ꓟ˗ꓘꓳ ꓕꓰ˗ꓷ 13 - ꓟ˗ꓘꓳ ꓕꓰ˗ꓷ 1932

ꓟꓯ ꓫꓶ ꓗꓯ ꓠꓷ ꓫꓱ

¹ ꓬꓰ꓿ꓢꓴ ꓦꓰ˗⅄ꓲ ꓡꓳ ꓠꓷ ꓟꓴ˗ꓔꓵ ꓕꓴ ꓞꓷ ꓕꓷ ꓘꓹ ꓕꓴ˗ꓔꓲ ꓓꓷ ꓖꓴ ꓠꓷ ꓕꓷ ꓔꓳ ꓫꓱ ꓟꓰꓹ ꓢꓴ˗ꓜꓴꓹ ꓡꓵ ꓗ ꓟꓳꓹ ꓛꓷ ꓮ ꓝꓷ ꓢꓵ ꓖꓱ ꓡꓴ˗ꓑꓹ ꓮ ꓝꓷ ꓢꓵ ꓟꓰ ꓖꓱ ⅄ꓲ˗ꓓꓯ ꓡꓰ。

² ꓬꓰ꓿ꓢꓴ ꓠꓷ ꓕꓷ ꓔꓳ ꓫꓱ ꓟꓰꓹ ꓠꓷ ꓛꓷ ꓓꓱ ꓖꓱ ꓦꓰ˗⅄ꓲ ꓓꓳ ꓬꓱ ꓖꓱꓹ ꓟꓯ ꓠꓲ ꓛꓷ ꓡꓳ ꓡꓴ˗ꓑ ꓓꓷ ꓒꓰꓹ ꓡꓴ ꓚꓲꓶ ꓕꓰ ꓝꓯ ꓠꓷꓹ ꓟꓱ ꓒꓲꓱ˗ꓒꓲꓱ ꓟꓰꓹ ꓟꓱ ⅄ꓵ ꓢꓰ。

³ ꓬꓰ꓿ꓢꓴ ꓕꓷ ꓗꓯ˗ꓡꓯ ꓠ⅄ꓵ ꓗꓴ ꓠꓷꓹ ꓦꓰ˗⅄ꓲ ꓚꓵ ꓡꓵ ꓐꓰ ꓕꓰ ꓠꓜꓴ ꓢꓲꓯꓹ ꓑꓲ꓿ꓔꓰꓹ ꓬ꓿ꓗꓳꓹ ꓬꓳ꓿ꓦ ꓠꓱ ꓖꓱ ꓮ꓿ꓔꓰ꓿ꓡꓰ ꓠ˗ꓠꓽ ꓐꓰ ꓕꓷ ꓔꓳ ꓟꓲ˗ꓓꓳ ꓢꓰꓹ ꓫꓱ ꓟꓰ。

⁴ ꓥꓴ ꓠ⅄ꓱ ꓐꓰꓹ ꓥꓱ˗ꓠꓖꓷ ꓚꓲꓶ ꓓꓷ ꓫꓱ ꓠꓷ ꓬꓱꓹ ꓢꓰ ꓖꓱ ꓓꓷ ꓘ ꓢꓰ ꓛꓷ ꓫꓶ ⅄ꓵ ꓝꓳ ꓪ ꓡꓰꓹ ꓫꓶ ꓛꓷ ꓑꓰ ꓑꓲꓱ ꓐꓷ ꓛꓷ ꓘ ꓕꓷꓹ ꓮ ꓝꓷ ꓖꓱ ꓔꓲ˗ꓠꓖꓷ ⅄ꓵ ꓝꓳ ꓪ ꓡꓰ。

