PSALMS 99 - Navajo Bible

Bóhólníihii éí Ízrel dine'é bich'į' ba'ahódlí

¹ Bóhólníihii nant'á. Éí bik'ee ał'ąą dine'é bitah dahoditłid le'! Chérabim bita'dóó bibikáá'dóó nahat'áii yikáá' dah sidá; háni'dii ni' naha'ná!

² Záíyangi Bóhólníihii ayóó át'éii nilį́. Ał'ąą dine'é t'áá ałtso yiláahgo ayóó át'éii nilį́.

³ Nízhi' ayóó át'éii índa t'áá íiyisí bits'ąą hasti'ii yee danózhíigo naa dahaniih le'! Háálá hó jidiyin!

⁴ Aláahgo naat'áanii bibee óhólníihii éí doo haada yit'éii ayóó'áyó'ní. Binahó'áii t'áá ałtso aheełt'éego niłdzilgo ánílééh; Jéíkab bidine'é bitahgi doo haada nít'éégóó índa t'áá ákogi ánít'éego ánihoyí'aah.

⁵ Bóhólníihii nihiDiyin God ayóó át'éego ádeínóhsin! Bibikáá' dah adées'eezí si'ą́ągi nidahohłá! Háálá hó jidiyin!

⁶ Mózes áádóó Éran éí Bóhólníihii binááda'iiłniihii atah nilį́į́ nít'éé'. Sámuel ałdó' házhi' dayózhíii bitah jílį́į́ nít'éé'. Bóhólníihii yich'į' sodadilzingo bich'į' énáhoosįįł nít'éé'.

⁷ K'os níyizgo bii'dę́ę́' bich'į' hanádzih nít'éé'. Yee hahaasdzíi'ii índa bik'eh hoogáałii yeidiní'ánígíí yik'eh dahół'į́įgo tádadookai.

⁸ Bóhólníihii nihiDiyin God nílíinii, dabich'į' énáhosínísįįd. Ba'át'e' bá yóó'ahidí'aah nít'éé', nidi doo ákǫ́ǫ́ ádáát'įįdii biniinaa até'él'į́ bee k'ééhodiinidlaa.

⁹ Bóhólníihii nihiDiyin God ayóó át'éego ádeínóhsin! Bidził dílzinii si'ą́ądi bich'į' nidahohłá, háálá Bóhólníihii nihiDiyin God hó jidiyin!