PSALMS 83 - Navajo Bible

Ízrel dine'é bida'ana'í ádooldįįł biniyé sohodizin

¹ Diyin God nílíinii, t'áadoo t'óó ádíínílká'í. Diyin God nílíinii, t'áadoo t'óó dííníłhélí áádóó t'áadoo t'óó áhodíínílzé'é!

² Háálá shoo, ni'ana'í danilíinii hahóół'á; nik'ee dadiniihii dah dadíníit'ą́.

³ Binda'adlo'go nidine'é yindaha'á; níí' danilíinii ayóó'ííní'nínígíí yiniyé ahéédadiikahgo yaa nídaat'į́.

⁴ Kódaaní, Sołtį', haa'íshą' Ízrel dine'é t'áá jíl'áá nít'éé' ádahodiildįįł, áko bízhi' doo bééhániih da doo.

⁵ Jó, yee łá'í daazlį́į'go nidahaz'ą́; nik'ijį' danilį́įgo ahada'deet'aah:

⁶ níbaal yii' kéédahat'íinii éí Íídam dine'é áádóó Íshmeiyel dine'é, Mó'ab dine'é índa Héígar dine'é;

⁷ Gííbal áádóó Áman índa Ámalek dine'é; Táir kin haal'áagi kéédahat'íinii éí Filístiya dine'é yił ałch'odaos'ne';

⁸ Áshar dine'é ałdó' yił ałch'odaos'ne'; éí Lat ba'áłchíní ahoolchíiłii yíká anájah nít'éé'. Síilah.

⁹ Mídiyan dine'é íinilaa yę́ęgi ánílééh áádóó Kíshan tooh nílį́įgi Sísera áádóó Jéíbin íinilaa yę́ęgi ánílééh,

¹⁰ éí Éndor kin shijaa'gi ádabi'disdįįdgo ákwe'é dabits'íís éí nanise' bich'iyą' silį́į́'.

¹¹ Bá aghádahideezíinii Óreb áádóó Zííyeb íinilaa yę́ęgi ánílééh, índa binanit'a'í danilíinii Zííbah áádóó Zalmóna íinilaa yę́ęgi ánílééh.

¹² Éí kódaaní, Haa'íshą' Diyin God bihootso nihíí' ádadiilníí ł.

¹³ ShiDiyin God nílíinii, ch'il deeníní bił naanááyołígi ádaat'éego ánílééh, ehégod bił níyolígi ádaat'éego ánílééh.

¹⁴ Tsiyi'di hodook'ą́łígíí nahalingo, dził bąąh hodiiltłahígíí nahalingo,

¹⁵ yéego niníyol ó'oołdįįłii bee naanaajeeh, áádóó niníyoltsoh bee tsídabidíłhéés.

¹⁶ Bóhólníihii nílíinii, nízhi' hádaat'į́į doo biniyé binii'jį' t'óó baa yádahasingo ádanile'.

¹⁷ Háni'dii hool'áágóó t'óó bił dahazkéehgo ádabi'dólne' áádóó tsídabi'dólyéés; háni'dii t'óó baa yádahasinígi át'éego ádabi'dólne'go ádaadįįh.

¹⁸ Áko nahasdzáán bikáá'góó t'áá níłtéél nít'éé' t'áá ni t'éiyá, Bóhólníihii yinílyéhígíí, Aláahgo Ayóó'át'éii nílį́įgo diné bił béédahózin le'.