⁵ ꓬꓰ꓿ꓢꓴ ꓠꓷ ꓫꓱ ꓟꓰꓹ ꓠꓷ˗ꓠꓖꓷ ꓠꓖꓪꓱ˗ꓠꓖꓪꓱ ꓠꓯꓹ ꓫꓲ ꓠꓷ ꓠꓷ˗ꓠꓖꓷ ꓚꓵ ꓡꓷ ꓕꓷ ꓟꓱ ⅄ꓵ ꓜꓯ ꓕ ꓢꓰꓸ

⁶ ꓟꓯ ꓕꓷ ꓠꓲ ꓣꓰ ꓔ ꓖꓱ ꓫꓲ ꓠꓷ ꓥꓱ ꓖꓱ ꓟꓲꓽ ꓑꓴ ꓡꓷ ꓠꓷꓹ ꓫꓱ ꓟꓰꓹ ꓥꓱ ꓠꓴ ꓚꓲ꓿ꓔꓴ ꓪꓹ ꓕꓷ ꓢꓰ ꓟꓰ ꓣꓰ ꓔ ꓖꓱ ꓫꓲ ꓚꓵ˗ꓚꓵꓽ ꓑꓴ ꓐꓷ ꓝꓳ ꓪ。

⁷ ꓠꓷ˗ꓠꓖꓷ ꓢꓵꓸ˗ꓢꓵ ꓠꓷ ꓠꓱ ꓖꓱ ꓢꓵꓸ˗ꓢꓵ ꓠꓷ ꓘꓳ ꓓꓷ ꓟꓲ ꓠꓷꓹ ꓠꓙꓶ ꓟꓱ ꓠꓓꓶꓹ ꓫꓶ ꓛꓷ ꓦꓴ ꓕꓷ ⅄ꓵ ꓠꓓꓶ ꓟꓰ ꓪꓹ ꓠꓸ ꓙꓷ ꓟꓯ ꓠꓴ ꓕꓴ ꓟꓱ ꓞꓷ ꓢꓷ

⁸ ꓑꓯ˗ꓢꓪꓰ ꓠꓷ ꓑꓯ˗ꓢꓪꓰ ꓗꓳ ꓢꓵꓸ˗ꓢꓵꓹ ꓗꓪꓱ ꓠꓷ ꓗꓪꓱ ꓗꓳ ꓢꓵꓸ˗ꓢꓵ ꓝꓳ ꓪꓹ ꓣꓰ ꓗꓴ ꓟꓱ ꓗꓪ ꓡꓷ ꓡꓵꓸ˗ꓡꓵ ꓠꓱꓹ ꓦ ꓣꓶ ꓝꓳ ꓪꓹ ꓛꓷ ꓓꓷ ꓦꓱ ꓐꓰ ꓠꓴ ꓫꓶ ꓘꓪ ꓖꓱ ꓗꓴ ꓬꓵ ꓠꓷ ꓟꓰ ꓪ。

ꓣꓷ ꓡꓳ ꓢꓰ ꓚꓵ ꓓꓷ ꓝ

⁹ ꓠꓸ ꓠꓷ˗ꓠꓖꓷ ꓠꓖꓪꓱ˗ꓠꓖꓪꓱ ꓠꓯꓹ ꓫꓲ ꓠꓷ ꓠꓷ˗ꓠꓖꓷ ꓙꓱ ꓑꓴ ꓫꓲ˗ꓮ˗ꓗꓴ ꓡꓳ ꓕꓰ ꓗꓴ ꓝꓳ ꓪꓹ ꓕꓷ ꓢꓰ ꓟꓰ ꓠꓷ˗ꓠꓖꓷ ꓡ ꓥꓯ ꓠꓯ ꓟꓴꓸ ꓢꓷꓹ ꓡꓰ ꓚꓵ ꓥꓱ ꓝꓷ ꓖꓷ ꓠꓷꓹ ꓢꓪꓰ ꓓꓷ ꓠꓱ ꓖꓱ ꓘ ꓗꓯ ꓕꓰ ꓫꓵꓸ ꓠꓷꓹ ꓕꓷ˗ꓠꓖꓷ ꓔꓳ ꓓꓳ˗ꓫꓲ ꓐꓰ ꓐꓷ ꓠꓯ。

