PSALMS 85 - Navajo Bible

Diyin God éí Ízrel dine'é yaa a'ááh dínóozįįł bíká sohodizin

¹ Bóhólníihii, nikéyah baa jiiníba' nít'éé'; Jéíkab bíí' nilíinii daasnáanii bá shónéisíníłt'e'.

² Nidine'é doo ákwii ádáát'įįdii bá yóó'adííní'ą́; ádił da'asziihii t'áá ałtso bá bik'i hwiiniziid. Síilah.

³ T'óó báhádzidgo bee atí'éł'íinii t'áá ałtso nahjį' nidííní'ą́; t'áá íiyisí náhóóchįįdígíí bits'ą́ąjį' ánéinidzaa.

⁴ NihiDiyin God, yisdánihiinííł nílíinii, hasht'éénihídlééh áádóó nihich'į' náháchį'ígíí éí ni'kónílééh!

⁵ Hool'áágóósh nihich'į' náháchį' doo? Oochííłgóósh t'áá ałtso bich'į' náháchį' doo?

⁶ T'áá aaníí nídanihi'diyííłnaał, áko nidine'é daniidlį́įgo ninahjį' nihił nidahoozhǫǫh doo.

⁷ Bóhólníihii nílíinii, nihaa a'ááh nínízinii nihich'į' yit'íní ánílééh áádóó nibee yisdá'iildéehii nihaa diní'aah.

⁸ Diyin God Bóhólníihii yee hadoodzihii dideests'į́į́ł. Bidine'é índa bidiyį́į́' danilíinii bee asht'ehodít'éii yee yich'į' hadoodzih, nidi t'ááká doo áháyą' yich'į' t'ą́ą́' dah nínáádookááh yíila'.

⁹ T'áá aaníí, diné dabidósinii t'áá áyídígi bee yisdá'iildéehii bá hólǫ́, áko nihikéyahgi bee baa ha'niihii hólǫ́ǫ doo.

¹⁰ Aa a'ááh hasin índa t'áá aaníinii ahidii'áázh; t'áá ákogi át'éii índa bee asht'ehodít'éii ahizts'ǫs.

¹¹ T'áá aaníinii łeeyi'dóó hahinisé, áádóó t'áá ákogi át'éii éí wót'ááhdę́ę́' déez'į́į́'.

¹² T'áá aaníí, Bóhólníihii yá'át'éehii nihaididoo'ááł, áádóó nihikéyah bikáa'gi na'nt'ą' doo.

¹³ Bilą́ąjį' t'áá ákogi át'éii yigáałgo nihá atiin áhodoolííł.