵ ꓜꓯ ꓕ ꓫꓱꓸ ꓠꓜꓴ˗ꓠꓖꓪꓱ ꓬꓯ。

ꓛꓱꓸ˗ꓞꓴ ꓔꓯꓸ ꓟꓰ ꓡꓰ ꓗ

⁷ ꓬꓰ꓿ꓢꓴ ꓕꓷ ꓕꓴ˗ꓔꓲ ꓗꓳ˗ꓠꓖꓷ ꓟꓯ˗ꓔꓴ ꓑꓴ ꓦꓭ˗ꓘꓴ ꓕꓴ ꓦꓷꓹ ꓣꓰ ꓔ ꓖꓱ ꓫꓲ ꓓꓷ ꓑꓰ ꓚ˗ꓡꓲ˗ꓡꓲ ꓠꓷ ꓕꓷ ꓠꓖꓴ ꓛꓷ˗ꓛꓷ ꓞꓷ ꓟꓰ ꓠ⅄ꓵ。

⁸ ꓡꓰ ꓚꓵ ꓡ ꓣꓰ ꓔ ꓫꓲ ꓓꓷ ꓑꓰ ꓕꓷ ꓠꓷ ꓐꓰ ꓖꓱ ꓫꓶ˗ꓓꓷ ꓓꓷ ꓘꓳ˗ꓟꓲ ꓟꓯ ꓠꓷ ꓟꓰꓹ ꓬꓴ˗ꓕꓯꓸ ꓬꓰ˗ꓡꓴ˗ꓢ˗ꓡꓰꓹ ꓬꓲ˗ꓕꓴ˗ꓟꓯꓸ ꓬꓳ˗ꓔꓯ˗ꓦꓳ ꓖꓱ ꓐꓵ ⅄ꓵꓹ ꓕꓪꓰ˗ꓡꓳꓹ ꓢꓲ˗ꓔꓪꓰ ꓖꓱ ꓡꓴ ꓐꓱ ꓐꓰꓹ ꓕꓷ ꓖꓱ ꓕꓳ˗ꓡꓳ ꓕꓴ ꓞꓷ ꓬꓯ。

⁹ ꓕꓷ ꓫꓲ ꓐꓷ ꓝꓷ ꓖꓷ ꓠꓷꓹ ꓕꓴ˗ꓔꓲ ꓗꓳ˗ꓔꓳ ꓬꓰꓹ ꓡꓷ˗ꓣꓳ ꓓꓷ ꓡꓷ ꓡꓶ ꓑꓴ ꓬꓱ ꓕꓰ ꓦꓴ ꓚꓶꓹ ꓫꓲ ꓠꓷ ꓠꓶꓸ˗ꓠꓶ ꓚꓶ ꓟꓱ ꓐꓷ ꓟꓰ ꓪ。

¹⁰ ꓕꓷ ꓠꓷ ꓣꓰ ꓔ ꓖꓱ ꓫꓲ ꓟꓸ˗ꓟ ꓗ ꓒꓲ ꓝꓷ ꓖꓷ ꓠꓷꓹ ꓠꓖꓴ ⅄ꓵ ꓟꓰ ꓕꓷꓹ ꓕꓷ ꓔꓳ ꓘꓪꓱꓸ˗ꓘꓪꓱ ꓐꓷ ꓝꓭꓹ ꓓꓷ ꓦꓱ ꓐꓰ ꓠꓶꓸ˗ꓠꓶ ꓑꓴ ꓗꓯ ꓞꓷ ꓬꓯ。

¹¹ ꓛꓱꓸ˗ꓞꓴ ꓠꓷ ꓢꓰ ꓖꓱ ꓓꓷ ꓘ ꓕꓷ ꓓꓳ ꓟꓱ ꓗꓪ ꓕꓷ ꓗꓯ ꓕꓰ ꓞꓴ ꓬꓱꓹ ꓡꓶ˗ꓡꓶꓽ ꓢꓰ ꓫꓱ ꓟꓰꓹ ꓥꓴ ꓠꓴꓸ ꓦꓰ ꓖꓱ ꓣꓳ ꓪ。