¹⁰ ꓠꓸ ꓦꓰ ꓘꓳ˗ꓦꓷ ꓠꓴ ꓗꓯ ꓠꓷ ꓑꓯ˗ꓢꓪꓰ ꓛꓷ ꓑꓰ ꓔꓳ ꓟꓰꓹ ꓟꓰ ꓐꓷ ꓠꓯ。

¹¹ ꓫꓲ ꓠꓷ ꓠꓷ˗ꓠꓖꓷ ꓔꓯ ꓑꓴꓹ ꓢꓪꓰ ꓗꓴ ꓑꓴ ꓐꓷ ꓕꓷ ꓘ ꓕꓷꓹ ꓖꓱ ꓞꓰ ꓗꓴ ꓠꓷ ꓮ ꓝꓷ ꓫꓱ ꓐꓷ ꓠꓯ ꓫꓱ ꓜꓭ˗ꓜꓭ ꓟꓱ ꓠꓓꓶꓹ ꓕꓷ ꓘ ꓔꓳ ꓕꓴ ꓢꓰ ꓮ ꓝꓷ ꓖꓱ ꓗꓷ˗ꓚꓷ ꓠꓷ˗ꓠꓖꓷ ꓬꓱ ꓡꓷ ꓟꓰꓹ ꓠꓷ˗ꓠꓖꓷ ꓮ ꓝꓷ ꓫꓱ ꓕ ꓢꓰꓹ ꓛꓷ ꓠꓴ ꓠꓷ˗ꓠꓖꓷ ꓠꓷ ꓗꓷ˗ꓚꓷ ꓟꓱ ꓠꓷꓹ ꓦꓰ꓿ꓠꓙꓶ ꓠꓷ ꓫꓱ ꓠꓷ ꓟꓳ

¹² ꓮ˗ꓐꓴ ꓖꓷ˗ꓣꓷ ꓠꓷ ꓮ˗ꓐꓴ ꓖꓷ˗ꓣꓷ ꓔꓳꓹ ꓮ˗ꓐ ꓠꓷ ꓣꓳ ꓔꓳ ꓬꓵ ꓑꓴꓹ ꓫꓷ ꓓꓵ ꓕꓴ ꓝꓳ ꓪꓹ ꓣꓳ ꓠꓷ ꓟꓲꓸ ꓖꓱ ꓔꓷ ꓡꓷ ꓬꓱꓹ ꓮ˗ꓐ˗ꓟꓰ ꓚꓲꓶ ꓣꓴ ꓐꓰꓸ ꓕꓷ˗ꓠꓖꓷ ꓦꓯ ꓫꓷ ꓝꓳ ꓪ。

¹³ ꓕꓷ ꓢꓰ ꓟꓰ ꓠꓷ˗ꓠꓖꓷ ꓥꓱ ꓝꓷ ꓖꓷ ꓠꓷꓹ ꓫꓲ ꓓꓷ ꓑꓰ ꓠꓷ ꓠꓜꓶ ꓝꓳ ꓪꓹ ꓠꓸ ꓣꓶ ꓟꓯ ꓔ ꓟꓰ ꓡꓭ ꓢꓰꓸ ꓚꓵ ꓓꓷ ꓕ ꓢꓰ。

ꓫꓲ ꓢꓴꓹ ꓠꓯꓸ ꓡꓰ ꓠꓷ ꓚꓶ

¹⁴ ꓠꓷ˗ꓠꓖꓷ ꓒꓲꓱ˗ꓠꓲꓸ ꓠꓜꓶ ꓗꓯ ꓬꓵ ꓟꓰꓹ ꓕꓷ ꓫꓵ ꓟꓱ ꓯ ꓖꓱ ꓓꓵ ꓔ ꓫꓵ ꓖꓱ ꓕꓷ ꓡꓭ ꓓꓳ ꓢꓰꓹ ꓕꓷ ꓘ ꓬꓴ˗ꓕꓯ ꓠ⅄ꓵ ꓟꓰ ꓒꓴ ꓠ⅄ꓵ ꓗꓴ ꓐꓷ ꓠꓯ

