PSALMS 92 - Navajo Bible

Bóhólníihii yá'át'éehgo ó'oolíiłii baa ha'niih

¹ Bóhólníihii bich'į' ahééh jinízingo yá'át'ééh. Aláahgo Ayóó'ánít'éii nílíinii, nízhi' baa hojiniihgo hojitaałgo yá'át'ééh.

² Aa a'ááh nínízinii abínígo baa hojilne'go áádóó na'ahódlíhígíí tł'ée'go baa hojilne'go yá'át'ééh.

³ Tsin tł'óół neeznáá bąąh daneelzhee'go bee nida'a'néii áádóó tsin tł'óół bąąh daneelzhee'go bee nida'a'néii índa tsin tł'óół naakits'áadah bąąh daneelzhee'go bee nida'a'néii bee Bóhólníihii baa hojiniihgo yá'át'ééh.

⁴ Háálá, Bóhólníihii nílíinii, ninaanish bee shił hózhǫ́ǫgo áshiinilaa. Níla' bee íinilaaígíí baa shił hózhǫ́ǫgo hashtaał.

⁵ Bóhólníihii nílíinii, dooládó' ninaanish ayóó ádaat'ée da! Nintsíkees t'áadoo yééhoníyąądí da!

⁶ Diné doo hózhǫ́ nitsíkeesii t'áadoo bił bééhóziní da, índa diné doo áhályáanii díí doo yik'i'diitįįh da.

⁷ Tł'oh łitsooí háánít'į́hígíí nahalingo diné doo yá'ádaashóonii k'ee'ąą dínít'į́įhgo, áádóó diné doo ákwii ádaaníiłii k'ee'ąą dilzhishgo, éí hool'áágóó ábidi'dooldįįłgo át'é.

⁸ Nidi, ni Bóhólníihii nílíinii, aláahgo ayóó ánít'éego ahool'á.

⁹ Háálá shoo, Bóhólníihii nílíinii, ni'ana'í ádadoodįįł; diné doo ákwii ádaaníiłii t'áá ałtso tabidí'nóolkał.

¹⁰ Nidi béégashii ałchinii bidziilígi át'éego shidziilgo áshiinilaa. Ak'ah ániidíii shik'i yaadziidgo shi'doolzį́į́'.

¹¹ Shaa háashjée'ii ádabidi'dooldįįłígíí yiiłtsą́; diné doo yá'ádaashóonii shich'į' nidaabaahii bik'eh hodidoodleełii diséts'ą́ą́'.

¹² Diné t'áá ákogi át'éii páam sikaadii nooséłígi át'éego nanise', áádóó Lébanan kéyahdi gadtsoh nahalingo nanise'.

¹³ Bóhólníihii bikin góne' k'edadeesyáhígíí nihiDiyin God bikin bii' sohodizin haz'ánígi nizhónígo danéeséeh doo.

¹⁴ Hadaastih nidi t'ahdii bineest'ą' bąąh nídahadleeh; t'áá áłahjį' bitoo' dahólǫ́ áádóó daditłéé',

¹⁵ áko Bóhólníihii éí t'áá ákogi át'éego bééhózin doo. Bí éí tsé shá nilį́ áádóó doo ákogi é'ét'éii bii' ádin.