¹² ꓬꓰ꓿ꓢꓴ ꓕꓷ˗ꓠꓖꓷ ꓔꓳ ꓡꓰ ꓠꓲ ꓡꓰ ꓔꓳ ꓑꓰ ꓗꓳ˗ꓔꓳ ꓟꓰꓹ ꓕꓷ ꓟꓴ˗ꓔꓵ ꓚꓵ ꓫꓶ˗ꓫꓶ ꓟꓱ ꓚꓶ ꓬꓯ。

ꓬꓰ꓿ꓢꓴ ꓠꓷ ꓕꓴ˗ꓔꓲ ꓫꓴ˗ꓫꓴ

¹³ ꓬꓰ꓿ꓢꓴ ꓠ⅄ꓵ ꓗꓴ ꓛꓪ ꓡꓰ ꓘꓭꓸ ꓕꓷ ꓴ ꓠꓜꓷ ꓐꓰꓹ ꓢꓰ ꓓꓷ ꓗꓴ ꓡꓶ ꓟꓰꓹ ꓢꓰ ꓓꓷ ꓗꓴ ꓗꓯ ꓕꓴ ꓞꓷ ꓬꓯ。

¹⁴ ꓕꓷ ꓠꓷ ꓫꓲ ꓞꓰ ꓠꓲ ꓗꓴ ꓕꓰ ꓘꓭ ꓬꓱꓹ ꓕꓷ˗ꓠꓖꓷ ꓐꓴ ꓞꓷ ꓠꓲ ꓴ ꓘꓷ ꓕꓰ ꓫꓵ ꓚꓶꓹ ꓡꓰ ꓚꓵ ꓖꓱ ꓦꓰ ꓘꓳ ꓟꓴ˗ꓔꓵ ꓫꓱ ꓚꓶ ꓠꓯ ꓴ ꓬꓯ。

¹⁵ ꓕꓷ ꓢꓰ ꓟꓰ ꓞꓴ ꓠꓓꓵ ꓖꓱ ꓗ˗ꓔꓭ ꓕꓷ˗ꓠꓖꓷ ꓬꓱ。

¹⁶ ꓛꓷ ꓞꓰ˗ꓠꓲ ꓗꓴ ꓠꓴꓸ ꓢꓲ꓿ꓟꓰ ꓫꓱ ꓖꓱ ꓓꓷ ꓗꓴ ꓠ⅄ꓵꓹ ꓬꓰ꓿ꓢꓴ ꓠꓷ ꓡꓰ ꓚꓵ ꓑꓲ꓿ꓔꓰ ꓫꓱ ꓓꓷ ꓟꓲꓽ ꓬꓱ ꓟꓰ ꓪ。

¹⁷ ꓡꓰ ꓚꓵ ꓢꓲ꓿ꓑꓲ꓿ꓕꓯ ꓣꓳ ꓬꓮ꓿ꓗꓳꓹ ꓠꓱ ꓖꓱ ꓬꓮ꓿ꓗꓳ ꓖꓱ ꓖꓷ˗ꓣꓷ ꓬꓳ꓿ꓦ ꓡꓰ ꓚꓵ ꓛꓷ ꓠꓲ ꓗꓴ ꓡꓹ ꓑꓯ꓿ꓠꓲ꓿ꓛꓲ ꓫꓱ ꓖꓱ ꓓꓷ ꓟꓲꓽ ꓬꓱ ꓟꓰ ꓪꓹ ꓛꓷ ꓠꓴꓸ ꓟꓷ˗ꓠꓖꓴ˗ꓣꓳꓹ ꓫꓱ ꓠꓲꓸ˗ꓠꓲ ꓪ。

¹⁸ ꓡꓰ ꓚꓵ ꓡ ꓯ꓿ꓔꓰ꓿ꓡꓰꓹ ꓧꓰ꓿ꓡꓲꓹ ꓑ꓿ꓔꓳ꓿ꓡꓳ꓿ꓟꓯꓹ ꓟ꓿ꓕꓯꓹ ꓔꓳ꓿ꓟꓹ ꓬ꓿ꓡꓰ꓿ꓧꓰ ꓖꓱ ꓣꓳ ꓬ꓿ꓗꓳꓹ ꓠꓱ ꓖꓱ ꓔ꓿ꓕꓯꓹ ꓠꓱ ꓖꓱ ꓚ˗ꓠ˗ꓠꓲ ꓖꓱ ꓫꓲ ꓢꓲ꓿ꓟꓰ。

¹⁹ ꓡꓰ ꓚꓵ ꓬꓰ꓿ꓢꓴ ꓛꓲ ꓖꓱ ꓚ˗ꓡꓳ ꓖꓱ ꓫꓲ ꓬꓴ꓿ꓔ。

ꓗꓷ˗ꓚꓷ ꓔꓴ˗ꓔꓴ

²⁰ ꓬꓰ꓿ꓢꓴ ⅄ꓲ ꓓꓷ ⅄ꓲ ꓡꓳ ꓐꓴ ꓘꓭ ꓢꓰꓹ ꓫꓲ ꓓꓷ ꓦꓱ ꓐꓰ ꓗꓯ ꓡꓰ ꓮ ꓞꓷꓹ ꓦ ꓓꓷ ꓗꓯ ꓠꓜꓷ ꓟꓱ ꓜꓯ ꓔꓳ ꓕꓴ ꓢꓲꓯ。