¹⁵ ⅄ꓲ ꓗꓴ ꓠ⅄ꓵ ꓟꓰ ꓡꓹ ꓟꓴ ꓣ ꓡꓷ ꓟꓱ ꓠꓲꓹ ꓬ˗ꓗꓳꓽ ꓐꓴ ꓐꓷ ꓬꓱꓹ ꓖꓴ˗ꓜꓰ ꓡ ꓬꓵ ꓐꓷ ꓟꓱ ꓠꓲ。

¹⁶ ꓡꓷ ꓘꓳ ꓠ⅄ꓵ ꓟꓰ ꓡ ꓡꓰ ꓴ ꓐꓷ ꓬꓱꓹ ꓐ˗ꓡ ꓬꓵ ꓐꓷ ꓟꓱ ꓠꓲ。

¹⁷ ꓕꓷ ꓢꓵ ꓖꓱ ꓠꓲ ꓪ ꓡꓳ ꓢꓰꓹ ꓣꓳ ꓟꓲꓸ ꓑꓴ ꓟꓰ ꓠꓱ ꓖꓱ ꓮ ꓑꓳ ꓔꓭ ꓟꓰ ꓕꓷ ꓫꓶ ꓘꓪ ꓢꓰ。

¹⁸ ꓠꓷ˗ꓠꓖꓷ ꓛꓷ ꓫꓶ ꓟꓴ˗ꓞꓷ ꓡꓳꓹ ꓕꓴ ꓬꓱ ꓟꓱ ꓠꓓꓴ ꓫꓱ ꓞꓷ˗ꓠꓖꓷ ꓠꓯ。

¹⁹ ꓠꓲ ꓪ ꓕꓷ ꓙꓷ ꓡꓳ ꓠꓴꓹ ꓫꓶ ꓘꓪ ꓠꓓꓴ ꓘꓪ ⅄ꓵ ꓝꓳ ꓪꓹ ꓦꓰ ꓠꓷ ꓖꓴ˗ꓜꓰ ꓛꓷ ꓑꓰ ꓟꓸ˗ꓟ ꓑꓴ ꓞꓷ ꓕꓷ ꓙꓷ ꓠꓷꓹ ꓮ ꓬꓲ ꓔꓳ ꓕꓴ ꓡꓰ ꓞꓷ ꓟꓰꓹ ꓛꓷ ꓢꓵ ꓖꓱ ꓫꓶ ꓘꓪ ⅄ꓵ ꓟꓱ ⅄ꓲꓹ ꓛꓷ ꓠꓖꓴ ꓡ ꓛꓷ ꓢꓵ ꓡꓰ ⅄ꓵ ꓟꓱ ꓝꓳ ꓢꓰ。

²⁰ ꓦꓰ ꓠꓷ ꓠꓲ ꓪ ꓕꓷ ꓠꓷ ꓒꓲ ꓚꓶ ꓡꓭ ꓟꓱ ꓪ ꓢꓰꓹ ꓢꓯ ꓬꓲ ꓟꓰ ꓖꓱ ꓖꓴ˗ꓜꓰ ꓕꓷꓹ ꓓꓷ ꓦꓱ ꓐꓰ ꓚꓵ ꓓꓷ ꓕ ꓖꓱ ꓓꓷ ꓗꓴ ꓡ ꓟꓱ ꓠ⅄ꓵ ꓢꓰꓹ ꓦꓰ ꓠꓷ ꓢꓴ ꓑꓴ ꓞꓷ ꓖꓱ ꓫꓲ ꓝꓷ ꓖꓷ ꓠꓷꓹ ꓠꓲ ꓪ ꓘꓪ ꓕꓷ ꓡꓰ ꓠꓷ ꓚꓶ ꓓꓷ ꓖꓴ ꓔ ꓪ。

