PSALMS 9 - Navajo BibleDiyin God t'áá ákogi áánííł baa ahééh hasin 1 Bóhólníihii nílíinii, shijéí t'áá át'é bee nich'į' ahééh nisin doo; ninaanish bik'eda'ayóígíí t'áá ałtso bee naa hashne' doo. 2 Niniit'aa shił hózhǫ́ áádóó t'áá íiyisí shił hózhǫ́ǫ doo; Aláahgo Ayóó'át'éii nílíinii, nízhi' baa hashniihgo hashtaał doo. 3 Shi'ana'í danilíinii t'ą́ą́' anáájée'go nidáahjį' naa'ííłdáazgo daneezná. 4 Háálá bee shá haz'áanii áádóó biniyé ásht'íinii baa áhólyą́ą́ nít'éé'; bikáá'dóó nahat'áii bikáá' dóó dah sínídáago t'áá ákogi át'éego aa nánít'į́. 5 Ał'ąą dine'é dadííníteh; doo yá'ádaashóonii ádasíníłdįįd; dabízhi' k'ééda'shíníłchxǫ'go hool'áágóó ahóyéel'áágóó baa dahoyoos'nah. 6 Ana'í hool'áágóó ádaasdįįd; éíyee' bikin hadaas'áii naa'ahííníłtł'íidgo bee bééhániih dooleeł yę́ę t'áá yił ádaasdįįd. 7 Nidi Bóhólníihii hool'áágóó hólǫ́ǫ doo; bibikáá'dóó nahat'áii bikáá'dóó ánihwii'aah dooleeł biniyé niiní'ą́; 8 t'áá ákogi át'éego nihokáá' dine'é yaa nídóot'įįł; ał'ąą dine'é aheełt'éego yaa nídóot'įįł. 9 Bóhólníihii éí diné bide áńdahoo'níiłii bine' adahinichéehii yá nilį́; bich'į' nidahwii'náago bine' adahinichéehii yá nilį́. 10 Bóhólníihii nílíinii, nízhi' yéédahósinii éí naa dadzólíi doo, háálá há dandéez'į́į'ii doo yóó'adííní'ą́ą da. 11 Záíyandi Bóhólníihii kééhat'íinii baa dahohniihgo bich'į' dahohtaał! Dadine'é bitahgóó ááníłígíí baa dahołne'! 12 Bi'diisyíinii bidił yá k'ééhidi'néehii yénálniih; diné hojooba' ádaaníigo doo yaa yoonéeh da. 13 Bóhólníihii nílíinii, shaa jiiníbaah! Anoonééł bich'į' yah ahóót'i'dóó hááshííníłtíinii, shik'ee dadiniihgo shich'į' nidahwiiłnáanii níníł'į́, 14 áko Záíyan bich'é'é bił yah a'atiingi bee naa ha'niihii t'áá ałtso baa hashne' doo; nibee yisdá'iildéehii baa shił hózhǫ́ǫ doo. 15 Ał'ąą dine'é éí ahoodzą́ągo ádahoolaaí góyaa nahodits'ǫ' ííłdááz; tł'óół bee ódleehí nídeidees'į́į'ii t'áá bí yiih nídahaaskai. 16 Bóhólníihii éí aa nát'į́įgo ánihwii'aahígíí bee béého'dílzingo í'diilyaa; diné doo yá'ádaashóonii t'áá bí łoh ádayiilaii yiih hikááh. Higáíyan. Síilah. 17 Diné doo yá'ádaashóonii áádóó ał'ąą dine'é Diyin God yaa dayoonéehii t'áá ałtso hool'áágóó ti'hoo'nííhgóó yi'iiłníih doo. 18 Jó, hojooba' nahas'áanii doo baa náhoyoo'nah da doo, áádóó diné bich'į' naho'diilnáanii bá chohoo'íinii doo hool'áágóó ádoodįįł da. 19 Bóhólníihii nílíinii, díldzííł! Diné t'áadoo ak'eh dadidlíní doo; ał'ąą dine'é t'áá ni baa nánít'į́! 20 Bóhólníihii nílíinii, éí bił yéé' ádahóle'! Ał'ąą dine'é danilíinii t'óó diné t'éí danilį́įgo bił béédahózingo ánílééh! Síilah. |
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
American Bible Society