²¹ ꓬꓰ꓿ꓢꓴ ꓖꓱ ꓴ˗ꓫꓲ˗ꓴ ꓠꓷ ꓘꓳ˗ꓟꓲ ꓟꓯ ꓒꓲꓹ ꓟꓴ˗ꓔꓵ ꓞꓷ ꓬꓱꓹ ꓕꓷ ꓔꓯ˗ꓔꓯ ꓞꓷꓹ ꓕꓷ˗ꓠꓖꓷ ꓠꓷ ꓕꓷ ꓠꓴ ꓒꓲ ꓢꓲꓯꓹ ꓫꓱ ꓝꓷ ꓖꓷ ꓪ。

²² ꓬꓰ˗ꓡꓴ˗ꓢ˗ꓡꓰ ꓠꓷ ꓟꓴ ꓣ ꓡꓰ ꓞꓷ ꓖꓱꓹ ꓕꓰ˗ꓷ˗ꓢꓳ˗ꓫꓲ ꓠꓷ ꓫꓱ ꓟꓰꓹ ꓕꓷ ꓠꓴ ꓑꓰ꓿ꓢꓲ꓿ꓒꓴ ꓠꓷ ꓔꓯꓸ ꓟꓯ ꓟꓰ ꓪꓹ ꓡꓰ ꓚꓵ ꓫꓱ ꓟꓰ ꓞꓴ˗ꓘ ꓔꓳ ꓕꓰ ꓕꓳ ꓬꓱꓹ ꓞꓴ ꓠꓓꓵ ꓠꓷ ꓟꓰ ꓪ。

²³ ꓬꓰ꓿ꓢꓴ ꓠꓷ ꓕꓷ˗ꓠꓖꓷ ꓡꓶ ꓑꓴ ꓞꓷ ꓢꓰꓹ ꓡꓶꓸ˗ꓡꓶ ꓐꓰ ꓕꓷ˗ꓠꓖꓷ ꓔꓳ ꓫꓱ ꓟꓰꓹ ꓞꓴ ꓠꓷ ꓢꓰ ꓐꓰ ꓞꓴ ꓠꓓꓵ ꓗꓴ ꓐꓷ ꓡꓴ。

²⁴ ꓓꓷ ꓓꓵ ꓠꓷ ꓴ˗ꓔꓴ˗ꓴ ꓠꓙꓪ˗ꓠꓙꓪ ꓡꓭ ꓢꓰꓹ ꓕꓷ ꓓꓵ ꓑꓲꓱ ꓜꓯ ꓟꓱ ꓕ ꓢꓰ。

²⁵ ꓓꓷ ⅄ꓲ ꓠꓷ ꓴ˗ꓔꓴ˗ꓴ ꓠꓙꓪ˗ꓠꓙꓪ ꓢꓰꓸ ꓕꓓ ⅄ꓲ ꓑꓲꓱ ꓟꓱ ꓕ ꓢꓰ。

²⁶ ꓞꓴ ꓠꓷ ꓴ˗ꓔꓴ˗ꓴ ꓢꓵ˗ꓢꓵ ꓡꓸ˗ꓡ ꓡꓭ ꓢꓰꓹ ꓕꓷ ꓫꓵꓸ ꓜꓯ ꓟꓱ ꓕ ꓢꓰꓹ ꓡꓰ ꓔꓳ ꓑꓰ ꓢꓰ ꓝꓳ ꓪ。

²⁷ ꓫꓲ ꓦꓳ ꓫꓭ ꓟꓰ ꓗꓳꓽ ꓐꓴ ꓐꓷ ꓬꓱꓹ ꓕ ꓖꓱ ꓖꓴ˗ꓜꓰ ꓜꓶ ꓡꓳ ꓕ ꓖꓱ ꓫꓲ ꓟꓱ ꓠ⅄ꓵꓹ ꓮ ꓞꓰ ꓗꓴ ꓠꓷ ꓫꓲ ꓦꓳ ꓫꓭ ꓕꓷꓹ ꓕꓰ ꓝꓷ ꓢꓷ ꓕ ꓖꓱ ꓬ˗ꓗꓳ ꓜꓶ ꓜꓯ ꓕ ꓟꓳ。