²¹ ꓕꓷ ꓘ ꓫꓲ ꓠꓷ ꓠꓷ˗ꓠꓖꓷ ꓚꓲꓶ ꓫꓱꓸ ꓡꓵ ꓡꓰꓹ ꓚꓲ꓿ꓔꓴ ꓛꓷ ꓡꓳ ꓠ⅄ꓵ ꓬꓯꓹ ꓓꓷ ꓦꓴ ꓠꓷ ꓫꓱ ꓟꓰꓹ ꓚꓲ꓿ꓔꓴ ꓕꓷ ꓡꓳ ꓠ⅄ꓵ ꓬꓯꓹ ꓠꓷ˗ꓠꓖꓷ ꓠꓖꓷꓽ ꓟꓱ ꓠꓲ。

²² ꓚꓲ꓿ꓔꓴ ꓟꓱ ꓚꓷꓹ ꓫꓲ ꓣꓪ ꓟꓱ ꓚꓷ ꓖꓱ ꓕꓷ ꓖꓱ˗ꓔꓷ ꓡꓷ ꓬꓱꓹ ꓟꓱ ꓠꓲ˗ꓠꓲ ꓖꓱ ꓦꓰ ꓫꓶ ꓦꓱꓸ ꓐꓰꓹ ꓐꓰ ꓡꓭ ꓜꓯ ꓢꓰꓹ ꓦꓰ ꓠꓷ ꓢꓴ ꓑꓴ ꓞꓷ ꓖꓱ ꓫꓲ ꓡ ꓚꓵ ꓑꓴ ꓐꓷ ꓝꓳ ꓪ。

²³ ꓠꓷ˗ꓠꓖꓷ ꓠꓖꓪꓱ˗ꓠꓖꓪꓱ ꓐꓷ ꓠꓯ ꓡꓵ ꓡꓹ ꓓꓷ ꓦꓱ ꓐꓰ ꓖꓱ ꓫꓶꓹ ꓗꓯ ꓠꓷ ꓠꓷ˗ꓠꓖꓷ ꓔꓳ ꓫꓱ ꓬꓱ ꓢꓰ。

ꓦꓰ ꓡꓰ ꓡꓷꓽ ꓘꓳ ꓗ ꓫꓱ

²⁴ ꓕꓷ ꓙꓷ ꓡꓳ ꓫꓶ ꓘꓪ ꓠꓖꓴ ꓢꓰꓽ ꓠꓲ˗ꓟꓰ ꓡ ꓠꓽ ꓐꓰ ꓑꓲꓱ ꓝꓳ ꓪꓹ ꓦꓰ˗ꓟꓰ ꓡ ꓟꓱ ꓟꓐꓴ ꓢꓰ。

²⁵ ꓗꓷ ꓓꓷ ꓦꓱ ꓐꓰ ꓟꓷ ꓗꓴ ꓠꓷ ꓟꓴ ꓠꓙꓴ ꓡꓷꓹ ꓟꓷ ꓖꓱ ꓘꓪꓱ ꓡ ꓡꓵꓸ˗ꓡꓵ ꓡꓷ ꓝꓳ ꓪ。

²⁶ ꓕꓷ ꓙꓷ ꓡꓳ ꓕꓷ˗ꓠꓖꓷ ꓫꓲ ꓖꓱ ꓣꓳ ꓕꓷ ꓟꓱ ꓓꓱ ꓖꓱ ꓗ˗ꓔꓭ ꓠ⅄ꓵ ꓬꓱꓹ ꓟꓐꓴ ꓠꓯ ꓐꓰ ꓚꓲ ꓠꓜꓯ ꓑꓴ ꓟꓴ ꓣ ꓡꓷ ꓕꓷ ꓓꓳ ꓝ ꓪ。