ꓦꓰ꓿ꓠꓙꓶ ꓔꓳ ꓛꓱ˗ꓛꓱ ꓫꓱ

²⁸ ꓥꓱ ꓔꓴ ꓠꓯ ꓐꓰ ꓠꓷ˗ꓠꓖꓷ ꓔꓳ ꓫꓱꓹ ꓓꓵ ꓡꓳ ꓫꓲ ꓖꓱ ꓛꓷ ꓠꓓꓶ ꓟꓰ ꓠꓱ ꓖꓱ ꓕꓷ˗ꓠꓖꓷ ꓠꓷ ꓚꓱꓸ˗ꓚꓱ ꓛꓷ ꓫꓱ ꓟꓰꓹ ꓓꓷ ꓦꓱ ꓐꓰ ꓣꓴ ꓜꓯ ꓕ。

²⁹ ꓦꓰ꓿ꓠꓙꓶ ꓔꓳ ꓠ⅄ꓲ˗ꓠꓓꓴ ꓟꓰ ꓡꓭ ꓢꓰꓹ ꓦ ꓫꓶ ꓐꓰ ꓣꓴ ꓜꓯ ꓟꓱ ꓕꓹ ꓦ ꓫꓶ ꓖꓱ ꓠꓓꓶ ꓟꓐꓴ ꓚꓶ ꓝꓳ ꓪ。

³⁰ ꓗꓷ˗ꓚꓷ ꓛꓷ ꓣꓴ ꓛꓷ ꓕꓷ˗ꓠꓖꓷ ꓠꓷ ꓛꓱꓸ˗ꓞꓴ ꓠꓷ ꓔꓯꓸ ꓒꓲ ꓫꓱ ꓝꓷ ꓖꓷ ꓪ。

ꓠꓖꓷ˗ꓟꓰ ꓢꓰ ꓴ˗ꓫꓲ˗ꓴ ꓪ

³¹ ꓕꓷ ꓘ ꓬꓰ꓿ꓢꓴ ꓖꓱ ꓮ˗ꓟꓰ ꓠꓱ ꓖꓱ ꓖꓷ˗ꓣꓷ ꓕꓷꓹ ꓟꓴ˗ꓔꓵ ꓕꓰ ꓫꓵ ꓬꓱꓹ ꓫꓲ ꓠꓷ ꓕꓷ ꓡꓶꓽ ꓦꓷ ꓚꓶ ꓬꓯ。

³² ꓣꓰ ꓔ ꓖꓱ ꓫꓲ ꓓꓷ ꓑꓰ ꓬꓰ꓿ꓢꓴ ꓣꓲ˗ꓡꓲ ꓗꓪꓱ ꓕꓰ ꓠꓜꓴ ꓢꓲꓯꓹ ꓕꓷ˗ꓠꓖꓷ ꓠꓷ ꓕꓷ ꓔꓳ ꓫꓱ ꓟꓰꓹ ꓡꓵ ꓡꓰꓹ ꓥꓴ ꓖꓱ ꓮ˗ꓟꓰ ꓠꓱ ꓖꓱ ꓥꓴ ꓖꓱ ꓮ˗ꓐꓴꓹ ꓖꓷ˗ꓣꓷ ꓟꓴ˗ꓔꓵ ꓚꓵ ꓠꓷ ꓥꓴ ꓫꓴ ꓠꓰ ꓬꓯ。

³³ ꓬꓰ꓿ꓢꓴ ꓠꓷ ꓡꓰ ꓫꓱ ꓟꓰꓹ ꓮ ꓠꓰ ꓕꓷ ꓥꓱ ꓖꓱ ꓮ˗ꓟꓰꓹ ꓮ ꓠꓰ ꓥꓱ ꓖꓱ ꓮ˗ꓐꓴꓹ ꓖꓷ˗ꓣꓷ ꓫꓱ。

³⁴ ꓣꓲ˗ꓡꓲ ꓗꓪꓱ ꓕꓰ ꓠꓜꓴ ꓖꓱ ꓫꓲ ꓕꓷ ꓡꓽ ꓕꓰ ꓡꓵ ꓢꓰꓹ ꓫꓱ ꓟꓰꓹ ꓡꓵ ꓡꓰꓹ ꓥꓱ ꓖꓱ ꓮ˗ꓟꓰꓹ ꓥꓱ ꓖꓱ ꓮ˗ꓐꓴꓹ ꓖꓷ˗ꓣꓷ。

³⁵ ꓦꓰ ꓖꓱ ꓢꓴ˗ꓠꓓꓴ ꓠꓖꓴ ꓛꓵ ꓐꓰꓹ ꓐꓰ ꓠꓷ ꓖꓱ ꓫꓲ ꓡꓭ ꓢꓰꓹ ꓥꓱ ꓖꓱ ꓮ˗ꓐꓴꓹ ꓖꓷ˗ꓣꓷ ꓟꓰꓸ˗ꓟꓰꓹ ꓖꓴ˗ꓟꓰ ꓠꓱ ꓖꓱ ꓮ ꓟꓰ ꓪ ꓢꓰ。