²⁷ ꓕꓷ ꓠꓷ ꓦꓰ ꓖꓱ ꓚꓶ˗ꓫꓲ ꓦꓱ ꓚꓶ ꓠꓷꓹ ꓕꓷ ꓠꓷ ꓢꓴ ꓑꓴ ꓞꓷ ꓖꓱ ꓫꓲ ꓕꓷꓹ ꓟꓷ ꓘꓷ ꓡꓷ ꓘꓷ ꓚꓴꓸ ꓖꓱ ꓡꓴ ꓐꓱ ꓠꓷꓹ ꓢꓴ ꓑꓴ ꓗꓯ ꓮ ꓡꓷ ꓝꓳ ꓪ。

ꓠꓜꓶ ꓘꓷ ꓠꓷ ꓡꓶꓸ˗ꓡꓶ ꓢꓳ

²⁸ ꓠꓷ˗ꓠꓖꓷ ꓟꓱ˗ꓐ˗ꓡꓵ˗ꓔꓯ ꓖꓱ ꓠꓜꓶ ꓘꓷ ꓠꓷ ꓑꓲ˗ꓬꓵ ꓢꓳ ꓕ ꓢꓰꓹ ꓠꓜꓶ ꓗꓱꓸ ꓕꓷꓹ ꓠꓜꓶ ꓒꓲꓱ ꓔꓵ ꓡꓰ ꓞꓷ ꓕꓷ ꓘ ꓢꓰꓹ ꓠꓷ˗ꓠꓖꓷ ꓟꓷ ꓣꓴ ꓠꓴꓸ˗ꓠꓴ ꓞꓷ ꓕꓷ ꓢꓷ ꓬꓯ。

²⁹ ꓛꓱ ꓡꓭ ꓪ ꓟꓴꓸ ꓝꓷꓹ ꓠꓷ˗ꓠꓖꓷ ꓡ ꓣꓰ ꓕꓷ ꓘ ꓢꓰꓻ ꓛꓷ ꓦꓴ ꓫꓶ ꓕꓷ ꓑꓲꓱ ꓡꓷ ꓫꓲ ꓖꓱ ꓣꓳ ꓡ ꓠꓴꓸ˗ꓠꓴ ꓬꓵꓹ ꓘꓴ ꓘꓭ ꓠ⅄ꓵ ꓢꓰ ꓫꓱ ꓕꓷ ꓢꓷ ꓠꓯ。

³⁰ ꓥꓱ ꓠꓷ ꓔꓴ ꓐꓰ ꓠꓷ˗ꓠꓖꓷ ꓔꓳ ꓫꓱꓹ ꓛꓷ ꓛꓶ ꓡꓭ ꓟꓱ ꓗꓳ ꓢꓷ ꓠꓷꓹ ꓛꓷ ꓦꓴ ꓖꓱ ꓫꓶ ꓕꓷ ꓑꓲꓱ ꓡꓷ ꓠꓯ。

³¹ ꓟꓷ ꓠꓷ ꓡꓷ ꓗꓴ ꓐꓷ ꓡꓹ ꓥꓱ ꓖꓱ ꓗꓷ˗ꓚꓷ ꓠꓴ ꓗꓴ ꓜꓯ ꓟꓱ ꓕ。

³² ꓠꓸ ꓠꓲ ꓪ ꓕꓷ ꓠꓲ ꓠꓱ ꓕꓷ ꓙꓷ ꓕꓷꓹ ꓢꓷ ꓫꓲ ꓟꓱ ꓠ⅄ꓵꓹ ꓦꓰ ꓖꓱ ꓚꓶ˗ꓫꓲ ꓡ ꓟꓱ ꓢꓷꓹ ꓣꓳ ꓡ ꓟꓱ ꓢꓷꓹ ꓟꓷ ꓮ˗ꓐ ꓠꓷ ꓔ ꓢꓷ ꓕ ꓢꓰ。

³³ ꓠꓷ˗ꓠꓖꓷ ꓠꓖꓪꓱ˗ꓠꓖꓪꓱ ꓠꓯꓹ ꓠꓴ˗ꓟꓰ ꓟꓱ ꓘꓭ ꓐꓰ ꓞꓴ˗ꓠꓖꓷ ꓠꓯꓹ ꓠꓲ ꓪ ꓕꓷ ꓣꓰ ꓕꓷ ꓘ ꓕꓴ ꓡꓷ ꓕꓷꓹ ꓠꓷ˗ꓠꓖꓷ ꓢꓷ ꓟꓱ ꓕ ꓝꓷ ꓖꓷ ꓪ。

³⁴ ꓛꓷ ꓫꓶ ꓕꓷ ꓫꓲ ꓓꓷ ꓗꓴ ꓠꓷ ꓬ˗ꓗꓳꓽ ꓕꓰ ꓒꓲ ꓑꓴꓹ ꓐꓵ˗ꓔꓵ ꓡꓰ ꓦꓷꓹ ꓚꓶ ꓫꓲ ꓠꓷ ꓬ˗ꓗꓳꓽ ꓖꓱ ꓫꓶ ꓕꓰ ꓗꓪ ꓚꓶ ꓬꓱꓹ ꓫꓲ ꓕꓷ ꓦꓴ ꓠꓷ ꓐꓰ ꓠꓓꓶ ꓖꓱ ꓫꓶ ꓕꓷ ꓐꓰ ꓚꓶꓹ ꓡꓰ ꓚꓵ ꓘꓴꓽ˗ꓡꓵ˗ꓗ ꓔꓳ ꓡ ꓠꓴ˗ꓟꓰ ꓘꓭ ꓟꓱ ꓠꓲ ꓫꓱꓹ ꓗꓳ˗ꓔꓳ ꓠꓲꓸ˗ꓠꓲ ꓪ。

³⁵ ꓕꓷ ꓝꓷ ꓖꓷ ꓠꓷ ꓠꓷ˗ꓠꓖꓷ ꓠꓴ˗ꓟꓰ ꓘꓭ ꓟꓱ ꓠꓲꓹ ꓦꓰ ꓕꓷ ꓣꓰ ꓕꓷ ꓘ ꓡꓰ ꓡꓷ ꓕꓷ ꓠꓷ˗ꓠꓖꓷ ꓢꓷ ꓟꓱ ꓕꓹ ꓓꓷ ꓘꓸ ꓟꓴ ꓘꓴ ꓓꓷ ꓘꓸ ꓦꓴ ꓘꓳꓼ ꓓꓷ ꓘꓸ ꓯꓽ ꓚꓵꓸ ꓓꓷ ꓘꓸ ꓟꓴ ꓢꓷ ꓔꓷ ꓡꓷ ꓝꓽ。

³⁶ ꓕꓷ ꓓꓷ ꓘꓸ ꓠꓷ ꓕꓴ ꓡꓷ ꓒꓲ ꓢꓰꓹ ꓠꓷ˗ꓠꓖꓷ ꓕꓰ ꓬꓲ˗ꓥꓴ ꓕꓷ ꓓꓳ ꓒꓲ ꓝ。

³⁷ ꓥꓱ ꓠꓷ ꓠꓷ˗ꓠꓖꓷ ꓔꓳ ꓫꓱ ꓖꓱ ꓗꓷ˗ꓚꓷ ꓕꓷꓹ ꓫꓲ ꓓꓷ ꓑꓰ ꓔꓳ ꓡ ꓫꓱ ꓠꓷ ꓟꓱꓽ ꓠꓴ˗ꓟꓰ ꓘꓭ ꓟꓱ ꓠꓲ。